ក្នុងឱកាសនៃការរៀបចំកិច្ចប្រជុំលើកទី៨ ថ្នាក់រដ្ឋមន្ត្រីទទួលបន្ទុកការបំពុលផ្សែងអ័ព្ទឆ្លងដែន នៃប្រទេសអនុតំបន់មេគង្គ នាព្រឹកថ្ងៃទី២៤ ខែ ឧសភា ឆ្នាំ២០១៩នេះ ខេត្តសៀមរាប បានទទួលធ្វើជាម្ចាស់ផ្ទះនៃកិច្ចនេះ ដែលប្រព្រឹត្តទៅនៅសណ្ឋាគារ អប្សរា ផាឡេសរីសត ក្រោមអធិបតីភាពឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ដោយមានការចូលរួមពីឯកឧត្តម ទៀ សីហា អភិបាលខេត្តសៀមរាប និង ឯកឧត្តម លោកជំទាវ លោក លោកស្រីជាសមាជិកនៃប្រទេសអនុតំបន់មេគង្គ រួមមាន ប្រទេសថៃ , សហភាពមីយ៉ាម៉ា , ឡាវ , វៀតណាម និង កម្ពុជាដែលជាម្ចាស់ផ្ទះ ។
ឯកឧត្តម សាយ សំអាល់ មានប្រសាសន៍ថា ប្រទេសជាសមាជិកអាស៊ានបានចុះហត្ថលេខាលើកិច្ចព្រមព្រៀងអាស៊ាន ស្តីពីការបំពុលផ្សែងអ័ព្ទឆ្លងដែន កាលពីថ្ងៃទី១០ ខែមិថុនា ឆ្នាំ២០០២ និងចូលជាធរមាននៅថ្ងៃទី២៥ ខែវិច្ឆិកា ឆ្នាំ២០០៣ ដូច្នេះប្រទេសសមាជិកអាស៊ាន បាននឹងកំពុងធ្វើការយ៉ាងជិតស្និទ្ធជាមួយគ្នា ដើម្បីទប់ស្កាត់បញ្ហាឆ្លងដែន ទប់ស្កាត់និងកាត់បន្ថយភ្លើងឆេះព្រៃ ព្រមទាំងបានផ្លាស់ប្តូរព័ត៌មាននិងបច្ចេកវិទ្យា និង ការផ្តល់ការគាំទ្រដល់គ្នាទៅវិញទៅមកទៀតផង ។
ឯកឧត្តម សាយ សំអាល់ មានប្រសាសន៍ទៀតថា សមិទ្ធផលសំខាន់ៗដែលកម្ពុជាបានសម្រេចកន្លងមក រួមមាន ៖ ការអភិរក្សជីវៈចម្រុះ , ការគ្រប់គ្រងនិងការការពារព្រៃឈើ , ការអនុវត្តវិធានការទប់ស្កាត់ភ្លើងឆេះព្រៃ និង ការរៀបចំផែនការយុទ្ធសាស្ត្រតំបន់ការពារធម្មជាតិ ព្រមទាំងការបង្កើនទំហំតំបន់ការពាររហូតដល់ប្រមាណ ៧,៥ លានហិកតា និង ការរៀបចំក្រុមបរិស្ថាន និងធនធានធម្មជាតិ , ការរៀបចំផែនការយុទ្ធសាស្ត្រ និង ផែនការសកម្មភាពបរិស្ថានជាតិ ការរៀបចំផែនការយុទ្ធសាស្ត្ររេដបូកជាតិ និង ការបង្កើតក្រុមប្រឹក្សាជាតិអភិវឌ្ឍន៍ដោយចីរភាព ដើម្បីសម្របសម្រួលជាមួយក្រសួងស្ថាប័ន និង ភាគីពាក់ព័ន្ធ ក្នុងការដាក់បញ្ចូលកិច្ចគាំពារបរិស្ថានទៅក្នុងផែនការអភិវឌ្ឍន៍ជាតិ ។
ឯកឧត្តម សាយ សំអាល់ មានប្រសាសន៍បន្ថែមទៀតថា កិច្ចប្រជុំលើកទី៨នៅថ្ងៃនេះ ជាឱកាសសម្រាប់ប្រទេសនៅក្នុងអនុតំបន់មេគង្គ ដើម្បីពិនិត្យមើលវឌ្ឍនភាពការងារទប់ស្កាត់ការបំពុលផ្សែងអ័ព្ទឆ្លងដែន និង បន្តជំរុញការអនុវត្តកិច្ចព្រមព្រៀងក្នុងក្របខណ្ឌប្រទេសសមាជិកនីមួយៗ ក៏ដូចជានៅក្នុងអនុតំបន់មេគង្គ ខណៈដែលនិន្នាការនៃការអភិវឌ្ឍបូករួមនឹងបញ្ហាប្រែប្រួលអាកាសធាតុ បានធ្វើឱ្យតំបន់អាស៊ានទទួលភាពរងគ្រោះ ដោយសារគ្រោះធម្មជាតិ ដូចជា ទឹកជំនន់ គ្រោះរាំងស្ងួត និងភ្លើងឆេះព្រៃ ដែលបង្កផលប៉ះពាល់ដល់បរិស្ថាន ជីវិតមនុស្ស និងការប្រកបរបរចិញ្ចឹមជីវិតជាដើម ដូច្នេះកិច្ចសហប្រតិបត្តិការរបស់ប្រទេសសមាជិកអាស៊ាន មានសារៈសំខាន់ ក្នុងការបន្តធ្វើការរួមគ្នា ដើម្បីដោះស្រាយបញ្ហាប្រឈមខាងលើនេះផងដែរ ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
