លំនៅដ្ឋានប្រជាពលរដ្ឋ នៅក្នុងភូមិចំនួន៣ ក្នុងសង្កាត់ទឹកវិល ក្រុងសៀមរាប ចំនួន១២ខ្នង រងផលប៉ះពាល់ ក្នុងនោះ រលំទាំងស្រុង ០៦ខ្នង និងរបើកដំបូល ០៦ខ្នង។
តាមការឲ្យដឹងពី នៅ នា ស្មៀនសង្កាត់ទឹកវិល ក្រុងសៀមរាប បានឲ្យដឹងនៅថ្ងៃទី២៣ ខែឧសភានេះថា ហេតុការណ៍នេះបានកើតឡើងកាលពីព្រលប់ថ្ងៃទី២២ ខែឧសភា ឆ្នាំ២០១៩ ។ បាតុភូតភ្លៀងនិងខ្យល់កន្ត្រាក់ នេះបានបណ្តាលឲ្យប៉ះពាល់លំនៅដ្ឋានប្រជាពលរដ្ឋចំនួនបីភូមិ គឺភូមិជ្រៃ ភូមិបន្ទាយឈើ និងភូមិព្រៃថ្មី នៃសង្កាត់ទឹកវិល ។
លោកបានឲ្យដឹងបន្តថា នៅក្នុងភូមិជ្រៃ លំនៅដ្ឋានប្រជាពលរដ្ឋចំនួន០៦ខ្នង បានដួលរំលំ ០៤ខ្នង របើកដំបូល និងបណ្ដាលឲ្យស្ត្រីម្នាក់រងរបួសស្រាល ។ ចំណែកនៅភូមិបន្ទាយឈើរបើកដំបូលចំនួន០១ និងនៅភូមិព្រៃថ្មីមាន០១ខ្នងរបើកដំបូលផងដែរ។
បន្ទាប់ពីចុះត្រួតពិនិត្យដល់កន្លែងកើតហេតុ លោក នៅ នា បានបញ្ជាក់ថា អាជ្ញាធរមូលដ្ឋានភូមិ ឃុំ កាកបាទក្រហមកម្ពុជាសាខាខេត្តសៀមរាប ការិយាល័យអភិវឌ្ឍន៍ក្រុង នៃសាលាក្រុងសៀមរាប រួមជាមួយអាជ្ញាធរជាតិអប្សរា បានចុះអន្តរាគមន៍ភ្លាមៗ ដើម្បជួយដល់ប្រជាពលរដ្ឋរងគ្រោះទាំងអស់នោះ។
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
