ឯកឧត្តមបណ្ឌិត ពេជ សោភ័ន រដ្ឋលេខាធិការប្រចាំការ នៃក្រសួងការងារបណ្តុះបណ្តាលនិងវិជ្ជាជីវៈ បានមានប្រសាសន៍ថា វិស័យអប់រំបណ្តុះបណ្តាលបច្ចេកទេសនិងវិជ្ជាជីវៈ ហៅកាត់ថា ធីវេត ( TVET ) នេះ គឺជាវិស័យមួយដែលប្រើប្រាស់ដើម ទុន វិនិយោគខ្ពស់ និងទាមទារថវិកាច្រើន ដើម្បីធ្វើការអប់រំបណ្តុះបណ្តាលគ្រូបង្រៀនថ្មី និងចាស់ បំពាក់សម្ភារបច្ចេកទេសឧបករណ៍ថ្មីៗ សាងសង់គ្រឹះស្ថានសិក្សា និងរោងជាង ធានាដល់ការបណ្តុះបណ្តាលសិក្ខាកាម សិស្ស និង និស្សិត មានលក្ខណៈសមស្របប្រកបដោយគុណភាព ស្តង់ដារ សមត្ថភាព ដើម្បីបំពេញតម្រូវការជំនាញដែលតែងតែផ្លាស់ប្តូរយ៉ាងឆាប់រហ័ស ។
ឯកឧត្តមបណ្ឌិត ពេជ សោភ័ន មានប្រសាសន៍ទៀតថា នៅកម្ពុជា វិស័យ TVET នេះ ក៏ជួបនឹងការលំបាកជាច្រើនដោយ សារសង្គមមិនទាន់យល់ដឹងច្បាស់អំពីតម្លៃ និងអត្ថប្រយោជន៍នៃវិស័យនេះ ដែលមនុស្សក្នុងសង្គម តែងតែយល់ឃើញថា វិស័យ TVET ជាជំនាញសម្រាប់ប្រជាជនក្រីក្រ និងអ្នកគ្មានការងារធ្វើ ហើយសិស្សដែលបញ្ចប់ការសិក្សាទទួលបានការងារចំណូលទាប ហេតុនេះហើយ TVET ត្រូវការការគាំទ្រពីដៃគូរអភិវឌ្ឍន៍នានា ក្នុងការផ្លាស់ប្តូរទស្សនៈសង្គម ដើម្បីបង្កើនការចុះឈ្មោះចូលរៀនរបស់សិក្ខាកាម សិស្ស និង និស្សិត ឱ្យបានច្រើន ជាពិសេសស្ត្រី ឱ្យពួកគាត់ជ្រើសរើសជំនាញ TVET ជាជម្រើសដំបូង មិនមែនជាជម្រើសចុងក្រោយ ដូច្នេះ ដើម្បីសម្រេចបាននូវលទ្ឋផលនេះ ទាំងគ្រឹះស្ថានសាធារណៈ និងគ្រឹះស្ថានឯកជន ចាំបាច់ត្រូវសហការគ្នា ជាមួយឧស្សាហកម្ម ក្នុងការរៀបចំកម្មវិធីសិក្សាក៏ដូចជាក្នុងការលើកកម្ពស់សមត្ថភាពនៃកម្លាំងពលកម្ម ។
ឯកឧត្តម បណ្ឌិត ពេជ សោភ័ន មានប្រសាសន៍បន្ថែមទៀតថា ការបម្រែបម្រួលឥរិយាបថ នៃបដិវត្តឧស្សាហកម្ម ៤.០ វានឹងត្រូវបានលុបបំបាត់នូវការងារដែលមានកម្រៃទាប និង ការងារប្រើប្រាស់អតិពលកម្មជាច្រើនទៀត ដោយសារតែការកើនឡើងនៃគ្រឿងយន្ត និង មនុស្សយន្ត សម្រាប់ប្រើប្រាស់ជំនួសកម្លាំង ពលកម្ម ដូច្នេះគ្រឹះស្ថានបណ្តុះបណ្តាលបច្ចេកទេសនិងវិជ្ជាជីវៈ មិនមានជម្រើសអ្វី ក្រៅពីក្លាយខ្លួនជាដៃគូ និង សហការជាមួយវិស័យឧស្សាហកម្ម ដើម្បីធានាថា វិស័យបណ្តុះបណ្តាលបច្ចេកទេសនិងវិជ្ជាជីវៈ នៅតែជាវិស័យដែលដើរតួយ៉ាងសំខាន់ សម្រាប់បង្កើតពលករជំនាញ ឆ្លើ់យតបតាមតម្រូវការឧស្សាហកម្ម ទាំងក្នុងពេលបច្ចុប្បន្ន និង ទៅអនាគត ។
ឯកឧត្តមបណ្ឌិត ពេជ សោភ័ន មានប្រសាសន៍យ៉ាងដូច្នេះ ក្នុងឱកាសអញ្ជើញជាអធិបតីក្នុងពិធីបើកប្រកាសដាក់ឲ្យអនុវត្តកម្មវិធីបណ្តុះបណ្តាលវិញ្ញាបនបត្រវិជ្ជាជីវ: និងការដាក់ឲ្យអនុវត្តប្រព័ន្ឋវាយតម្លៃផ្អែកលើសមត្ថភាព និងការផ្តល់គុណវុឌ្ឍ នៅខេត្តសៀមរាប នាព្រឹកថ្ងៃទី១៧ ខែឧសភា ឆ្នាំ២០១៩នេះ ដោយមានការអញ្ជើញចូលរួមរបស់លោក ពៅ ពិសិដ្ឋ អភិបាលរងខេត្ត និង ជាតំណាងឯកឧត្ដម ទៀ សីហា អភិបាលខេត្តសៀមរាប ព្រមទាំងវត្តមានឯកឧត្តម លោកជំទាវ លោក លោកស្រី ជាថ្នាក់ដឹកនាំ នៃក្រសួងការងារបណ្តុះបណ្តាលនិងវិជ្ជាជីវៈ , មន្ទីរ អង្គភាពនានាក្នុងខេត្ត , អង្គការដៃគូអភិវឌ្ឍន៍ពាក់ព័ន្ឋនានា និងសិក្ខាកាមកំពុងសិក្សាក្នុងវគ្គបណ្តុះបណ្តាល យ៉ាងច្រើនកុះករ ៕
អត្ថបទ និង រូបថត ៖ លោក យូ វង្ស និង លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
