ក្រោយពីការភ្ជួរ និងព្រោះគ្រាប់ស្រូវអស់រយៈពេល៣ជុំរួចមក ព្រាហ្មណ៍ ព្រះរាជ គ្រូបុរោហិត បានធ្វើពិធីសូត្រមន្តប្រោសព្រំទឹកលើគោឧសភរាជ និងដោះយកគោឧសភរាជទៅបរិភោគគ្រាប់ធញ្ញជាតិចំនួន ៧មុខ រួមមាន៖ ស្រូវ , ពោត , សណ្តែក , ល្ង , ស្មៅ , ស្រា និងទឹក ដែលបានរៀបចំទុករួចជាស្រេចនោះ ហើយតាមរយៈនៃការផ្សងរបស់គោឧសភរាជ បានបង្ហាញថាគោឧសភរាជបរិភោគស្រូវ ៨៥ភាគរយ , ពោត ៩០ភាគរយ និងសណ្តែក ៨៨ភាគរយ ខណៈល្ង , ស្មៅ , ស្រា និងទឹក គោឧសភរាជមិនបរិភោគនោះទេ ដែលលទ្ធផលនៃការផ្សងនេះ គឺដូចគ្នាទៅនឹងឆ្នាំ២០១៨ដែរ។
សូមបញ្ជាក់ថា ការផ្សងរបស់គោឧសភរាជទៅបរិភោគគ្រាប់ធញ្ញជាតិចំនួន៧មុខនេះ បានប្រព្រឹត្តទៅក្នុងព្រះរាជពិធី បុណ្យច្រត់ព្រះនង្គ័ល ស្ថិតក្នុងកីឡដ្ឋានក្រុងដូនកែវ ខេត្ត តាកែវ នាព្រឹកថ្ងៃទី២២ ខែឧសភា ឆ្នាំ២០១៩នេះ ក្រោមព្រះរាជាធិបតីដ៏ខ្ពង់ខ្ពស់របស់ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ។
គួររំលឹកថា ព្រះរាជពិធីបុណ្យច្រត់ព្រះនង្គ័ល ជាព្រះរាជប្បវេណីដ៏សំខាន់ ចាត់ទុកជាវប្បមង្គលមួយដ៏ប្រសើរ របស់ប្រជាពលរដ្ឋកម្ពុជា ដែលមហាក្សត្រគ្រប់ព្រះអង្គ តែងតែដឹកនាំធ្វើពុំដែលខានតាំងពីបុរាណកាលរៀងមក ដើម្បីជាការប្រកាសដល់ប្រជាពលរដ្ឋខ្មែរថារដូវបង្កបង្កើនផល រដូវធ្វើស្រែបានចូលមកដល់ហើយ។
ព័ត៌មានជាតិ ថ្មីៗ
ព្រះរាជពិធីនេះកាលពីដើមឡើយ តែងតែប្រារព្ធធ្វើឡើងនៅវាលព្រះមេរុនៅជិតព្រះបរមរាជវាំង តែប៉ុន្មានឆ្នាំចុងក្រោយនេះ ព្រះរាជពិធីនេះ ត្រូវព្រះករុណាជាអម្ចាស់ជីវិតលើត្បូង ព្រះរាជានុញ្ញាតឱ្យធ្វើនៅតាមខេត្តវិញម្តង ដើម្បីឱ្យប្រជាពលរដ្ឋខ្មែរបានចូលរួមក្នុងព្រះរាជបវេណីដ៏សំខាន់មួយនេះ៕
