នៅថ្ងៃទី១៩ ខែឧសភា ឆ្នាំ២០១៩នេះ ព្រះតេជគុណអប្បមាទោ ពៅ ផល្លី ព្រះចៅអធិការវត្តឈូកក្រសាលរស្មីមានជ័យ និង លោកឧត្តមសេនីយទោ ខេង រ៉ា មេបញ្ជាការរងនគរបាលជាតិប្រចាំភូមិភាគទី៤ និងភរិយា ព្រមទាំងបុត្រធីតា រួមទាំងក្រុមគ្រួសារញាតិមិត្តបងប្អូនក្នុងក្រុងសៀមរាប បានសហការរៀបចំពិធីដាក់បាត្រ និងវេរភត្តប្រគេនដល់ព្រះសង្ឃចំនួន៦៥អង្គ ដែលនិមន្តមកពី៤វត្ត ក្នុងស្រុកប្រាសាទបាគង និងស្រុកសូទ្រនិគម ក្នុងឱកាសឆ្លងបុណ្យវិសាខបូជា ដែលមានទីតាំងស្ថិតនៅជិតវត្តឈូកក្រសាលរស្មីមានជ័យ ក្នុងឃុំខ្នារពោធិ ស្រុកសូទ្រនិគម ខេត្តសៀមរាប។
ព្រះតេជគុណ អប្បមាទោ ពៅ ផល្លី មានថេរដិកាថា ថ្វីត្បិតតែព្រះសង្ឃរស់ដោយបាយបាត្រ និង ទទួលការឧបត្ថម្ភទំនុកបម្រុងពីទាយក ទាយិកាពីគ្រប់មជ្ឈដ្ឋានក្តី តែព្រះសង្ឃក៏អាចធ្វើ និងចែករំលែកទានប្រគេន និងជូនដល់ភិក្ខុសង្ឃផងគ្នា ព្រមទាំងគ្រហារវាសឬបថុជ្ជន ដែលជួបការលំបាកខ្វះខាត ទៅតាមលទ្ឋភាពផងដែរ ដើម្បីបំពេញបុណ្យដល់បុគ្គលខ្លួនឯងផង និងចែករំលែកអាហារភោជនទៅដល់ញាតិញោមដូចជាគ្រហស្ថដែរ ដូច្នេះការដាក់បាត្រនិងប្រគេនបច្ច័យដល់ភិក្ខុសង្ឃផងគ្នា នាឱកាសនេះ គឺដើម្បីញ៉ាំងកម្មវិធីបុណ្យវិសាខបូជានៅទីអារាមមួយនេះឱ្យកាន់តែអធិកអធម និងបង្កើនភាពស្និទ្ឋស្នាលរវាងព្រះសង្ឃនិងព្រះសង្ឃ ក៏ដូចជាពុទ្ឋបរិស័ទជិតឆ្ងាយឱ្យកាន់តែស្អិតរមួតថែមទៀត ដើម្បីរួមគ្នាទ្រទ្រង់វិស័យព្រះពុទ្ឋសាសនា ឱ្យរីកចម្រើន និងស្ថិតស្ថេរជានិរន្តរ៍ ។
លោកឧត្តមសេនីយ៍ទោ ខេង រ៉ា បានមានប្រសាសន៍ថា ក្នុងនាមជាពុទ្ឋបរិស័ទ និងដោយគោរពស្រឡាញ់និងជឿជាក់លើព្រះពុទ្ឋសាសនា លោកតែងតែប្រកាន់ខ្ជាប់នូវប្រពៃណី ទំនៀមទម្លាប់ ព្រមទាំងបានចូលរួមធ្វើបុណ្យទានទៅតាមលំអានព្រះពុទ្ឋសាសនាមិនគិតថាឆ្ងាយឬជិតឡើយ គឺធ្វើទៅតាមលទ្ឋភាព និងធនធានដែលអាចធ្វើបាន ព្រោះកម្ពុជាក្រោមការដឹកនាំរបស់សម្តចតេជោ ហ៊ុន សែន នាយករដ្ឋមន្ត្រីនៃកម្ពុជា បាននាំមកនូវសុខសន្តិភាព និងមានការអភិវឌ្ឍរីកចម្រើនលើគ្រប់វិស័យ បានបង្កលក្ខណៈងាយស្រួលដល់ប្រជាពលរដ្ឋក្នុងការធ្វើដំណើរជិតឆ្ងាយទៅធ្វើបុណ្យទានផ្សេងៗ ដោយពុំមានការភ័យខ្លាច ដែលខុសប្លែកកាលពីជាង២០ឆ្នាំមុននេះ មូលដ្ឋាននេះ នៅឆ្ងាយពីក្រុងឬទីប្រជុំជន គឺសុទ្ឋតែជាសមរភូមិប្រយុទ្ឋ។
លោក ខេង រ៉ា បញ្ជាក់ទៀតថា វិស័យពុទ្ឋចក្រនិងអាណាចក្រ ជាវិស័យដែលមិនអាចខ្វះមួយណាបានឡើយ ព្រោះថាវិស័យពុទ្ធចក្រ ក៏បានរួមចំណែកនាំមកនូវសន្តិភាព និង ការអភិវឌ្ឍស្ទើរគ្រប់វិស័យ ពិសេសវិស័យអប់រំវប្បធម៌ តាមរយៈវត្តអារាម ដែលជាទីតាំងសម្រាប់ទីពឹងពុំនាក់នៃជនគ្រប់រូបដែលត្រូវការ ជាកន្លែងសម្រាប់ជ្រកកោនរបស់ជនក្រីក្រកុមារកំព្រា និងសិស្សឥតទីពឹង ជាជម្រកសុខសាន្តរបស់ពពួកសត្វ ជាទីកន្លែងកប់ចោលនូវការទាស់ទែងគ្នា ជាកន្លែងដែលមនុស្សទាំងអស់មានភាពស្មើគ្នា ជាកន្លែងការពារសិទ្ឋិ ជាមណ្ឌលវប្បធម៌ ជាបណ្ណាល័យ និង ជាកន្លែងបង្កើតស្នាដៃនិពន្ឋរបស់ប្រជាជន ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
