សភាយុវពាណិជ្ជករអន្តរជាតិកម្ពុជាខេត្តសៀមរាប ហៅកាត់ថា JCI SR បានការសហការគាំទ្រពីរដ្ឋបាលខេត្ត និងអាជ្ញាធរជាតិអប្សរា បានរៀបចំកម្មវិធីវនយាត្រាលើកទី៦ ឬហៅថាការដើរព្រៃនៅក្នុងតំបន់រមណីដ្ឋានអង្គរ ចាប់ពីម៉ោង ៥ព្រឹកព្រលឹមរហូតដល់ម៉ោង១២ថ្ងៃត្រង់ ថ្ងៃទី០៣ ខែកុម្ភៈ ឆ្នាំ២០២៣។
លោក ពិន ពណ្ណរាយ អ្នកគ្រប់គ្រងកម្មវិធីវនយាត្រា បានឲ្យដឹងថា កម្មវិធីដើរព្រៃលើកទី៦ នេះមានអ្នកចូលរួមជាង ៦០នាក់ ដោយមានអ្នកជំនាញផ្នែកយោគៈ សមាធិ ព្រមទាំងអ្នកជំនាញ ផ្នែកវប្បធម៌ ប្រវត្តិសាស្ត្រ ណែនាំ និងពន្យល់ប្រាប់អំពីវិធីធ្វើចិត្តឱ្យស្ងប់តាមរយៈការសមាធិរយៈពេលខ្លី ស្តាប់ប្រវត្តិរឿងរ៉ាវរបស់ប្រាសាទ និងភូមិសាស្ត្រខ្លះៗ។
លោកបន្តថាកម្មវិធីថ្ងៃនេះធ្វើក្នុងគោលបំណង ផ្សារភ្ជាប់ខ្លួនយើងជាមួយនឹងធម្មជាតិឡើងវិញ តាមរយៈការយល់ដឹងពីសារៈសំខាន់នៃព្រៃឈើនិងជីវិត អនុវត្តយោគៈ និងបដិបត្តិសមាធិដើម្បីបង្កើនថាមពលផ្លូវកាយនិងផ្លូវចិត្តក្នុងព្រៃនៃទីក្រុងអង្គរបុរាណ កម្ចាត់ភាពតប់ប្រមល់ ជំងឺស្ត្រេស ជំងឺបាក់ទឹកចិត្តនិងថប់បារម្ភ តាមរយៈការផ្សារភ្ជាប់ជាមួយធម្មជាតិ លើកកម្ពស់ និងចូលរួមផ្សព្វផ្សាយពីសារៈសំខាន់នៃការដើរព្រៃ ព្រមទាំងសិក្សាឈ្វេងយល់វប្បធម៌ប្រវត្តិសាស្ត្រ អង្គរនៃចក្រភពខ្មែរដ៏រុងរឿងនាអតីតកាល។
លោក សុខលីន ដែលជាអ្នកបានចូលរួមក្នុងកម្មវិធីនេះ បានលើកឡើងថា បើមានកម្មវិធីនេះនៅឆ្នាំក្រោយៗទៀត លោកបានជំរុញឲ្យមានអ្នកចូលរួមឲ្យបានច្រើន ព្រោះកម្មវិធីនេះពិតជាមានប្រយោជន៍ណាស់ តាមរយៈការក្រោកនៅពេលព្រឹកហាត់យូហ្កាដើម្បីធ្វើឲ្យអារម្មណ៍យើងល្អ។ ជាពិសេសយើងក៏អាចស្វែងយល់ពីប្រវត្តសាស្ត្រនៃប្រាសាទផ្សេងៗនៅក្នុងទឹកដីនេះខេត្តសៀមរាប៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
