លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប មានប្រសាសន៍ថា ក្នុងនាមមន្ទីរទេសចរណ៍ខេត្តសៀមរាប សូមសម្ដែងនូវការអបអរសាទរចំពោះសមាគមក្លឹបទេសចរណ៍សៀមរាប (STC) ដែលបានចុះក្នុងបញ្ជីសមាគមនៅក្នុងក្រសួងមហាផ្ទៃ ក្រោមការគាំទ្រពីអាជ្ញាធរដែនដី និងក្រសួងទេសចរណ៍ ហើយជាឱកាសមួយ រួមជាមួយនឹងសមាគមនានាផ្សេងទៀត ដែលកំពុងប្រតិបត្តិការក្នុងវិស័យទេសចរណ៍ ដែលមានតួនាទី និងប្រតិបត្តិការជំរុញឲ្យវិស័យទេសចរណ៍មានរីកចម្រើនប្រកបដោយនិរន្តរភាព ក្នុងនោះរួមមាន សមាគមចុងភៅ , សមាគមមគ្គុទ្ទេសក៍ទេសចរណ៍ និង សមាគមរថយន្តដឹកជញ្ជូនភ្ញៀវទេសចរ ជាដើម ។ល។ ដោយមានភារកិច្ចសំខាន់ក្នុងការចូលរួមអនុវត្តនូវផែនការយុទ្ធសាស្ត្រ នៃការអភិវឌ្ឍទេសចរណ៍ប្រកបដោយនិរន្តរភាព បញ្ហាប្រឈមនានា ត្រូវរួមគិត រួមធ្វើ រួមគ្នាដោះស្រាយ ក្នុងនោះសេវាកម្មទីផ្សារវត្ថុអនុស្សាវរីយ៍ នៅតែមានអត្រាភាគរយនៅក្នុងគំនូសអវិជ្ជមាន ប៉ះពាល់ដល់គោលការណ៍ទាក់ទាញ បង្កើនកំណើនភ្ញៀវទេសចរ ។
លោក ង៉ូវ សេងកាក់ មានប្រសាសន៍ទៀតថា ប្រការសំខាន់គឺទាមទារឲ្យមានការបណ្តុះបណ្តាលធនធានមនុស្ស ដើម្បីបំពេញការងារក្នុងវិស័យទេសចរណ៍ទទួលបានលទ្ធផលល្អ យល់ដឹងអំពីបញ្ហាសេវាកម្ម និង ការទទួលបដិសណ្ឋារកិច្ច ពិសេសត្រូវមានផែនការរៀបចំតំបន់គោលដៅថ្មីៗឲ្យបានល្អក្រៅពីតំបន់ប្រាសាទ ផ្សព្វផ្សាយទៅដល់ភ្ញៀវទេសចរ បានស្គាល់ និងបានទៅទស្សនាកំសាន្តនៅក្នុងតំបន់ឆ្ងាយៗក្រៅពីតំបន់អង្គរ ហើយបច្ចុប្បន្ននេះ បញ្ហាគ្រប់គ្រងសេវាកម្មវត្ថុអនុស្សាវរីយ៍ ដែលវាបាននាំមកនូវបញ្ហាប្រឈមជាមួយយុទ្ធសាស្ត្ររក្សានិរន្តរភាពនៃកំណើនភ្ញៀវទេសចរណ៍ ខណៈភ្ញៀវបរទេសប្រមាណជា២០ ទៅ ២៥ភាគរយ និយមចូលចិត្តទិញវត្ថុអនុស្សាវរីយ៍ ដូច្នេះការក្លែងបន្លំលក់វត្ថុអនុស្សាវរីយ៍ជូនភ្ញៀវ វាមិនត្រឹមតែជារបាំងដ៏ធ្ងន់ធ្ងរ ដល់ការទាក់ទាញភ្ញៀវទេសចរប៉ុណ្ណោះទេ តែវាប៉ះពាល់ដល់កិត្តិយសជាតិទៀតផង ។
បើតាមប្រសាសន៍របស់លោក ហ្វីលីប កៅ ប្រធានសមាគមក្លឹបទេសចរណ៍សៀមរាប បានឲ្យដឹងថា ចាប់តាំងពីថ្ងៃបង្កើតដំបូងរបស់សមាគមទេសចរណ៍សៀមរាប រហូតមកដល់ថ្ងៃប្រកាសជាផ្លូវការ សមាគមមួយនេះ មានអាយុកាលមិនក្រោម៤ឆ្នាំនោះទេ ហើយក៏ធ្លាប់បានបង្កើតវេទិការជួបជុំគ្នាប្រមាណជាង៤០ លើករួចមកហើយផងដែរ ដើម្បីរួមមតិយោបល់និងបង្ហាញបទពិសោធន៍នានា ក្នុងយុទ្ធសាស្ត្ររក្សានិរន្តរភាពនៃការរីក ចម្រើន លើវិស័យទេសចរណ៍នៅខេត្តសៀមរាប ក្នុងនោះផ្តោតជាសំខាន់ទៅលើការកែលម្អសេវាកម្ម និងការវិនិយោគបង្កើតផលិតផលទេសចរណ៍ថ្មីៗ ឆ្លើយតបតាមតម្រូវការនិងកំណើនភ្ញៀវទេស ចរណ៍ជាតិ-អន្តរជាតិ ដែលចូលមកទស្សនាសៀមរាប-អង្គរ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
