នាព្រឹកថ្ងៃទី២០ ខែឧសភា ឆ្នាំ២០១៩ ម្សិលមិញនេះ រដ្ឋបាលស្រុកសូទ្រនិគម បានរៀបចំប្រារព្ធទិវាជាតិនៃការចងចាំ ២០ឧសភា នៅក្នុងបរិវេណវត្តប្រាសាទបន្ទាយស្រី ស្ថិតក្នុងភូមិបន្ទាយស្រី ឃុំដំដែក ស្រុកសូទ្រនិគម ក្រោមអធិបតីភាពឯកឧត្តម ប៊ូ ផាន់សារី ប្រធានក្រុមការងារថ្នាក់ជាតិចុះជួយស្រុកសូទ្រនិគម ដោយមានការនិមន្ត និង អញ្ជើញចូលរួមពីសំណាក់ព្រះសង្ឃ លោក លោកស្រី ជាប្រធាននិងសមាជិកក្រុមប្រឹក្សាស្រុក គណៈអភិបាលស្រុក មន្ត្រីសាលាស្រុក មន្ត្រីរាជការនៃការិយាល័យអង្គភាពនានាជុំវិញស្រុក ក្រុមប្រឹក្សាឃុំ មេភូមិ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋចូលរួមយ៉ាងច្រើនកុះករ ។
ឯកឧត្តម ប៊ូ ផាន់សារី មានប្រសាសន៍ថា ក្នុងរបបកម្ពុជាប្រជាធិបតេយ្យប្រល័យពូជសាសន៍ ប៉ុល ពត អស់រយៈពេល ៣ឆ្នាំ ៨ខែ និង២០ថ្ងៃ ( ១៧.០៤.១៩៧៥ – ០៧.០១.១៩៧៩ ) ដែលយើងទាំងអស់គ្នាស្ទើរតែមិនអាចពិពណ៌នាអំពីការឈឺចាប់ខ្លោចផ្សា ដែលពោរពេញទៅដោយសមុទ្រឈាម និងទឹកភ្នែកនោះបានឡើយ ប្រជាជនកម្ពុជាទាំងមូលបានរស់នៅក្នុងគុកឥតជញ្ជាំងដ៏ជូរចត់ ទទួលរងនៅទុក្ខទារុណកម្មគ្រប់បែបយ៉ាង និងសោកនាដកម្មដ៏ធំធេងបំផុតសម្រាប់មនុស្សជាតិ និងសង្គមជាតិទាំងមូល តាមរយៈការបាត់បង់នូវការអភិវឌ្ឍជាតិ ការរស់នៅដូចសត្វធាតុ ការនិរាសព្រាត់ប្រាសគ្រួសារ សាច់សារលោហិត ប្តីប្រពន្ធ បងប្អូន កូនចៅ គួរឲ្យសោកសង្រែង ជាពិសេសការកាប់សម្លាប់ជាតិសាសន៍ឯង ពលរដ្ឋខ្លួនឯង យ៉ាងព្រៃផ្សៃជាទីបំផុត ។
ឯកឧត្តម ប៊ូ ផាន់សារី មានប្រសាសន៍ទៀតថា យើងទាំងអស់គ្នាពុំអាចបំភ្លេចបានឡើយ ហើយបានចារទុកជាសច្ចធម៌ប្រវត្តិសាស្ត្រ ទោះបីជាជនរួមជាតិជំនាន់ក្រោយពុំបានឆ្លងកាត់ក៏ដោយ ក៏ពួកគាត់និងសិក្សាស្វែងយល់អំពីប្រវត្តិសាស្ត្រនេះ ក្នុងនាមជាកូនខ្មែរ ជាជាតិខ្មែរ ដែលមានជីដូនជីតា ឪពុកម្តាយ និងបងប្អូនរបស់ខ្លួនបានឆ្លងកាត់ប្រវត្តិសាស្ត្រដ៏ជូរចត់មួយនេះ ហើយតាមរយៈនៃការរៀបចំប្រារព្ធទិវាជាតិនៃការចងចាំនៅថ្ងៃនេះ សូមឧទ្ទិសកុសលទាំងឡាយដែលកើតចេញពីពិធីបុណ្យរំលឹកវិញ្ញាណក្ខន្ធ បង្សុកូល រាប់បាត្រ នាពេលនេះ ជូនដល់ដួងវិញ្ញាណក្ខន្ធបុព្វការីជន និងជនរួមជាតិដែលបាន ចែកឋានទៅ ក្រោមរបបប្រល័យពូជសាសន៍ ប៉ុល ពត សូមឱ្យបានទៅកាន់សុគតិភពកុំបីឃ្លៀងឃ្លាតឡើយ ។
ឯកឧត្តម ប៊ូ ផាន់សារី មានប្រសាសន៍បន្ថែមទៀតថា យើងទាំងអស់គ្នានឹងប្រែក្លាយកំហឹង ពីការកាប់សម្លាប់ប្រជាជនជិត៣ លាននាក់ក្នុងរបបដ៏ឃោឃៅប្រល័យពូជសាសន៍ មកជាការចងចាំទុកនៅក្នុងចិត្ត និងប្តេជ្ញាចិត្តរួមគ្នាឱ្យបានកាន់តែខ្លាំងក្លាឡើងថែមទៀត ក្នុងការកសាងប្រទេសជាតិឱ្យកាន់តែមានភាពរីកចម្រើនទ្វេដងឡើង ខណៈដែលយើងទាំងអស់គ្នា កំពុងរស់នៅក្រោមដំបូលសន្តិភាព ក្រោមនយោបាយ ឈ្នះឈ្នះ និង គោលនយោបាយដ៏ត្រឹមត្រូវរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បាននឹងកំពុងជំរុញនូវការអភិវឌ្ឍប្រទេសឲ្យមានការរីកចម្រើនលើគ្រប់វិស័យ ទាំងពុទ្ធចក្រ និងអាណាចក្រ ឆ្ពោះទៅកាន់វឌ្ឍនភាព កិត្យានុភាពជាតិ លើឆាកអន្តរជាតិជាបន្តបន្ទាប់ប្រកបដោយមោទនភាព ៕
អត្ថបទ និង រូបថត ៖ រដ្ឋបាលស្រុកសូទ្រនិគម
កែសម្រួលអត្ថបទ ៖ លោក លីវ សាន្ត
