នារសៀលថ្ងៃទី ២១ខែ ឧសភា ឆ្នាំ២០១៩នេះ ប្រជាពលរដ្ឋ១០០គ្រួសារ និង សិស្សក្រីក្រចំនួន ១៦០នាក់ បានទទួលអំណោយពីសមាគមរ៉ូតារីក្លឹបអង្គរ រួមនិង រ៉ូតារីជប៉ុន, តៃវ៉ាន់ និង កូរ៉េ តាមរយៈសាខាកាកបាទក្រហមកម្ពុជាខេត្តសៀមរាប ក្រោមវត្តមានចូលរួមរបស់លោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមកម្ពុជា តំណាងឯកឧត្តមប្រធានគណៈកម្មាធិការសាខាកាកបាទក្រហមកម្ពុជាខេត្ត ដោយមានការចូលពីអស់លោក លោកស្រីថ្នាក់ដឹកនាំមន្ទីរ អាជ្ញាធរស្រុក ឃុំ រួមទាំងប្រតិភូ អង្គការរ៉ូតារីអន្តរជាតិផងដែរ ។
លោកស្រី ម៉ន នីរង្សី អភិបាលនៃគណៈអភិបាលស្រុកក្រឡាញ់បានធ្វើការបញ្ជាក់អំពីស្ថានភាពភូមិសាស្ត្រ និងជីវភាពរស់នៅរបស់ប្រជាពលរដ្ឋទូទាំងស្រុករួចមក លោកស្រីអាណា ហ្សៀក ប្រធានអង្គររ៉ូតារីក្លឹមប្រចាំខេត្តសៀមរាប និង លោក តូស៊ីយ៉ា អ៊ូអឺបា ប្រធានតាកាតស៊ូគិ អ៊ិស រ៉ូតារីក្លឹប អូសាកាជប៉ុន និង ជាតំណាងអង្គការរ៉ូតារីក្លឹប តៃវ៉ាន់ និង កូរ៉េ បានមានចំណាប់អារម្មណ៍ ដោយបានសម្តែងការអាណិតអាសូរចំពោះ ប្រជាពលរដ្ឋ និង សិស្សានុសិស្សកម្ពុជា ដែលមានការខ្វះខាត ។
លោកស្រី អាណា និង លោក អ៊ូអឺបា ក៏បានបញ្ជាក់ថា ជាការលើកកម្ពស់សកម្មភាព គម្រោងអនាម័យទឹកស្អាតក្នុងសាលារៀន នៅខេត្តសៀមរាប ក្នុងគោលបំណងធ្វើឲ្យសិស្សទាំងអស់ ទទួលបានទឹកមានសុវត្ថិភាព សម្រាប់ទទួលទាន និង ប្រើប្រាស់បន្ទប់ទឹក ឲ្យបានល្អប្រសើរជាងមុន ។ ម្យ៉ាងទៀតគម្រោងនេះ ត្រូវមានកិច្ចសហការពីរ៉ូតារីក្លឹបជប៉ុន , តៃវ៉ាន់ និង កូរ៉េ រួមទាំងអង្គររ៉ូតារីក្លឹបប្រចាំកម្ពុជា ក្នុងហិរញ្ញប្បទាន ប្រមាណ ១០០ពាន់ដុល្លាអាមេរិក ។ ដូច្នេះទឹកស្អាត និង អនាម័យ ជាបញ្ហាចម្បងនៅកម្ពុជា មានទឹកមានដី និង បរិស្ថានគ្មានអនាម័យជា មូលហេតុបង្កឲ្យមានជម្ងឺ ។
ជាមួយគ្នានោះលោកជំទាវ ទាង អេង ទៀ សីហា ក៏បានសំណេះសំណាលដោយសម្តែងនូវអំណរគុណដល់ទឹកចិត្តដ៏សប្បុរសធម៌ របស់សមាគមអង្គររ៉ូតារីក្លឹប រួមនិងរ៉ូតារីក្លឹបជប៉ុន តៃវ៉ាន់ និង កូរ៉េ ដែលបានចូលរួមយ៉ាងសកម្ម ក្នុងវិស័យមនុស្សធម៌ អប់រំ សុខាភិបាល និង ទឹកស្អាត នៅខេត្តសៀមរាប ដែលសបញ្ជាក់ពីទឹកចិត្តដ៏មនុស្សធម៌ ចំពោះបងប្អូនប្រជាពលរដ្ឋកំពុងជួបការលំបាក និង ជនងាយរងគ្រោះ មានជីវភាពខ្វះខាតក្រីក្រ ។
លោកជំទាវក៏បានគូសបញ្ជាក់ថា ដោយតម្រូវការ ក្នុងការជួយសង្គ្រោះបងប្អូនរងគ្រោះ សាខាកាកបាទក្រហមខេត្ត ក៏បានធ្វើការអំពាវនាវដល់សប្បុរសជនដែលមានសណ្តានចិត្តសប្បុរសធម៌ ក្នុងការបរិចាកនូវធនធាន ជាស្បៀងអាហារ សម្ភារៈ ចូលរួមជាមួយសាខាកាកបាទក្រហមខេត្ត ដើម្បីមានលទ្ធភាព ជួយដល់គ្រួសារជនរងគ្រោះ នៅតាមបណ្តាមូលដ្ឋានទូទាំងខេត្តសៀមរាប ។
លោកជំទាវ ទាង អេង ទៀ សីហា ក៏បានគូសបញ្ជាក់ថា ការបរិចាកនូវធនធានជាស្បៀងអាហារ សម្លៀកបំពាក់ ដល់បងប្អូនសិស្សានុសិស្ស ក្នុងស្មារតីលើកកម្ពស់ចលនាមនុស្សធម៌ របស់អង្គររ៉ូតារីក្លឹម និង រ៉ូតារីក្លឹបជប៉ុន , តៃវ៉ាន់ និង កូរ៉េ ដែលបានចូលរួមជាមួយសាខាកាកបាទក្រហមខេត្ត ដើម្បីមានលទ្ធភាពជួយដល់ក្រុមគ្រួសារ និង ជនរងគ្រោះដោយគ្រោះមហន្តរាយនូវគ្រោះធម្មជាតិនៅតាមបណ្តាក្រុង ស្រុកក្នុងខេត្ត ។ ម្យ៉ាងទៀតថ្ងៃនេះបងប្អូនប្រជាពលរដ្ឋ និង សិស្សានុសិស្ស ក្នុងឃុំកំពុងថ្កូវ ស្រុកក្រឡាញ់ ដែលបានទទួលអំណោយជាស្បៀង សម្លៀកបំពាក់ និង ផើងចម្រោះទឹកស្អាត រួមទាំងសិស្សានុសិស្ស ត្រូវបានទទួលអគារចម្រោះទឹកស្អាត ក្នុងសាលាបឋមសិក្សាកំពុងថ្កូវ និង ភួយសម្រាប់ប្រើប្រាស់ទៀតផង ។
ក្នុងនោះដែរលោកជំទាវក៏បានធ្វើការផ្តាំផ្ញើ ដល់ប្រជាពលរដ្ឋ និង សិស្សានុសិស្សទាំងអស់ ត្រូវចូលរួមសម្អាតនូវបរិស្ថានជុំវិញខ្លួន និង មុនពេលបរិភោគអាហារត្រូវតែលាងដៃសម្អាតនឹងសាប៊ូ ព្រមទាំងទទួលទាននូវទឹកសុវត្ថិភាព និងមានអនាម័យនោះ ជីវិតសុខភាពយើង ត្រូវបានលើកកម្ពស់ និង មានអនាគតភ្លឺថ្លា ។ ម្យ៉ាងទៀតដោយការបម្រែបម្រួលអាកាសធាតុនៃភពផែនដី សូមបងប្អូនយកចិត្តទុកដាក់ ចំពោះកូន តូចៗរបស់ខ្លួន កុំឲ្យមានជម្ងឺសង្កាត់ ចំណីចំណុកផ្សេងៗ សំខាន់ចំពោះភ្លើងផ្សែង ព្រមទាំងធ្វើការដាំដុះនូវដំណាំរួមផ្សំ ចិញ្ចឹនសត្វ ដើម្បីផ្គត់ផ្គង់ទ្រទ្រង់ជីវភាពក្រុមគ្រួសារ ព្រមទាំងត្រៀមលក្ខណៈនូវឧបករណ៍កសិកម្ម ក្នុងការភ្ជួររាស់ ព្រោះថា រដូវវស្សានឹងចូលមកដល់ហើយ ។
ក្នុងនោះសិស្សម្នាក់ ទទួលបានភួយ ១ ,ប្រជាពលរដ្ឋ មួយគ្រួសារទទួលបាន អង្ករ ២៥គក្រ រួមទាំងសម្លៀកបំពាក់ផងដែរ ។ អំណោយអង្ករក្រោមការឧបត្ថម្ភរបស់ អង្គររ៉ូតារីក្លឹម , រ៉ូតារីក្លឹបជប៉ុន និង លោក Clement Ang Woon Teng ចំនួន ៥ពាន់៥០០គក្រ, និង អង្គររ៉ូតារីក្លឹមឧបត្ថម្ភ ភួយ និង ក្រុមហ៊ុន DHL Express Cambodia LTD បានឧបត្ថម្ភសម្លៀកបំពាក់ផងដែរ ។ឆ្លៀតឱកាសនោះដែរលោកជំទាវ និង ប្រតិភូបានចុះត្រួតពិនិត្យ ការដ្ឋានសាងសង់ចម្រោះទឹកស្អាត ក្នុងសាលារៀន ព្រមទាំងបានធ្វើការណែនាំដល់ ក្រុមជាងឲ្យយកចិត្តទុកដាក់ខ្ពស់ ក្នុងការសាងសង់ឲ្យបានត្រឹមត្រូវទៅតាមស្តង់ដារបច្ចេកទេសសំណង់ ដើម្បីធានាបានក្នុងការប្រើប្រាស់បានយូរអង្វែងទៀតផង ៕
