ក្នុងដំណើរទស្សនកិច្ច និងដាំកូនឈើ របស់ប្រតិភូក្រសួងបរិស្ថាន និងឯកអគ្គរដ្ឋទូតសហភាពអឺរ៉ុប នៅក្នុងបឹងទន្លេសាប ក្នុងភូមិសាស្រ្តខេត្តសៀមរាប និងខេត្តបាត់ដំបង កាលពីថ្ងៃទី៣១ ខែមករា ឆ្នាំ២០២៤ រដ្ឋមន្ត្រីក្រសួងបរិស្ថាន ឯកឧត្តម អ៊ាង សុផល្លែត បានបញ្ជាក់ថា បញ្ហាភ្លើងឆេះព្រៃលិចទឹក ការទន្ទ្រានយកដីធ្វើជាកម្មសិទ្ធិ ការប្រែប្រួលអាកាសធាតុ ជាបញ្ហាប្រឈមធំៗរបស់បឹងទន្លេសាប ដែលចាំបាច់ត្រូវរួមគ្នាដោះស្រាយ។
ឯកឧត្តម អ៊ាង សុផល្លែត បានលើកឡើងថា បញ្ហាភ្លើងឆេះព្រៃនេះ កាលពីអំឡុងឆ្នាំ២០១៤ ក្នុងតំណែងជាអនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឯកឧត្តម បានចុះមកកាន់តំបន់ព្រែកទាល់ កាលនេះឯកឧត្តម មិនដែលបារម្ភអំពីបញ្ហាអ្វីទេ ដោយសារកម្ពស់ទឹកខ្ពស់ ព្រៃលិចទឹកក៏ច្រើន។ ប៉ុន្តែនៅឆ្នាំ២០១៦ ភ្លើងឆេះព្រៃ បានបង្កឲ្យមានការបាត់បង់ព្រៃលិចទឹកអស់មួយចំនួនធំ ហើយបើទោះបីជាមានពេល៨ឆ្នាំមកហើយក្តី ការស្តារព្រៃឡើងវិញនៅមិនទាន់បានដូចដើមនៅឡើយ។ ដូច្នេះយើងត្រូវធ្វើយ៉ាងណាការពារកុំឲ្យមានភ្លើងឆេះព្រៃបន្តទៀត។
ឯកឧត្តមរដ្ឋមន្ត្រីបន្តថា ចំណែកបញ្ហាការទន្ទ្រានដីព្រៃលិចទឹក ធ្វើជាកម្មសិទ្ធិក៏បញ្ហាប្រឈមធំដែរ។ ការបំផ្លាញព្រៃលិចទឹក ដើម្បីទន្ទ្រានយកដីធ្វើស្រែ បានធ្វើឲ្យបាត់បង់នូវធនធានធម្មជាតិក្នុងបឹងទន្លេសាប ប៉ះពាល់ដល់ជីវភាពប្រជាពលរដ្ឋប្រមាណ៦លាននាក់ ដែលទទួលបានផលប្រយោជន៍អំពីធនធានបឹងទន្លេសាប។ បញ្ហានេះ ក្រសួងបរិស្ថាន បានដាក់ចេញនូវគោលការណ៍នានាដើម្បីប្រឆាំងនឹងអ្នកបំផ្លាញធនធានធម្មជាតិ ក្នុងនោះក្រសួងក៏បានណែនាំឲ្យបញ្ចប់វប្បធម៌ចាប់បានធ្វើកិច្ចសន្យារួចដោះលែង ហើយងាកមកប្រើការអនុវត្តច្បាប់វិញ នោះគឺចាប់បានកសាងសំណុំរឿងបញ្ជូនទៅតុលាការ។ ចំណែកបញ្ហាប្រឈមទី៣ នោះគឺការប្រែប្រួលអាកាសធាតុ ដែលបញ្ហានេះ បានធ្វើឲ្យបឹងទន្លេសាបដែលជាបឹងទឹកសាបធំជាងគេនៅអាស៊ីអគ្នេយ៍ ប្រឈមនឹងបញ្ហាខ្លាំងបំផុត។
ឯកឧត្តម អ៊ាង សុផល្លែត បានឲ្យដឹងថា ដើម្បីដោះស្រាយបញ្ហានេះ ក្រសួងបរិស្ថាន បានដាក់ចេញនូវយុទ្ធសាស្រ្តនានា ដើម្បីស្តារគម្របបៃតង ស្តារព្រៃលិចទឹក តាមរយៈការបង្កើតថ្នាលបណ្តុះកូនឈើខ្នាតអន្តរជាតិចំនួន៤ទីតាំង និងយកកូនឈើទាំងនោះមកដាំដុះឡើងវិញ។ ឯកឧត្តមបន្តថា ជាមួយនឹងការដោះស្រាយបញ្ហាទាំងនេះ មិនអាចតែក្រសួងបរិស្ថាន ឬក្រសួងកសិកម្មធ្វើតែឯងបាននោះទេ វាទាមទារឲ្យមានការចូលរួមពីប្រជាពលរដ្ឋទាំងអស់គ្នាផងដែរ៕
អត្ថបទ និងរូបភាព៖ លោក ជា ស្រស់
កែសមរួល៖ លោក អ៊ុន ណារាជ្យ
