ព្រឹត្តិការណ៍បរិច្ចាគឈាម ក្រោមប្រធានបទ “ឈាមខ្ញុំជារបស់អ្នក ឈាមអ្នកជារបស់ខ្ញុំ” ដែលរៀបចំផ្សារទំនើបហឺរីថេកវ៉ក (Heritage Walk) ក្នុងក្រុងសៀមរាប នាថ្ងៃទី៣ ខែកុម្ភៈ ឆ្នាំ២០២៤នេះ មានអ្នកចូលរួមបរិច្ចាគឈាមប្រមាណ ៣០០នាក់។ ព្រឹត្តិការណ៍នេះ រៀបចំដោយមូលនិធិឈាម នី មុន្នីនាថ ដោយទទួលបានការគាំទ្រពី ក្រសួងទេសចរណ៍ រដ្ឋបាលខេត្តសៀមរាប និងកិច្ចសហការពី សមាគមទេសចរណ៍កម្ពុជាខេត្តសៀមរាប សមាគមសហគ្រិនវ័យក្មេងខេត្តសៀមរាប និងជាសហភាពសហព័ន្ធយុវជនកម្ពុជា (សសយក)។
ព្រឹត្តិការណ៍បរិច្ចាគឈាមដ៏ធំមួយនេះ ក៏មានការចូលរួមពីសិល្បករ សិល្បការិនីខ្មែរប្រមាណ ១០០នាក់ផងដែរ ដើម្បីធ្វើការផ្សព្វផ្សាយពីសកម្មភាពមនុស្សធម៌ ដែលចូលរួមចំណែកពង្រឹងសុខុមាលភាពសង្គម និងបម្រើដល់ប្រយោជន៍សាធារណៈ ជាពិសេសជួយដល់អាយុជីវិតមនុស្ស ដែលកំពុងស្ថិតក្នុងដំណាក់កាលគ្រោះថា្នក់បំផុត។ ដោយឡែក នៅថ្ងៃទី៤ស្អែកនេះ សិល្បករ សិល្បការិនីខ្មែរ ដែលបានអញ្ជើញបរិច្ចាគឈាមនៅពេលនេះ ក៏នឹងចូលរួមក្នុងព្រឹត្តិការណ៍ ដំណើរកម្សាន្តក្នុងមហានគរ ដើម្បីចូលរួមផ្សព្វផ្សាយពីតំបន់ទេសចរណ៍ដ៏គួរឱ្យចាប់អារម្មណ៍ជាច្រើន ក្នុងខេត្តសៀមរាបផងដែរ។
អញ្ជើញបរិច្ចាគឈាមក្នុងឱកាសនោះ លោក យុន លីនណេ អភិបាលរងខេត្តសៀមរាប បានសម្តែងការអរគុណ ចំពោះមូលនិធិឈាម នី មុន្នីនាថ និងភាគីពាក់ព័ន្ធទាំងអស់ ដែលបានបង្កើតព្រឹត្តិការណ៍ដ៏មានអត្ថន័យ ប្រកបដោយសន្ដានចិត្តដ៏ជ្រាលជ្រៅ ក្នុងការជួយសង្គ្រោះអាយុជីវិតមនុស្ស។ ក្នុងនោះ ការចូលរួមក្នុងព្រឹត្តិការណ៍ ដំណើរកម្សាន្តក្នុងមហានគរ សិល្បករ សិល្បការិនីខ្មែរ ព្រមទាំងអ្នកផលិតមាតិកាល្បីៗនៅលើបណ្ដាញសង្គមនេះ ពិតជាបានចូលរួមជាមួយរាជរដ្ឋាភិបាល ក៏ដូចជារដ្ឋបាលខេត្ត ក្នុងការផ្សព្វផ្សាយទៅដល់ពិភពលោក ពីតំបន់ទេសចរណ៍ក្នុងប្រទេស ជាពិសេសខេត្តសៀមរាប។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
