លោក ព្រៅ ខេមរិទ្ធ ប្រធានសាខាកាំកុងត្រូលខេត្តសៀមរាប បានមានប្រសាសន៍ថា ក្នុងឱកាសចុះត្រួតពិនិត្យសុវត្ថិភាពចំណីម្ហូបអាហារ នៅផ្សារសម្តេចតេជោ ហ៊ុន សែន ដើមក្រឡាញ់ សង្កាត់ គោកចក ក្នុងក្រុងសៀមរាប នាព្រឹកថ្ងៃទី២៧ ខែឧសភា ឆ្នាំ២០១៩នេះ មន្ត្រីជំនាញរបស់លោក ពុំបានរកឃើញនូវសារធាតុគីមីហាមឃាត់ ដែលបានផ្ទុកនៅក្នុងម្ហូបចំណីគ្រប់ប្រភេទ និង ទំនិញគ្រឿងឧបភោគបរិភោគមួយចំនួនដែលបានដាក់តាំងលក់នៅក្នុងផ្សារឡើយ បន្ទាប់ពីបានធ្វើតេស្តនឹងការពិសោធន៍រកសារធាតុគីមីនៅក្នុងម្ហូបអាហារមួយចំនួន រួមមាន សណ្តែកបណ្តុះ , ត្រីងៀត , ប្រហិត , សរសៃគុយទាវ , គ្រឿងសមុទ្រ ជាច្រើនប្រភេទ និង សុពលភាពនៃការប្រើប្រាស់ហួសកាលបរិច្ឆេទគ្រប់ប្រភេទ ចំពោះគ្រឿងកំប៉ុង និងឥវ៉ាន់ចាប់ហួយ នៅតាមតូបនានាក្នុងផ្សារ ។
លោក ព្រៅ ខេមរិទ្ធ មានប្រសាសន៍ទៀតថាទោះជាយ៉ាងនេះក្តី ក៏មន្ត្រីជំនាញរបស់លោក នៅតែបន្តការចែកចាយនូវស្លាកសញ្ញាស្តីពីការហាមឃាត់ និង ការប្រើប្រាស់ ដើម្បីអប់រំណែនាំពន្យល់ អំពីបញ្ហាការវិចខ្ចប់ , ការទុកដាក់ឲ្យមានអនាម័យល្អ ឬការលក់ដូរធ្វើយ៉ាងណាឲ្យមានការប្រុងប្រយ័ត្នជាមុនទើបជាការប្រសើរ រួមទាំងការអំពាវនាវដល់ក្រុមអាជីវករលក់ដូរ ប្រជាពលរដ្ឋអ្នកប្រើប្រាស់ និងសាធារណជនទាំងអស់ រួមគ្នាទប់ស្កាត់ និង បញ្ឈប់ការប្រើប្រាស់សារធាតុគីមី នៅក្នុងគ្រឿងហូបចុក និង លក់ដូរនូវទំនិញហួសអាយុកាលប្រើប្រាស់ ក្លែងបន្លំ ឬទំនិញខូចគុណភាព ដែលជាអំពើខុសច្បាប់ ប្រឈមទៅនិងទោសទណ្ឌក្នុងករណីធ្ងន់ធ្ងរផងដែរ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
