ប្រជាកសិករមួយចំនួនធំក្នុងខេត្តសៀមរាប បានត្រៀមផ្ទៃដីធ្វើស្រែរួចរាល់ហើយ ទោះបីរដូវវស្សាក្នុងឆ្នាំ២០១៩នេះ មានភាពយឺតយ៉ាវក៏ដោយ ក្នុងនោះផ្ទៃដី៤៩,៥៥៥ហិកតា ត្រូវបានភ្ជួររាស់ហាលដី និងដាំដុះរួចរាល់ហើយ។
បើតាមរបាយការណ៍របស់មន្ទីរកសិកម្មខេត្ដសៀមរាប បានបញ្ជាក់ថា ស្រូវ ដែលប្រជាកសិករបានដាំដុះរួចរាល់ហើយ មានចំនួនសរុប ៦,០១០ហិកតា ក្នុងនោះពង្រោះស្រូវស្រាល១,២០០ហិកតា ស្រូវកណ្តាល២,១០០ហិកតា ស្រូវធ្ងន់៩៣០ហិកតា ស្រូវចំការ៤៣០ហិកតា និងស្រូវវារ១,៣៥០ហិកតា។ ជាមួយគ្នានោះ ផ្ទៃដីដាំដុះ ភ្ជូរដោយគ្រឿងយន្តមានចំនួន៤២,៨៣៥ហិកតា និងដោយគោក្របី ៧០ហិកតា។
លោក រៀម វាសនា ជាកសិករ រស់នៅសង្កាត់សំបួរ ក្រុងសៀមរាប បានឲ្យដឹងថា លោកបានភ្ជួរ និងព្រោះស្រូវ នៅលើផ្ទៃដីស្រែចំនួន១០ហិកតារបស់លោករួចរាល់ហើយ លោកចាំបាច់ត្រូវរៀបចំផ្ទៃដីធ្វើស្រែឲ្យបានឆាប់រហ័ស ដោយសារផ្ទៃដីដាំដុះនៅជិតបឹងទន្លេសាប រីឯពូជស្រូវស្រាល ដែលលោកធ្វើការដាំដុះគឺនាំចូលពីប្រទេសវៀតណាម ដែលអាចនឹងប្រមូលផលបានក្នុងរយៈពេល៧៥ថ្ងៃ ពោលគឺមុនទឹកទន្លេបឹងទន្លេសាបឡើង។
លោក បានបន្ថែមទៀតថា នៅតំបន់របស់លោក ប្រជាកសិករ ធ្វើស្រែពង្រោះ មួយឆ្នាំបានពីរលើក ជាមួយគ្នានេះរូបលោក ក៏ដូចកសិករដទៃ មានការព្រួយបារម្ភពីតម្លៃជី និងថ្នាំពុលកសិកម្មផ្សេងៗ ដែលចេះតែឡើងថ្លៃ ខណៈតម្លៃស្រូវមានការធ្លាក់ចុះ ។ លោកបានអំពាវនាដល់អាជ្ញាធរ ឬស្ថាប័នពាក់ព័ន្ធធ្វើ យ៉ាងណា ជួយសម្រួលដល់ប្រជាកសិករជួយទប់ការឡើងថ្លៃជីគ្រប់ប្រភេទ និងជួយរកទីផ្សារស្រូវឲ្យបានខ្ពស់។
អត្ថបទ និង រូបថត ៖ លោក ជា ស្រស់ និងលោក ខេង ឧត្តម
កែសម្រួលអត្ថបទ ៖ លោក សេង ផល្លី
