លោក សុខ សីហា ប្រធានមន្ទីរប្រៃសណីយ៍និងទូរគមនាគមន៍ខេត្តសៀមរាប មានប្រសាសន៍ថា ឆ្លងតាមកិច្ចប្រជុំមួយកាលពីពេលថ្មីៗកន្លងមក រវាងក្រុមការងារចម្រុះនៃរដ្ឋបាលខេត្តសៀមរាប និង ប្រតិបត្តិករទូរគមនាគមន៍នានា សម្រាប់ត្រៀមបន្តអនុវត្តគម្រោងបន្ទាប់ទៀត ដើម្បីកាត់ខ្សែកាបអាកាសមកប្រើខ្សែកាប្លិ៍អុបទិកក្រោមដីវិញ ហើយកិច្ចប្រជុំនេះ បានសម្រេច ថានឹងចាប់ផ្តើមអនុវត្តគម្រោងទី១ លើកំណាត់ផ្លូវទី៩ ចាប់ពីថ្ងៃទី២៧ ខែឧសភា ឆ្នាំ២០១៩តទៅ ដោយធ្វើការកាត់ទម្លាក់ខ្សែ កាបអាកាស នៅផ្លូវអមសងខាងស្ទឹងសៀមរាប ចាប់ពីចំណុច ស្ពាននាគ ឆ្ពោះទៅហួសស្ពានអាងក្រពើក្នុងក្រុងសៀមរាប ហើយសម្រាប់ការកាត់ខ្សែកាបអាកាសមកប្រើខ្សែកាបអុបទិកក្រោម ដីនេះ គឺពុំធ្វើឲ្យប៉ះពាល់ដល់ទ្រព្យសម្បត្តិសាធារណៈទេ លើសពីនេះគឺមានតែជួយកាត់បន្ថយនូវហានិភ័យផ្សេងៗ ដូចជាទុស្សេខ្សែភ្លើង ឬ ពេលមានភ្លៀងខ្យល់ អាចបាក់មែកឈើលើធ្វើឲ្យដាច់ធ្លាក់រញ៉េរញ៉ៃ និងកាត់បន្ថយគ្រោះថ្នាក់ពេលយប់ជាយថា ហេតុ ដែលអាចបង្កគ្រោះថ្នាក់ដល់អ្នកធ្វើដំណើរ ជិះកង់ ជិះម៉ូតូ ឬរថយន្ត ជាដើម បើទាក់ខ្សែជាដើម។
លោក សុខ សីហា បានបញ្ជាក់ទៀតថា សម្រាប់ប្រតិបត្តិករទូរគមនាគមន៍ គឺពួកគាត់មានការខាតបង់នូវពេលដែលកាត់ខ្សែបណ្តាញរបស់គាត់ តែទោះជាយ៉ាងនេះក្តី ក៏យើងត្រូវគិតឲ្យបានវែងឆ្ងាយ ដោយត្រូវតែអនុវត្ត គឺដើម្បីទីក្រុង និងខេត្តរបស់យើងទាំងអស់គ្នា ព្រោះថាខេត្តសៀមរាបជាខេត្តទាក់ទាញអ្នកទេសចរ ដ៏សំខាន់របស់ប្រទេសកម្ពុជា ហើយត្រូវបានរាជរដ្ឋា ភិបាលយកចិត្តទុកដាក់ខ្ពស់ ក្នុងនោះខេត្តសៀមរាប ត្រៀមប្រែក្លាយទៅជាទីក្រុងវៃឆ្លាត(Smart city) ក្នុងចំណោម៣ក្រុងក្នុងប្រទេសកម្ពុជា ដូច្នេះតាមរយៈនេះ សូមអំពាវនាវដល់បងប្អូនប្រជាពលរដ្ឋ ដែលមានលំនៅដ្ឋាននៅអមសងខាងតាមបណ្តោយដងស្ទឹងសៀមរាប និង ដែលកំពុងប្រើប្រាស់បណ្តាញខ្សែកាបនានា មេត្តាអធ្យាស្រ័យ និងយោគយល់ ព្រោះការកាត់ទម្លាក់ខ្សែកាបអាកាសនេះ អាចនឹងមានការរអាក់រអួលដល់ការប្រើប្រាស់ នៅពេលក្រុមការងារអនុវត្តតាមគម្រោងផែនការ ហើយប្រតិបត្តិករនៃបណ្តាក្រុមហ៊ុនខ្សែកាបនានា នឹងភ្ជាប់ប្រព័ន្ឋប្រើប្រាស់ក្រោមដីជូនបងប្អូនវិញ ។
សូមបញ្ជាក់ថា កន្លងមក ក្រុមការងារចម្រុះបានចុះកាត់ខ្សែកាបអាកាស បានចំនួន៨ផ្លូវហើយ ក្នុងចំណោមផ្លូវទាំង១១ក្នុងគម្រោងជំហានទី១ សរុបប្រវែង ២៨,៤៥ គីឡូម៉ែត្រ ដែលបានចាប់អនុវត្តកាលពីពាក់កណ្តាលខែសីហា ឆ្នាំ២០១៨ មក ដោយយោងទៅតាមសេចក្តីជូនដំណឹងលេខ ៥៣៣ ស.ជ.ណ ចុះថ្ងៃទី១១ ខែឧសភា ឆ្នាំ២០១៨ ស្តីពីការរៀបចំសោភ័ណភាព សណ្តាប់ធ្នាប់ និងរបៀបរៀបរយសាធារណៈបណ្តាញខ្សែអាកាសក្នុងក្រុងសៀមរាប ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
