កញ្ចប់អាហារសម្រាប់ស្រាយបួសខែរ៉ាម៉ាឌន ចំនួន១១៥កញ្ចប់ ត្រូវបានគណៈអ៊ីម៉ាំសាសនាឥស្លាមខេត្តសៀមរាប យកទៅចែកជូនដល់បងប្អូនប្រជាពលរដ្ឋ ដែលជាសាសនិកឥស្លាមក្រីក្រនៅក្នុងខេត្តសៀមរាប ចំនួន១១៥គ្រួសារកាលពីព្រឹកថ្ងៃទី១៩ ខែឧសភា ឆ្នាំ២០១៩នេះ នៅទីកន្លែងវិហារឥស្លាម អាន់នៀក ម៉ាស់ ស្ថិតនៅភូមិស្ទឹងថ្មី សង្កាត់ស្វាយដង្គំ ដែលកញ្ចប់អាហារទាំងអស់នេះ បានមកពីការចូលរួមបរិច្ចាគពីសប្បុរសដែលជាសាសនិកឥស្លាម នៅក្នុងភូមិស្ទឹងថ្មី សង្កាត់ស្វាយដង្គំ ក្រុងសៀមរាប ។
លោក អែល សៀត អនុប្រធានសាសនាឥស្លាមខេត្តសៀមរាប បានមានប្រសាសន៍ថា គណៈអ៊ីម៉ាំសាសនាឥស្លាមខេត្តទាំងអស់ តែងតែយកចិត្តទុកដាក់ គិតគូរពីសុខទុក្ខក្នុងការរស់នៅរបស់បងប្អូននៅតាមសហគមន៍ខ្មែរឥស្លាមជានិច្ច ជាពិសេសនៅក្នុងឱកាសបួសខែរ៉ាម៉ាឌននេះផ្ទាល់តែម្តង ហើយថ្វីត្បិតកញ្ចប់អាហារស្រាយបួសនេះ មិនចែកជូនបានគ្រប់ៗគ្នាក៏ពិតមែន តែក៏អាចជួយសម្រាលដល់បងប្អូនដែលក្រីក្រ មានជីវភាពខ្វះខាតក្នុងសហគមន៍បានមួយកម្រិតដែរ។
លោក អែល សៀត បានមានប្រសាសន៍ទៀតថា ប្រទេសកម្ពុជា មានសុខសន្ដិភាព ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ក្រោមគោលនយោបាយសុខដុមបនីយកម្មថ្មីមួយទៀត ក្នុងចំណោមគោលនយោបាយសុខដុមនីយកម្មនានាជាច្រើន ទោះបីសាសនាព្រះពុទ្ធ ជាសាសនារបស់រដ្ឋ ក៏ប៉ុន្តែគោលនយោបាយសុខដុមបនីយកម្ម បានកំពុងផ្តល់សិទ្ធិសេរីភាពគ្រប់បែបយ៉ាង ជាមួយការផ្តល់ភាពកក់ក្តៅ និង ចូលរួមដោះស្រាយរាល់ទុក្ខលំបាកដល់សាសនិកនានាទៀត ក្នុងក្របខណ្ឌនៃប្រជាជាតិតែមួយ ដែលរួមរស់រួមសុខក្នុងម្លប់សន្តិភាពតែមួយ ដូច្នេះ ក្នុងនាមគណៈអ៊ីម៉ាំខេត្តសៀមរាប សូមថ្លែងអំណរគុណចំពោះសប្បុរជនម្ចាស់ជំនួយក្នុងភូមិស្ទឹងថ្មី ដែលសកម្មភាពទាំងនេះ គឺបានបង្ហាញពីក្តីស្រឡាញ់ដ៏ធំធេងបំផុតមួយ ក្នុងនាមជាសាសនិកឥស្លាមតែមួយផងដែរ ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ទ្រា ពន្លឺ និង លោក គឿន វេត
កែសម្រួលអត្ថបទ ៖ លោក លីវ សាន្ត
