លោកនឹម វ៉ាន់សំ ប្រធានគណៈកម្មការរៀបចំការបោះឆ្នោតខេត្តសៀមរាប បានឲ្យដឹងថា ការបោះឆ្នោតអាណត្តិទី៣ជ្រើសរើសក្រុមប្រឹក្សា ស្រុក – ក្រុង និងក្រុមប្រឹក្សាខេត្ដសៀមរាប ជាការបោះឆ្នោតបែបអសកល ដែលមាននីតិវិធីខុសគ្នាខ្លះៗ ទៅនឹងការបោះឆ្នោតសកលជ្រើសរើសតំណាងរាស្ត្រ ដែលមានន័យថា កាបោះឆ្នោតសកលប្រជាពលរដ្ឋទូទៅ ដែលគ្រប់អាយុនិងមានឈ្មោះនៅក្នុងបញ្ជីបោះឆ្នោតអាចចូលរួមបោះឆ្នោតបាន ដោយឡែកសម្រាប់ការបោះឆ្នោតជ្រើសរើសក្រុមប្រឹក្សា ក្រុង ស្រុក ខេត្ត រាជធានី ដែលអង្គបោះឆ្នោតសុទ្ឋតែជាសមាជិក្រុមប្រឹក្សាឃុំ សង្កាត់នៅក្នុងមុខតំណែង ។
លោក នឹម វ៉ាន់សំ បានឲ្យដឹងទៀតថា នីតិវិធីនៃការបោះឆ្នោត មាន៤ដំណាក់កាលស្រដៀងៗគ្នា គឺដំណាក់កាលទី១ ៖ ចំពោះការបោះឆ្នោតសកល គឺការចុះឈ្មោះទៅក្នុងបញ្ជីឈ្មោះនៃការបោះឆ្នោត ធ្វើឡើងសម្រាប់ប្រជាពលរដ្ឋទូទៅ ដែលគ្រប់អាយុបោះឆ្នោត រីឯការបោះឆ្នោតអសកលនេះវិញ ការស្រង់និងចុះឈ្មោះមានដូចគ្នា តែស្រង់និងចុះឈ្មោះ តែសមាជិក្រុមប្រឹក្សាឃុំសង្កាត់ក្នុងមុខតំណែង , ដំណាក់កាលទី២ ៖ ជាដំណាក់កាលចុះបញ្ជីបេក្ខជន ដែលការបោះឆ្នោតសកល ធ្វើការចុះបញ្ជីនៅក្នុងគណៈកម្មការឃុំ សង្កាត់សម្រាប់ការបោះឆ្នោត និងគណៈកម្មាធិការជាតិរៀបចំការបោះឆ្នោត រីឯការបោះឆ្នោតអសកល ការចុះបញ្ជីបេក្ខជន គឺធ្វើនៅគណៈកម្មការខេត្តរៀបចំការបោះឆ្នោត , ដំណាក់កាលទី៣ ជាដំណាក់កាលយុទ្ឋនាការឃោសនាបោះឆ្នោត គឺដូចគ្នាទៅនឹងការឃោសនាបោះឆ្នោតសកលដែរ ប៉ុន្តែរយៈពេលនៃការឃោសនាមានរយៈពេលខុសៗគ្នា សម្រាប់ការបោះឆ្នោតជ្រើសរើសក្រុមប្រឹក្សារាជធានី ក្រុងខេត្ត ស្រុក ខ័ណ្ឌ ឬហៅខ្លីថា បោះឆ្នោតអសកលនេះ យុទ្ឋនាការនៃការឃោសនា មានរយៈពេលតែ៨ថ្ងៃ ក្នុងនោះក្បួនដង្ហែរផ្សេងៗអនុញ្ញាតបានតែពីរលើកទេ ក្រៅពីនោះអាចមានសកម្មភាពតូចៗ ដូចជាជួបប្រជុំតាមស្នាក់ការ ការចាក់ឧឃោសនស័ព្ទនៅមួយកន្លែង និងការជួបជុំផ្សេងៗទៀត តែមិនឲ្យលើសពីរយៈពេល៨ថ្ងៃដែលបានកំណត់ទេ និង ដំណាក់កាលទី៤ចុងក្រោយគឺការបោះឆ្នោត រាប់សន្លឹកឆ្នោត និងការប្រកាសលទ្ឋផល ។
លោក នឹម វ៉ាន់សំ បានឲ្យដឹងបន្ថែមទៀតថា ដំណាក់កាលទី៤នេះ គឺការបោះឆ្នោត រាប់សន្លឹកឆ្នោត រវាងការបោះឆ្នោតសកល និង ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ មានការខុសគ្នានូវចំណុចមួយចំនួនដូចជា ៖ ដំណាក់កាលបោះឆ្នោត គឺការបោះឆ្នោតសកល អ្នកបោះឆ្នោត ត្រូវបោះឆ្នោតតែម្តងទេ រីឯការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុកវិញ អ្នកបោះឆ្នោត ត្រូវបោះឆ្នោតចំនួន២លើក ដែលមានសន្លឹកឆ្នោតចំនួន០២ មានពណ៌ផ្សេងគ្នា គឺលើកទី១ គឺបោះឆ្នោតជ្រើសរើសក្រុមប្រឹក្សាក្រុង ស្រុក ខណ្ឌ និង លើកទី២ គឺបោះឆ្នោតជ្រើសរើសក្រុមប្រឹក្សារាជធានី ខេត្ត ហើយចំពោះការរាប់សន្លឹកឆ្នោតវិញ គឺរាប់សន្លឹកឆ្នោតនៃការបោះឆ្នោតសកល គឺរាប់តែមួយដងទេ រីឯការរាប់សន្លឹកឆ្នោតនៃការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ គឺរាប់ចំនួន២លើក ដោយលើកទី១ គឺរាប់សន្លឹកឆ្នោតនៃការបោះឆ្នោតជ្រើសរើសក្រុមប្រឹក្សាក្រុង ស្រុក ខណ្ឌ និង លើកទី២ គឺរាប់សន្លឹកឆ្នោតនៃការបោះឆ្នោតជ្រើសរើសក្រុមប្រឹក្សារាជធានី ខេត្ត ៕
អត្ថបទ ៖ លោក យូ វង្ស
រូបភាព : ឯកសារ
កែសម្រួលអត្ថបទ ៖ លោក លីវ សាន្ត
