កម្មវិធី «តោះជិះកង់ដើម្បីសហគម ន៍» ឆ្នាំ២០១៩ ប្រមូលបានថវិកា ២៣ ៥៣០ដុល្លាអាមេរិក ត្រូវបានបរិច្ចាគទាំងស្រុងដល់ មន្ទីរពេទ្យគន្ធបុប្ផាខេត្តសៀមរាប !
កម្មវិធីជិះកង់ដើម្បីសហគមន៍ឆ្នាំទី៦ បានធ្វើឡើងនៅព្រឹកថ្ងៃទី២៦ ឧសភា ២០១៩ ក្រោមការរៀបចំដោយសមាគម ន៍អ្នកជិះកង់ខេត្តសៀមរាប និងឧបត្ថម្ភធំដោយក្រុមហ៊ុនទឹកពិសា វីតាល់។
លោក អ៊ុ វណ្ណៈ ប្រធានផ្នែកទំនាក់ទំនងទីផ្សារនៃក្រុមហ៊ុនវីតាល់បានឲ្យដឹងថា នេះជាឆ្នាំទី៥របស់ខ្លួន ដែលវីតាល់បានចូលរួមឧបត្ថម្ភដល់កម្មវិធីជិះកង់នេះ ដោយផ្អែកលើទស្សនវិស្ស័យ រួមគ្នាជួយដល់សង្គម និងពង្រឹងសកម្មភាពមនុស្សធម៌ ។ លោកថា ៖ វីតាល់ រីករាយនឹងបន្តគាំទ្រដល់ សមាគមន៍ជិះកង់កម្ពុជា ក្នុងការរៀបចំកម្មវិធីជិះកង់សប្បុរស ដើម្បីមន្ទីរពេទ្យគុន្ធបុប្ផា ដែលកំពុងត្រូវការការចូលរួមជាចាំបាច់ សម្រាប់ការជួយសង្គ្រោះជីវីតកុមាររាប់ពាន់អ្នកជារៀងរាល់ថ្ងៃ។
លោក គឹម ប៊ុនថាន់ ស្ថាបនិកនៃសមាគមអ្នកជិះកង់ដើម្បីសហគមន៍ ក៏បានឲ្យដឹងដែរថា “កម្មវិធីឆ្នាំនេះ ពិតជាកាន់តែពិសេសថែមទៀត ដោយមានការគាំទ្រនិងចូលរួមយ៉ាងច្រើនកុះករពីសំណាក់អ្នកជិះកង់ច្រើនជាងបណ្តាឆ្នាំមុនៗ ថែមទាំងទទួលបានការឧបត្ថម្ភជាច្រើនពីស្ថាប័ន និង ក្រុមហ៊ុនផ្សេងៗទៀតផងដែរ ។ គួរឱ្យកត់សម្គាល់ អ្វីដែលកាន់តែរំភើបទៅទៀតនោះគឺ សំបុត្រចូលរួមត្រូវបានលក់អស់ តាំងពីថ្ងៃចាប់បើកលក់ក្នុងអាទិត្យដំបូង ហើយចំនួនក៏បន្តកើនឡើងជាលំដាប់ ដែលនេះ ត្រូវបានបង្កើនទឹកចិត្តដល់ក្រុមការងារ ។
គ្រប់គ្នារំពឹងទុកយ៉ាងមុតមាំថា កម្មវិធីនេះនឹងក្លាយជាព្រឹត្តិការណ៍នៃសកម្មភាពមនុស្សធម៌ប្រចាំឆ្នាំ ដើម្បីមោទនភាពរបស់សង្គមជាតិ ជាព្រឹត្តិការណ៍បង្កើតភាពកក់ក្តៅជូនប្រជា ពលរដ្ឋ និងកុមារកម្ពុជាទូទាំងប្រទេស ។ គួររំឭកថា ព្រឹត្តិការណ៍មនុស្សធម៌រកថវិកាជួយមន្ទីរពេទ្យគន្ធបុប្ផា បានទាក់ទាញអ្នកចូលរួមកើនពីមួយឆ្នាំទៅមួយឆ្នាំ ដោយឆ្នាំទី១ ព្រឹត្តិការណ៍នេះរកថវិកាបានជាង២ពាន់ដុល្លារ ឆ្នាំទី២ បានជាង៧ពាន់ដុល្លារ ឆ្នាំទី៣ បានជាងមួយម៉ឺនដុល្លារ ឆ្នាំទី៤ ជិត២ម៉ឺនដុល្លារ ឆ្នាំទី៥ បានជាង២ម៉ឺនដុល្លារដោយមានអ្នកចូល រួមជាង៨០០នាក់ ហើយឆ្នាំទី៦ នេះមានអ្នកចូលរួមជាង១ពាន់នាក់ ប្រមូលបានថវិកា ២៣,៥៣០ដុល្លារ ៕
អត្ថបទ និងរូបភាពលោកងិន គិមឡេង
កែសម្រួលដោយលីវ សុខុន
