នៅព្រឹកថ្ងៃទី២៥ ខែឧសភា ឆ្នាំ២០១៩នេះ លោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និង ជាតំណាងឯកឧត្តម ទៀ សីហា អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និងសហការី បាននាំយកអំណោយមនុស្សធម៌ ចែកជូនប្រជាពលរដ្ឋដែលលំនៅដ្ឋានរងគ្រោះដោយខ្យល់កន្ត្រាក់ក្នុងសង្កាត់ទឹកវិលក្រុងសៀមរាប ចំនួន១២គ្រួសារ ដែលទទួលរងគ្រោះកាលពីវេលាម៉ោង០៦ល្ងាច ថ្ងៃទី២២ ខែឧសភា ឆ្នាំ២០១៩ កន្លងទៅថ្មីៗនេះ ធ្វើឲ្យប៉ះពាល់លំនៅដ្ឋានប្រជាពលរដ្ឋចំនួនបីភូមិ ក្នុងសង្កាត់ទឹកវិល ដោយរលំផ្ទះ៦ខ្នង និង របើកដំបូលធ្ងន់ធ្ងរ ៦ខ្នង ក្នុងនោះមានភូមិ ប្រីយ៍ថ្មី ១ខ្នង , ភូមិជ្រៃ១០ខ្នង និង ភូមិបន្ទាយឈើ ១ខ្នង និងបណ្តាលឲ្យស្ត្រីម្នាក់កំពុងមានផ្ទៃពោះ៦ខែឈ្មោះទា ឈឿន អាយុ៣៣ឆ្នាំ បានរងរបួសស្រាល ។
អំណោយមនុស្សធម៌ដែលបានផ្ដល់ជូននាឱកាសនោះ មាន ៖ ចំពោះគ្រួសារដែលរលំផ្ទះ ក្នុងមួយគ្រួសារ ទទួលបានមុង១ , ភួយ១ , សារុង១ , ក្រមា១ , ស័ង្កសី ១៦សន្លឹក , មី១កេស , ត្រីខ១យួរ , អង្ករ៣០គីឡូក្រាម និងថវិកា១សែន៥ម៉ឺនរៀល និង គ្រួសារ ដែលលំនៅដ្ឋានប៉ះពាល់ធ្ងន់ ក្នុងមួយគ្រួសារ ទទួលបានមុង១ , ភួយ១ , សារុង១ , ក្រមា១ , ស័ង្កសី ១០សន្លឹក , មី១កេស , ត្រីខ១យួរ , អង្ករ៣០គីឡូក្រាម និងថវិកា១សែនរៀល ។
ដោយឡែកស្ត្រីមានផ្ទៃពោះ ដែលបានរងរបួស ទទួលបានឃីត១កញ្ចប់ ថវិកា ២សែនរៀល ក្នុងនោះលោក ហឿក ហើត និង លោកស្រី ចៀន យ៉ុន ម្ចាស់ភោជនីយដ្ឋានគុម្ពឬស្សី បានឧបត្ថម្ភ ដល់ស្ត្រីមានផ្ទៃពោះរងរបួស នូវថវិកា ២លានរៀល និង មណ្ឌលសុខភាព ចំនួន ៥សែនរៀលផងដែរ ។
ព័ត៌មានជាតិ ថ្មីៗ
លោកជំទាវ ទាង អេង ទៀសីហា មានប្រសាសន៍ថា ក្នុងនាមឯកឧត្តម ទៀ សីហា សូមសម្ដែងនូវការសោកស្តាយជាពន់ពេក ចំពោះបងប្អូនដែលបានរងគ្រោះនូវឧបទ្ទេវហេតុ ដោយសារខ្យល់កន្ទ្រាក់ ដែលបណ្ដាលឲ្យរលំផ្ទះ និង របើកដំបូលធ្ងន់ធ្ងរ ប៉ុន្តែកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា មិនបានទុកឲ្យបងប្អូនប្រជាពលរដ្ឋរងការលំបាក ក្នុងគ្រោះមហន្តរាយណាមួយដែលបានកើតឡើង ក្នុងមូលដ្ឋានរបស់ប្រជាពលរដ្ឋឡើយ ដូចពាក្យស្លោកលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា -មិនទុកនរណាម្នាក់ចោល ដែលជាក់ស្ដែងថ្ងៃនេះ ដោយទទួលបានព័ត៌មានថា មានប្រជាជនរងគ្រោះធម្មជាតិនៅបីភូមិ សង្កាត់ទឹកវិល ក្រុងសៀមរាប យើងបានបញ្ចុះក្រុមអ្នកស្ម័ត្រចិត្តកាកបាទក្រហមកម្ពុជាប្រចាំក្រុងសៀមរាប សង្កាត់ ចុះស្រង់នូវផលប៉ះពាល់ភ្លាមៗ ហើយនៅថ្ងៃនេះ គណៈកម្មាធិការសាខាកាកបាទក្រហមកម្ពុជាខេត្តសៀមរាប បានរៀបចំនូវអំណោយសង្គ្រោះបន្ទាន់ ដើម្បីយកមកចែកជូនបងប្អូនផងដែរ ។
លោកជំទាវ មានប្រសាសន៍ទៀតថា សម្ដេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ព្រមទាំងថ្នាក់ដឹកនាំគ្រប់លំដាប់ថ្នាក់ មិនទុកឲ្យបងប្អូនប្រជាពលរដ្ឋ ដែលរងគ្រោះនៅកណ្ដោចកណ្ដែង និងស្លាប់ដោយអត់អាហារ និង គ្មានទីជំរកនោះឡើយ ៕
អត្ថបទ និង រូបថត ៖ លោក ម៉ី សុខារិទ្ធ និង លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
