ថ្លែងថ្ងៃទី៣១ ខែមករា ឆ្នាំ២០២៤ ក្នុងកិច្ចប្រជុំបូកសរុបលទ្ធផលការងារប្រចាំឆ្នាំ២០២៣ និងលើកទិសដៅបន្តឆ្នាំ២០២៤ របស់គណ:កម្មាធិការខេត្តប្រយុទ្ធប្រឆាំងអំពើជួញដូរមនុស្ស លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិ ប្រយុទ្ធប្រឆាំងអំពើជួញដូរមនុស្ស ហៅកាត់ថា គ.ជ.ប.ជ បានបញ្ជាក់ថា រាជរដ្ឋាភិបាលកម្ពុជា បានខិតខំប្រឹងប្រែងប្រយុទ្ធប្រឆាំងអំពើជួញដូរមនុស្ស គ្រប់ទម្រង់ ប៉ុន្តែតាមការសង្កេត បទល្មើសទាំងនោះ ហាក់មិនមានការថមថយ ទាំងក្នុងតំបន់ និងនៅតាមបណ្តាប្រទេសលើពិភពលោក។
លោកជំទាវ ជូ ប៊ុនអេង បង្ហាញថា អំពើជួញដូរមនុស្ស ត្រូវបានចាត់ទុកថាជាទាសភាពសម័យទំនើប និងជាបទឧក្រិដ្ឋមួយ ក្នុងចំណោមឧក្រិដ្ឋកម្មឆ្លងដែន ដែលប្រទេសនានាបាននឹងកំពុងតែប្រឈមមុខនាពេលបច្ចុប្បន្ន។ ទន្ទឹមនោះ ជនរងគ្រោះ ជាអនីតិជនប្រមាណ ៥០ភាគរយ បានកំពុងទទួលរងនូវអំពើជួញដូរទៅតាមគ្រប់រូបភាព ដែលប្រកបដោយគ្រោះថ្នាក់បំផុត។
លោកជំទាវ ក៏បានជំរុញដល់គណៈកម្មាធិការគណ:កម្មាធិការប្រយុទ្ធប្រឆាំងអំពើជួញដូរមនុស្សខេត្ត អភិបាលក្រុង-ស្រុក ត្រូវខិតខំស្រាវជ្រាវ ស៊ើបអង្កេត និងតាមដាន ពីសកម្មភាពបទល្មើសក្នុងរូបភាពផ្សេងៗដូចជា ការឆ្លងដែនទៅក្រៅប្រទេស ឬការនាំចូលមកពីបរទេសខុសច្បាប់ ការស៊ីឈ្នួលពរពោះ ជាពិសេសការធ្វើទេសន្តរប្រវេសន៍ ដោយមិនមានច្បាប់ត្រឹមត្រូវ ក្នុងការស្វែងរកការងារ និងការស្វែងរកគូស្រករនៅក្រៅប្រទេសជាដើម។ ក្នុងនោះ រដ្ឋបាលខេត្ត ក្រុង ស្រុក ត្រូវពង្រឹងកិច្ចសហប្រតិបត្តិការ និងទំនាក់ទំនងជាមួយគ្រប់ភាគីពាក់ព័ន្ធ ក្នុងការផ្តល់សេវាជូនជនរងគ្រោះ និងងាយរងគ្រោះឱ្យបានសមស្រប និងពង្រឹងលើការអនុវត្តច្បាប់ ផ្តន្ទាទោសជនល្មើសឱ្យបានធ្ងន់ធ្ងរបំផុតស្របតាមនីតិវិធីច្បាប់។
ក្នុងកិច្ចប្រជុំបូកសរុបលទ្ធផលការងារនេះដែរ លោកស្រី យូ សុភា អភិបាលរងខេត្តសៀមរាប និងជាអនុប្រធានអចិន្ត្រៃយ៍ ទទួលបន្ទុកប្រធានលេខាធិការដ្ឋានគណៈកម្មាធិការគណ:កម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប ក៏បានបង្ហាញពីការអនុវត្តសកម្មភាពស្របតាមគោលនយោបាយ របស់រាជរដ្ឋាភិបាលកម្ពុជា ដោយមានការចូលរួមយ៉ាងសកម្មពីគ្រប់អ្នកពាក់ព័ន្ធទាំងស្ថាប័នរដ្ឋ និងអង្គការសង្គមស៊ីវិល ដែលជាកម្លាំងចលករដ៏សំខាន់ ក្នុងការជំរុញការបង្ការទប់ស្កាត់ លុបបំបាត់អំពើជួញដូរមនុស្ស អំពើធ្វើអាជីវកម្មផ្លូវភេទ ការកេងប្រវ័ញ្ចកម្លាំងពលកម្ម និងអំពើហឹង្សាទាក់ទងនឹងយេនឌ័រ។ល។
គួរជម្រាបថា ពិធីនេះមានអញ្ជើញជាអធិបតីពីសំណាក់ឯកឧត្តម អ៊ាន ឃុន ប្រធានក្រុមប្រឹក្សាខេត្ត និងមានការចូលរួមពីអាជ្ញាធរក្រុង ស្រុក ឃុំ សង្កាត់ មន្ទីរ អង្គភាពពាក់ព័ន្ធ ព្រមទាំងតំណាងអង្គការ សមាគម ដៃគូជាតិ-អន្តរជាតិសរុបប្រមាណ ២០០នាក់។
អត្ថបទ និងរូបភាព៖ លោក ទ្រា ពន្លឺ និងលោក ម៉ី សុខារិទ្ធ
កែសម្រួល៖ លោក សេង ផល្លី
