សម្រាប់តែរាជធានីភ្នំពេញ នៅរៀងរាល់ ៥នាទី មានប្រជាពលរដ្ឋត្រូវការឈាម ដើម្បីសង្គ្រោះចន្លោះ ៣០០ទៅទៅ៤០០ប្លោក រីឯតម្រូវការទូទាំងប្រទេស កម្ពុជាត្រូវការឈាមប្រមាណ ១៤ម៉ឺនប្លោកក្នុងមួយឆ្នាំ។ នេះបើតាមការលើកឡើងរបស់ លោកវេជ្ជបណ្ឌិត សុខ ប៉ូ នាយកមជ្ឈមណ្ឌលជាតិផ្តល់ឈាម ក្នុងព្រឹត្តិការណ៍បរិច្ចាគឈាម ដោយស្ម័គ្រចិត្ត ក្រោមប្រធានបទ “ឈាមខ្ញុំជារបស់អ្នក ឈាមអ្នកជារបស់ខ្ញុំ” នារសៀលថ្ងៃទី០៣ ខែកុម្ភៈ ឆ្នាំ២០២៤នៅក្រុងសៀមរាប។
លោក សុខ ប៉ូ បញ្ជាក់ថា ក្នុងចំនួនខាងលើ មជ្ឈមណ្ឌលជាតិផ្តល់ឈាម មានសមត្ថភាពផ្គត់ផ្គង់ឈាមប្រមាណ ៧៥ភាគរយនៃតម្រូវការសរុប ដោយឡែកការស្ម័គ្រចិត្តផ្តល់ឈាមមានត្រឹមតែ ២០ភាគរយប៉ុណ្ណោះ។
លោក សុខ ប៉ូ ពន្យល់ថា ការបរិច្ចាគឈាមបានត្រឹមត្រូវ មិនប៉ះពាល់ដល់សុខភាពទេ ផ្ទុយទៅវិញវាផ្តល់អត្ថប្រយោជន៍យ៉ាងខ្លាំងដល់សុខភាព ដូចជា ជួយឱ្យប្រសើរឡើងនូវសុខភាពបេះដូង ការលើសទម្ងន់ ជំងឺដាច់សរសៃឈាមក្នុងខួរក្បាល បន្ថែមលើនោះ អ្នកនឹងដឹងពីស្ថានភាពឆ្លង ឬមិនឆ្លងជំងឺផ្សេងៗ ជាពិសេសជំងឺរលាកថ្លើម ស្វាយ អេដស៍ ។ល។ ក្នុងនោះការធ្វើតេស្តឈាមត្រូវបានរក្សាការសម្ងាត់ និងមិនគិតថ្លៃឡើយ។
ថ្លែងក្នុងឱកាសនោះ លោក យុន លីនណេ អភិបាលរងខេត្តសៀមរាប បានចាត់ទុកព្រឹត្តិការណ៍នេះថា ជាការចូលរួមបង្ហាញនូវសេចក្តីស្រឡាញ់ និងរួមចំណែកពង្រឹងសុខុមាលភាពសង្គម ជាពិសេសការជួយសង្គ្រោះជីវិតមនុស្ស។ លោកបន្ថែមថា ក្នុងកាលៈទេសៈណាមួយ ប្រាក់មិនអាចទិញជីវិតមនុស្សបានទេ តែឈាមអាចជួយសង្គ្រោះជីវិតមនុស្សបាន ហើយការផ្តល់ឈាម ពុំបង្កឱ្យប៉ះពាល់ដល់សុខភាពឡើយ។ ហេតុនេះសូមអំពាវនាវ និងលើកទឹកចិត្ត ដល់បងប្អូនទាំងអស់គ្នា ស្ម័គ្រចិត្តចូលរួមបរិច្ចាគឈាមទាំងអស់គ្នា ព្រោះឈាមរបស់យើងម្នាក់ៗ ពិតជាមានសារសំខាន់ណាស់ ក្នុងការជួយស្រោចស្រង់ជីវិតមនុស្ស។
សូមជម្រាបថា៖ នៅថ្ងៃទី៣ និងថ្ងៃទី៤ ខែកុម្ភៈនេះ ក្រោមកិច្ចសហការរួមគ្នា រវាងមូលនិធិឈាម នី មុនីនាថ សមាគមសហគ្រិនវ័យក្មេង ក្រសួងទេសចរណ៍ រដ្ឋបាលខេត្តសៀមរាប សហភាពសហព័ន្ធយុវជនកម្ពុជា និងមជ្ឈមណ្ឌលជាតិផ្តល់ឈាម បានផ្តួចផ្តើមបង្កើតព្រឹត្តិការណ៌សប្បុរសធម៌រួមគ្នាមួយឡើងគឺ ការស្ម័គ្រចិត្តឈាម ពីសិល្បករ សិល្បការិនីប្រមាណ ១០០នាក់ ក្រោមប្រធានបទ៖ឈាមរបស់ខ្ញុំជារបស់អ្នក ឈាមរបស់អ្នកជារបស់ខ្ញុំ និងយុទ្ធនាការ ដំណើរកម្សាន្តក្នុងមហានគរ និងតំបន់គោលដៅទេសចរណ៍នានាក្នុងខេត្តសៀមរាប។ ព្រឹត្តិការណ៍ទាំងពីរនេះរៀបចំឡើង ក្នុងគោលបំណង ចូលរួម ពង្រឹងសុខមាលភាពសង្គម និងបំរើប្រយោជន៍សាធារណៈ និង បំផុសស្មារតីទៅដល់មហាជនទូទៅ ចូលរួមសកម្មភាពសង្គម និងមនុស្សធម៌ បែបនេះ ក៏ដូចជា រួមគ្នាផ្សព្វផ្សាយពីសក្តានុពល និងគោលដៅទេសចសណ៍វប្បធម៌ ប្រវត្តិសាស្ត្រ និងធម្មជាតិរបស់កម្ពុជា ជាពិសេសខេត្តសៀមរាប ទៅកាន់ពិភពលោក ស្របតាមប្រកាសរបស់ប្រមុខរាជរដ្ឋាភិបាល សម្រេចដាក់ចេញកម្មវិធីពិសេស ទស្សនាសៀមរាប ឆ្នាំ២០២៤ ដើម្បីជួយស្ដារ និងលើកស្ទួយវិស័យទេសចរណ៍ឱ្យមានសន្ទុះឡើងវិញ៕
អត្ថបទ និងរូបភាព៖ លោក យូ វង្ស និងលោក ជា ស្រស់
កែសម្រួល៖ លោក សេង ផល្លី
