នៅថ្ងៃទី១៨ ខែឧសភា ឆ្នាំ២០១៩ សាលាខេត្តសៀមរាប បានរៀបចំការប្រកួតពានរង្វាន់អុកចត្រង្គ , ប៉េតង់និងមុខម្ហូបរបស់មន្ត្រីក្នុងសាលាខេត្ត ក្រោមអធិបតីភាពរបស់ឯកឧត្តម ទៀ សីហា អភិបាលខេត្ត និង ឯកឧត្តម អ៊ឹង ហឿន ប្រធានក្រុមប្រឹក្សាខេត្ត និង ដោយមានការអញ្ជើញចូលរួមពីសំណាក់ឯកឧត្តម លោកជំទាវ លោក លោកស្រី ជាសមាជិកក្រុមប្រឹក្សាខេត្ត , គណៈអភិបាលខេត្ត , នាយក នាយករងរដ្ឋបាលសាលាខេត្ត , នាយ នាយរងទីចាត់ការ , ប្រធានអង្គភាព និងមន្ត្រីរាជការក្រោមឱវាទនៃសាលាខេត្ត ។
មានប្រសាសន៍ក្នុងឱកាសនោះ ឯកឧត្តម ទៀ សីហា បានបញ្ជាក់ថា ការជួបជុំនៃមហាគ្រួសារមន្ត្រីសាលាខេត្តសៀមរាបនាថ្ងៃនេះ គឺជាការលើកទឹកចិត្តដល់មន្ត្រីរាជការទាំងអស់ ឲ្យចេះរួមសហការគ្នា សាមគ្គីគ្នា ជាគ្រួសារមន្ត្រីតែមួយ ដើម្បីបំពេញភារកិច្ចជូនជាតិមាតុភូមិ ក៏ដូចជាកិច្ចអភិវឌ្ឍន៍ខេត្តសៀមរាប កាន់តែមានភាពរីកចម្រើនឡើងថែមទៀត ហើយលទ្ធផលដែលយើងទទួលបានមកនេះ គឺផ្តើមចេញពីគោលនយោបាយឈ្នះ របស់ប្រមុខរាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន ជានាយករដ្ឋមន្ត្រី ដែលធ្វើឲ្យប្រទេសកម្ពុជាមានសុខសន្តិភាពពេញផ្ទៃប្រទេស ។
ឯកឧត្តម ទៀ សីហា មានប្រសាសន៍ទៀតថា ម្យ៉ាងទៀតការជួបជុំបងប្អូនមន្ត្រីរាជការ ទាំងមន្ត្រីចូលនិវត្តន៍នាឱកាសនេះ ក៏ជាការរំលឹកនូវវីរភាពរបស់ពូ មីង បងៗ ទាំងអស់ ដែលជារៀមច្បងបានបន្សល់ទុកនូវសមិទ្ធផលជាច្រើន ដែលជាស្នាដៃរបស់រៀមច្បងយើង សម្រាប់ជាតិមាតុភូមិ ហើយក៏ជាគំរូដ៏ល្អសម្រាប់អ្នកជំនាន់ក្រោយ បានសិក្សាស្វែងយល់ទៀតផង ដូច្នេះផ្ដើមចេញពីបញ្ហានេះ ក្រុមប្រឹក្សាខេត្ត និង អាជ្ញាខេត្ត បានរៀបចំកម្មវិធីនេះឡើង ដើម្បីបង្ហាញនូវស្មាដៃ និង ស្មារតីបញ្ញា ភាពវ័យឆ្លាតរបស់មន្ត្រីនៅតាមទីចាត់ការ និង អង្គភាព អំពីការចេះកែច្នៃប្រឌិតក្នុងការធ្វើម្ហូម ការងារកីឡា និង ការគិតពិចារណាឈ្លាសវៃរបស់មន្ត្រី ក្នុងការសម្រេចទៅលើកិច្ចការធំៗទាំងឡាយដែលខេត្តប្រគល់ជូន ។
ឯកឧត្តម ទៀ សីហា មានប្រសាសន៍បន្ថែមទៀតថា នៅឆ្នាំបន្ត យើងនឹងជ្រើសរើសនូវវិញ្ញាសារប្លែកៗទៀត ដើម្បីយកមកធ្វើការប្រកួតប្រជែង រកនូវក្រុមឆ្នើមៗ ពីមន្ត្រីនៃសាលាខេត្តសៀមរាប ហើយក៏ជាប្រពៃណីមួយ ដែលយើងជាថ្នាក់ដឹកនាំមិនអាចកាត់ផ្តាច់បានឡើង នូវភាពផ្សាភ្ជាប់ជាមួយថ្នាក់ក្រោម និង មូលដ្ឋាន ដែលជាមូលដ្ឋានគ្រឹះក្នុងការអភិវឌ្ឍន៍ប្រទេសជាតិទៅពេលអនាតគ ។
សូមបញ្ជាក់ថា ឆ្លងតាមការប្រកួតទៅតាមវិញ្ញាសារទាំងបីនេះ សម្រាប់ការប្រកួតធ្វើម្ហូប ត្រូវបានគណៈកម្មការធ្វើការវិនិច្ឆ័យទៅតាមការដាក់ពិន្ទុ ពីឯកឧត្តម លោកជំទាវ អស់លោក លោកស្រី ដែលបានភ្លក់ម្ហូបទាំងនោះ តាមរយៈសន្លឹកឆ្នោត ក្នុងចំណោមម្ហូបទាំង៦ក្រុម គឺជ័យលាភីពានរង្វាន់ប្រចាំឆ្នាំ២០១៩នេះ បានទៅក្រុមទី១ ដែលមានមុខម្ហូបឈ្មោះ បុកត្រប់ហោះ ដែលទទួលបានសន្លឹកឆ្នោតច្រើនជាងគេ ខណៈវិញ្ញាសារប្រកួតអុកចត្រង្គ និង កីឡាប៉េតង់ នៅមិនទាន់បានរកឃើញក្រុមឈ្នះនៅឡើយទេ គឺត្រូវបន្តនៅពេលសប្តាហ៍ក្រោយទៀត ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
