ស្ត្រីវ័យ៤៧ឆ្នាំ បានស្លាប់បានស្លាប់នៅនឹងកន្លែង បន្ទាប់ពីដាក់សេរ៉ូម នៅផ្ទះគ្រូពេទ្យជនបទម្នាក់ ស្ថិតនៅក្នុងភូមិអន្លង់ព្រីងលើ ឃុំអន្លង់សំណរ ស្រុកជីក្រែង ខេត្តសៀមរាប។
ករណីនេះ បានកើតឡើងនៅវេលាម៉ោង១៥និង០០នាទី ថ្ងៃទី២០ ខែឧសភា ឆ្នាំ២០១៩ តាមការឲ្យដឹងពីលោកវរសេនីយ៍ឯក សុខ សុទ្ធាវុទ្ធ អធិការនគរបាលស្រុកជីក្រែង និង លោកវេជ្ជបណ្ឌិត អ៊ិន ឆបឆរត្ន័ គ្រូពេទ្យកោសល្យវិច្ច័យ បានឲ្យដឹងថា ករណីនេះ មិនមែនជាករណី ឃាតកម្មឡើយ ដោយសារតែអ្នកជំងឺ សភាពជំងឺធ្ងន់ធ្ងរពេក ទើបធ្វើឲ្យស្ទះសសៃឈាម មិនអាចយកទៅចិញ្ចឹមបេះដូងបាន។
ករណីនេះត្រូវបានសមត្ថកិច្ច បានអះអាងថា អ្នកគ្រូពេទ្យភូមិ ឈ្មោះ មិន វឌ្ឍណា អាយុ៣១ឆ្នាំ ជាពេទ្យមធ្យម បម្រើការងារនៅមណ្ឌលសុខភាពស្រុកជីក្រែង ខេត្តសៀមរាប បានប្រឹងប្រែងជួយសង្គ្រោះ អ្នកជំងឺដែរ តែដោយអ្នកជំងឺ មានសភាពធ្ងន់ធ្ងរពេក ទើបបញ្ជូន មកឲ្យគ្រូពេទ្យជួយសង្គ្រោះ។ ភ្លាមៗនោះ គ្រូពេទ្យក៏ត្រួតពិនិត្យ រួចក៏បានដាក់សេរ៉ូមប្រៃ ជួយសង្គ្រោះបឋមសិន រួចក៏ទូរស័ព្ទហៅ រថយន្តសង្គ្រោះ ដើម្បីនាំទៅពេទ្យបង្អែកខេត្តសៀមរាប។ ប៉ុន្តែដាក់សេរ៉ូមបានតែមួយសន្ទុះ អ្នកជំងឺក៏ស្លាប់តែម្តង។
សូមជម្រាបថា អ្នកជំងឺដែលបានស្លាប់ ឈ្មោះ លាង វន ភេទស្រី អាយុ៤៧ឆ្នាំ នៅភូមិតាគឹមលើ ឃុំអន្លង់សំណរ ស្រុកជីក្រែង ខេត្តសៀមរាប បន្ទាប់ពីសមត្ថកិច្ច ធ្វើកោសល្យវិច្ច័យរួចហើយនោះ សាកសពត្រូវបានប្រគល់ទៅឲ្យ ក្រុមគ្រួសារចាត់ចែង ធ្វើបុណ្យតាមប្រពៃណី៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក សេង ផល្លី
