យោងតាមរបាយការណ៍របស់នាយកដ្ឋានគ្រប់គ្រងទឹកនៃអាជ្ញាធរជាតិអប្សរា បានឲ្យដឹងថា ក្នុងរយៈពេល៥ខែដើមឆ្នាំ២០១៩នេះ សំណង់ទ្វារទឹក , ស្ពានបេតុងចំនួន៤ទីតាំង និងការស្ដារស្ទឹងប្រវែងជិត៥ពាន់ម៉ែត្រ ត្រូវបានអាជ្ញាធរជាតិអប្សរាស្ថាបនាឡើងវិញ ក្នុងបំណងដើម្បីបម្រើផលប្រយោជន៍នានាដល់ប្រជាពលរដ្ឋនៅក្នុងមូលដ្ឋាន ក៏ដូចជាបម្រើប្រយោជន៍ដល់ដំណាំកសិកម្ម ជូនប្រជាពលរដ្ឋក្នុងតំបន់រមណីយដ្ឋានអង្គរផងដែរ ដែលសំណង់ទ្វារទឹក , ស្ពានបេតុង និងការស្ដារស្ទឹងទាំងនោះ ភាគច្រើនស្ថិតនៅក្នុងស្រុកពួក និងស្រុកអង្គរធំ។
របាយការណ៍បានបញ្ជាក់ទៀតថា សំណង់ទ្វារទឹក និងស្ពានបេតុងដែលត្រូវបានសាងសង់នោះ នៅក្នុងស្រុកពួកមាន ៖ សង់ទ្វារទឹកនៅស្ទឹកពួក ស្ថិតនៅភូមិតាទក ក្នុងឃុំពួក , សង់ទ្វារទឹកនៅភូមិល្បើក ក្នុងឃុំដូនកែវ ស្រុកពួក , សង់ស្ពានបេតុងឆ្លងកាត់ស្ទឹងពួក ស្ថិតនៅភូមិតាទក ក្នុងឃុំពួក ស្រុកពួក , ស្ដារស្ទឹងព្រះស្រុកប្រវែង ១.៥០០ម៉ែត្រ ស្ថិតនៅភូមិស្ទឹងព្រះស្រុក ក្នុងឃុំល្វា និងស្ដារស្ទឹងពួកប្រវែង ៣.២៧២ម៉ែត្រ កាត់៤ភូមិ ក្នុងឃុំពួក និង នៅក្នុងស្រុកអង្គរធំមាន ៖ សង់ស្ពានបេតុងឆ្លងប្រឡាយរំដោះទឹកជំនន់ នៅភូមិភ្លង់ ក្នុងឃុំលាងដៃ ។
ដោយឡែក បើតាមរបាយការណ៍សង្ខេបការងារប្រចាំត្រីមាសទី១ឆ្នាំ២០១៩ របស់អាជ្ញាធរជាតិអប្សរា បានឲ្យដឹងថា នាយកដ្ឋានគ្រប់គ្រងទឹកក៏បានជួសជុលសំណង់ទ្វារទឹកតាកាវថ្មី ប្រវែង ៨ម៉ែត្រ , ទទឹង៤ម៉ែត្រ និងកម្ពស់២ម៉ែត្រ និងធ្វើការជញ្ជូនដីបិទតាមជើងទេរមានទំហំ៧៨ម៉ែត្រគូបផងដែរ៕
អត្ថបទ និង រូបថត ៖ លោក ម៉ាត់ អារីហ្វីន និង លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
