នៅព្រឹកថ្ងៃទី២១ ខែឧសភា ឆ្នាំ២០១៩ នេះ សាខាកាកបាទក្រហមកម្ពុជាខេត្តសៀមរាប បានទទួលអំណោយសប្បុរសធម៌ពីរ៉ូតារីជប៉ុន រួមមានអង្ករចំនួន០១តោន និង ភួយចំនួន២០០ ដែលផ្តល់តាមរយៈលោកស្រី អា ណា ប្រធានអង្គររ៉ូតារីក្លីប ក្រោមវត្តមានរបស់លោក ចៅ ម៉ៅមុន្នី សមាជិកគណៈកម្មាធិការសាខា និងជាតំណាងឯកឧត្តម ឯកឧត្តម ទៀ សីហា អភិបាលខេត្ត និង ជាប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ដោយមានការចូលរួមពីសំណាក់លោក លោកស្រី ជាមន្ត្រីប្រតិបត្តិសាខា និង សប្បុរសជនជនជាតិជប៉ុនជាច្រើនរូប ។
បើតាមការបញ្ជាក់របស់តំណាងរ៉ូតារីក្លឹបជប៉ុន បានឲ្យដឹងថា រ៉ូតារីក្លឹប តែងតែបានចូលរួមជាមួយចលនាមនុស្សធម៌ កាកបាទក្រហមកម្ពុជា តាមរយៈអង្គររ៉ូតារីក្លឹបដោយផ្ទាល់ជាមួយសាខាកាកបាទក្រហមកម្ពុជាខេត្តសៀមរាប នៅតាមមូលដ្ឋាន ដែលប្រជាពលរដ្ឋទទួលរងគ្រោះដោយគ្រោះធម្មជាតិ អគ្គិភ័យ ចាស់ជរា ពិការ កុមារកំព្រា រួមទាំងស្ត្រី និងទារក ដូច្នេះថ្ងៃនេះ ជាសក្ខីភាពមួយដែលក្រុមរ៉ូតារីជប៉ុន ក៏បាននាំយកអំណោយសប្បុរសធម៌ ក្នុងការចូលរួមជាមួយសកម្មភាពនៃចលនាកាកបាទក្រហមកម្ពុជា សម្រាប់ជួយសង្គ្រោះប្រជាពល រដ្ឋរងគ្រោះ ដែលកំពុងជួបនូវទុក្ខលំបាក ហើយរ៉ូតារីជប៉ុន នៅតែបន្តចូលរួមក្នុងកិច្ចសហការជាមួយសាខាកាកបាទក្រហមខេត្តសៀមរាបបន្តទៀត ។
លោក ចៅ ម៉ៅមុន្នី មានប្រសាសន៍ថា ក្នុងនាមឯកឧត្តម ឯកឧត្តម ទៀ ក៏ដូចជាប្រជាពលរដ្ឋរងគ្រោះក្នុងខេត្តសៀមរាប ខ្ញុំសូមសម្តែងនូវអំណរគុណដល់ទឹកចិត្តដ៏សប្បុរសធម៌ របស់អស់បុគ្គលិករ៉ូតារីជប៉ុន ដែលមានទឹកចិត្តដ៏មនុស្សធម៌ ចំពោះបងប្អូនប្រជាពលរដ្ឋកម្ពុជាកំពុងជួបការលំបាក និងជនងាយរងគ្រោះ ដែលមានជីវភាពខ្វះខាតក្រីក្រ ដូច្នេះកាយវិកាដ៏មនុស្សធម៌នេះ គឺជាការចូលរួមក្នុងសកម្មភាពកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន ។
ព័ត៌មានជាតិ ថ្មីៗ
លោកបានបញ្ជាក់ទៀតថា ការបរិច្ចាកនូវធនធានជាស្បៀងអាហារ និង សម្ភារ ក្នុងស្មារតីលើកកម្ពស់ចលនាមនុស្សធម៌របស់ក្រុមអង្គររ៉ូតារីក្លឹប និង រ៉ូតារីជប៉ុន ចូលរួមជាមួយសាខាកាកបាទក្រហមកម្ពុជាខេត្ត ដើម្បីមានលទ្ធភាពជួយដល់ក្រុមគ្រួសារ និង ជនរងគ្រោះដោយគ្រោះមហន្តរាយនូវគ្រោះធម្មជាតិនៅតាមបណ្តាក្រុង ស្រុក ក្នុងខេត្តសៀមរាប ហើយអំណោយទាំងនេះ សាខាកាកបាទក្រហមកម្ពុជាខេត្ត នឹងយកទៅប្រើប្រាស់ផ្តល់ជូនដល់ដៃបងប្អូនរងគ្រោះ នៅពេលដែលមានកើតគ្រោះមហន្តរាយណាមួយនៅក្នុងខេត្តសៀមរាប ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
