ថ្លែងក្នុងពិធីទិវាជាតិនៃការចងចាំ កាលពីព្រឹកថ្ងៃទី២០ ខែឧសភា ឆ្នាំ២០១៩នេះ ឯកឧត្ដម ទៀ សីហា អភិបាលខេត្តសៀមរាប បានមានប្រសាសន៍ថា ថ្ងៃនេះ គឺជាសកម្មភាពដ៏មានអត្ថន័យយ៉ាងពិតប្រាកដ ដែលបានស្តែងឱ្យឃើញថា ទោះបីជារឿងរ៉ាវនេះ បានកន្លងផុតក្នុងអតីតកាលអស់ជាង៣០ឆ្នាំ ឬក៏៦០ឆ្នាំទៀតក៏ដោយ ប៉ុន្តែរឿងនេះគឺជារឿងឈឺចាប់ និងជាមហាសោកនាដកម្មប្រល័យពូជសាសន៍ ជាតិឯង ដែលធ្វើឱ្យបងប្អូនប្រជាពលរដ្ឋ និងយើងទាំងអស់គ្នាពុំអាចបំភ្លេចបានឡើយ ហើយបានចារទុកជាសច្ចធម៌ប្រវត្តិសាស្ត្រ ទោះបីជាជនរួមជាតិជំនាន់ក្រោយពុំបានឆ្លងកាត់ក៏ដោយ ក៏ពួកគាត់និងសិក្សាស្វែងយល់អំពីប្រវត្តិសាស្ត្រនេះ ក្នុងនាមជាកូនខ្មែរ ជាជាតិខ្មែរ ដែលមានជីដូនជីតា ឪពុកម្តាយ និងបងប្អូនរបស់ខ្លួនបានឆ្លងកាត់ប្រវត្តិសាស្ត្រដ៏ជូរចត់មួយនេះ ដូច្នេះ សូមឧទ្ទិសកុសលទាំងឡាយដែលកើតចេញពីពិធីបុណ្យរំលឹកវិញ្ញាណក្ខន្ធ បង្សុកូល រាប់បាត្រ នាពេលនេះ ជូនដល់ដួងវិញ្ញាណក្ខន្ធបុព្វការីជន និងជនរួមជាតិដែលបានចែកឋានទៅ ក្រោមរបបប្រល័យពូជសាសន៍ ប៉ុល ពត សូមឱ្យបានទៅកាន់សុគតិភពកុំបីឃ្លៀងឃ្លាតឡើយ ។
ឯកឧត្ដម ទៀ សីហា មានប្រសាសន៍ទៀតថា ក្នុងរបបកម្ពុជាប្រជាធិបតេយ្យប្រល័យពូជសាសន៍ ប៉ុល ពត អស់រយៈពេល ៣ឆ្នាំ ៨ខែ និង២០ថ្ងៃ ( ១៧.០៤.១៩៧៥ – ០៧.០១.១៩៧៩ ) ដែលយើងទាំងអស់គ្នាស្ទើរតែមិនអាចពិពណ៌នាអំពីការឈឺចាប់ខ្លោចផ្សា ដែលពោរពេញទៅដោយសមុទ្រឈាម និងទឹកភ្នែកនោះបានឡើយ ហើយក្នុងរយៈពេលជិត៤ឆ្នាំ នៃរបបខ្មែរក្រហមនេះ ប្រជាជនកម្ពុជាទាំងមូលបានរស់នៅក្នុងគុកឥតជញ្ជាំងដ៏ជូរចត់ ទទួលរងនៅទុក្ខទារុណកម្មគ្រប់បែបយ៉ាង និងសោកនាដកម្មដ៏ធំធេងបំផុតសម្រាប់មនុស្សជាតិ និងសង្គមជាតិទាំងមូល តាមរយៈការបាត់បង់នូវការអភិវឌ្ឍជាតិ ការរស់នៅដូចសត្វធាតុ ការនិរាសព្រាត់ប្រាសគ្រួសារ សាច់សារលោហិត ប្តីប្រពន្ធ បងប្អូន កូនចៅ គួរឲ្យសោកសង្រែង ជាពិសេសការកាប់សម្លាប់ជាតិសាសន៍ឯង ពលរដ្ឋខ្លួនឯង យ៉ាងព្រៃផ្សៃជាទីបំផុត ប្រមាណជាងបីលាននាក់ ដូចមានគំនរឆ្អឹងសពដែលតម្កល់ទុកនៅចំពោះមុខយើងទាំងអស់គ្នា ក្នុងវត្តទេពពោធិវង្ស នេះជាសក្ខីភាពយ៉ាងពិតប្រាកដ នៃការបាត់បង់ជីវិតដ៏អយុត្តិធម៌ នៃជនរួមជាតិកម្ពុជា ទាំងក្មេង ចាស់ ប្រុស ស្រី ព្រះសង្ឃ និង ជនជាតិ ។
ឯកឧត្ដម ទៀ សីហា មានប្រសាសន៍ទៀតថា ក្មួយៗដែលកំពុងមានវត្តមាននៅទីនេះ ថ្ងៃនេះ ពិតជាមិនបានឆ្លងកាត់នូវរបបប្រល័យពូជសាសន៍ជាតិឯងនោះទេ ប៉ុន្តែក្មួយៗ ពិតជាបានដឹង បានឮ តាមរយៈឪពុកម្ដាយ ជីដូនជីតា និង ចាស់ព្រឹទ្ធាចារ្យ ដែលធ្លាប់បានរស់នៅ និង ឆ្លងកាត់ក្នុងរបបនោះ ដូច្នេះ តាមរយៈនេះ សូមអំពាវនាវដល់ក្មួយៗទាំងអស់ ត្រូវចងចាំជានិច្ចចំពោះរបបកម្ពុជាប្រជាធិបតេយ្យប្រល័យពូជសាសន៍ ប៉ុល ពត នេះ ហើយយើងត្រូវរួមដៃគ្នារាជរដ្ឋាភិបាលកម្ពុជា ទប់ស្កាត់ការវិលត្រឡប់មកវិញនៃរបបប្រល័យពូជសាសន៍នេះ ខណៈដែលយើងទាំងអស់គ្នា កំពុងរស់នៅក្រោមដំបូលសន្តិភាព ក្រោមនយោបាយ ឈ្នះឈ្នះ និងគោលនយោបាយដ៏ត្រឹមត្រូវរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បាននឹងកំពុងជំរុញនូវការអភិវឌ្ឍប្រទេសឲ្យមានការរីកចម្រើនលើគ្រប់វិស័យ ទាំងពុទ្ធចក្រ និងអាណាចក្រ ឆ្ពោះទៅកាន់វឌ្ឍនភាព កិត្យានុភាពជាតិ លើឆាកអន្តរជាតិជាបន្តបន្ទាប់ប្រកបដោយមោទនភាព តាមរយៈការអភិវឌ្ឍហេដ្ឋារចនាសម្ព័ន្ធផ្លូវថ្នល់ ស្ពាន សាលារៀន មន្ទីរពេទ្យ មណ្ឌលសុខភាព វត្តអារាម ប្រព័ន្ធធារាសាស្ត្រ ប្រព័ន្ធទឹកស្អាត អគ្គិសនី និងការទាក់ទាញវិនិយោគលើវិស័យដូចជា៖ កសិឧស្សាហកម្ម សិប្បកម្ម សហគ្រាស និងសំណង់នានា ។
សូមបញ្ជាក់ថា នៅព្រឹកថ្ងៃទី២០ ខែឧសភា ឆ្នាំ២០១៩នេះ រដ្ឋបាលខេត្តសៀមរាប បានរៀបចំប្រារព្ធទិវាជាតិនៃការចងចាំ ព្រមទាំងមានពិធីបង្សុកូល និងរាប់បាត្រព្រះសង្ឃចំនួន៧០អង្គ នៅក្នុងបរិវេណវត្តទេពពោធិវង្ស ស្ថិតក្នុងភូមិត្រពាំងសេះ សង្កាត់គោកចក ក្រុងសៀមរាប ក្រោមអធិបតីភាពឯកឧត្តម ទៀ សីហា អភិបាលខេត្តខេត្តសៀមរាប និង ជាតំណាងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងារថ្នាក់ជាតិចុះមូលដ្ឋានខេត្តសៀមរាប , ឯកឧត្តមអ្នកឧកញ៉ា សៀង ណាំ តំណាងរាស្ត្រមណ្ឌលខេត្តសៀមរាប និង ឯកឧត្តម អ៊ឹង ហឿន ប្រធានក្រុមប្រឹក្សាខេត្ត ដោយមានការនិមន្ត និង អញ្ជើញពីសំណាក់ព្រះសង្ឃគង់នៅក្នុងវត្តមួយចំនួននៃក្រុងសៀមរាប ឯកឧត្ដម លោកជំទាវ លោក លោកស្រី ជាសមាជិកក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំនិងមន្ត្រីរាជការនៃមន្ទីរ អង្គភាពនានាក្នុងខេត្ត ក្រុមប្រឹក្សាក្រុងសៀមរាប គណៈអភិបាលក្រុងសៀមរាប ក្រុមប្រឹក្សាសង្កាត់ក្នុងក្រុងសៀមរាប លោកគ្រូអ្នកគ្រូ សិស្សានុសិស្ស និង បងប្អូនប្រជាពលរដ្ឋក្នុងក្រុងសៀមរាប សរុបចំនួនជាងពីរពាន់នាក់ ៕
អត្ថបទ : លោក លីវ សាន្ត
រូបថត : សហការី
