តាមរយៈនៃបទចម្រៀងយ៉ាងពិរោះ អមជាមួយសំឡេងហ្គីតា ចំនួន២បទ របស់លោក សុផាណា ជនពិការកាយសម្បទាម្នាក់ រស់នៅក្នុងខេត្តសៀមរាប ដែលបានច្រៀងនៅក្នុងកម្មវិធី «តោះ ជិះកង់ដើម្បីសហគមន៍» ឆ្នាំ២០១៩ នៅខេត្តសៀមរាប កាលព្រឹកថ្ងៃទី២៦ ខែឧសភា ឆ្នាំ២០១៩ ម្សិលមិញនេះ បានធ្វើឲ្យអ្នកចូលរួមក្នុងកម្មវិធីប្រមាណជិតមួយពាន់ សម្ដែងនូវការចាប់អារម្មណ៍ និង ស្ងើចសរសើរគ្រប់គ្នា នូវទឹកដមសំឡេងយ៉ាងពិរោះរណ្ដំ បើទោះជាស្ថិតក្នុងកាយសម្បទាពិការ តែការបញ្ជាចេញ ពី បេះដូងមនុស្សធម៌ជាមួយជីវិតដ៏កំសត់ លោក សុផាណា ធ្វើបានយ៉ាងល្អ បានធ្វើឲ្យព្រឹត្តិការណ៍នេះ ពោរពេញដោយរសជាតិនៃសាមគ្គីធម៌របស់មនុស្សយើង
លោក សុផាណា បានបញ្ជាក់ថា ថ្វីត្បិតតែលោកពិការកាយសម្បទា តែចិត្តលោកមិនពិការទេ ហើយក៏មិនខ្វះឆន្ទៈដែរ
ហើយបើទោះជាមាន ឬក្រ រូបកាយល្អឬអាក្រក់ ពេលអស់ជីវិតទៅ មិនអាចយកអ្វីទៅជាមួយក្រៅពីបុណ្យ និង បាបប៉ុណ្ណោះ ហើយសម្រាប់ពេលនៅមានជីវិត តើយើងត្រូវធ្វើអ្វីខ្លះ ដើម្បីចូលរួមក្នុងចលនាសង្គម ដូច្នេះ ជាកិត្តិយសណាស់សម្រាប់រូបលោក ដែលបានបង្ហាញទេពកោសល្យរបស់ខ្លួន នៅក្នុងព្រឹត្តិការណ៍ «តោះជិះកង់ដើម្បីសហគមន៍» លើកទី៦ ដែលរៀបចំឡើងដោយសមាគមអ្នកជិះកង់ខេត្តសៀមរាប ហើយប្រមូលបានមូលនិធិសប្បុរសធម៌ជាង២ម៉ឺនដុល្លាអាមេរិក ដែលត្រូវបានយកទៅបរិច្ចាគជូនមន្ទីរពេទ្យកុមារគន្ធបុប្ផាខេត្តសៀមរាបទាំងអស់ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
