យោងតាមរបាយការណ៍មន្ទីរទេសចរណ៍ខេត្តសៀមរាប កាលពីថ្ងៃទី០១ ខែកុម្ភៈ ឆ្នាំ២០២៤នេះ បានឲ្យដឹងថា ក្នុងរយៈពេលពេញ១ខែ នាខែមករា ដើមឆ្នាំ២០២៤នេះ ទទួលបានភ្ញៀវទេសចរចំនួន ២៦៩.៤៣២នាក់ ដែលបានចូលមកលេងកំសាន្តនៅតាមតំបន់ប្រាសាទ រួមនឹងតំបន់ទេសចរណ៍នានានៅទូទាំងខេត្ត។
របាយការណ៍ដដែលបញ្ជាក់ថា ក្នុងចំណោមភ្ញៀវទេសចរទាំង ២៦៩.៤៣២នាក់ ពួកគាត់បានមកទស្សនាកម្សាន្តនៅតាមតំបន់ប្រាសាទ រមណីយដ្ឋានធម្មជាតិ ភ្នំគូលែន ក្បាលស្ពាន បឹងទន្លេសាប រមណីយដ្ឋានសហគមន៍តាមបណ្តាក្រុងស្រុក រួមទាំងរមណីយដ្ឋានកែច្នៃផ្សេងៗជាច្រើនទៀត។
ចំពោះវត្តមានភ្ញៀវទេសចរ២៦៩.៤៣២នាក់នេះដែរ មានការថយចុះប្រមាណ ៤.៩៤% បើប្រៀបធៀបនឹងរយៈពេលដូចគ្នាឆ្នាំ២០២៣ ចំនួន ២៨៣.៤៣៦នាក់។ ក្នុងនោះភ្ញៀវទេសចរជាតិមានចំនួនប្រមាណ ១៥៣.៩០០នាក់ ថយចុះប្រមាណ ២៥.២៩% ប្រៀបធៀបរយៈពេលដូចគ្នាឆ្នាំ២០២៣ ចំនួន ២០៦.០០០នាក់ និងភ្ញៀវទេសចរអន្តរជាតិមានចំនួន ១១៥.៥៣២នាក់ មានការកើនឡើង ៤៩.២០% បើប្រៀបធៀបនឹងរយៈពេលដូចគ្នាឆ្នាំ២០២៣ ចំនួន ៧៧.៤៣៦នាក់៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
