មន្ត្រីបរិស្ថានជាន់ខ្ពស់កម្ពុជា បានឲ្យដឹងថា ការកើនឡើងការកើនឡើងនូវកម្រិតកម្តៅនៅកម្រិត១.៥ ឬ២អង្សាសេ នាពេលអនាគត វានឹងធ្វើឲ្យមានការប៉ះពាល់យ៉ាងខ្លាំងដល់អាយុជីវិតមនុស្ស សត្វ រុក្ខជាតិ នៅលើភពផែនដីយើងនេះ រួមនឹងបង្កឲ្យមានភ្លើងឆេះព្រៃកាន់តែច្រើន ។
រដ្ឋលេខាធិការ ក្រសួងបរិស្ថាន លោកជំទាវ ម៉ុម ថានី បានមានប្រសាសន៍បែបនេះ នៅក្នុង សិក្ខាសាលា ផ្សព្វផ្សាយពីសកម្មភាព និងរបកគំហើញ របស់ក្រុមការងារអន្តររដ្ឋាភិបាលស្តីពីការប្រែប្រួសអាកាសធាតុ (Intergovernmental Panel on Climate Change: IPCC) កាលពីព្រឹកថ្ងៃទី២៧ ខែឧសភា ឆ្នាំ២០១៩ នៅខេត្តសៀមរាប។
លោកជំទាវ ម៉ុម ថានី បានបង្ហាញថា ជាក់ស្ដែងការកើនឡើងកម្តៅនៅលើផែនដី នៅក្នុងឆ្នាំ២០១៩នេះ វាបានប៉ះពាល់យ៉ាងខ្លាំងដល់ប្រទេសដែលកំពុងអភិវឌ្ឍន៍ ដូចជាប្រទេសកម្ពុជា ជាដើម ដែលនេះការប្រឈមដ៏លំបាក ក្នុងការប្រយុទ្ធប្រឆាំងនឹងការប្រែប្រួសអាកាសធាតុនេះ។ ទន្ទឹមនឹងនោះ ដើម្បីប្រយុទ្ធនឹងការប្រែប្រួលអាកាសធាតុ យើងចាំបាច់ត្រូវការហិរញ្ញវត្ថុជាចាំបាច់ ហើយយើងចង់ធ្វើឲ្យប្រាកដថា ប្រទេសដែលមានឧស្សាហកម្មជឿនលឿន ត្រូវគោរពតាមការប្តេជ្ញាចិត្តរបស់ខ្លួន ក្នុងការផ្តល់ហិរញ្ញប្បទានដល់ប្រទេសកំពុងអភិវឌ្ឍន៍។
សូមបញ្ជាក់ថា នៅក្នុងរបាយការណ៍ពិសេស បានអះអាងថា តាមរយៈកិច្ចការរបស់ក្រុមការងារអន្តររដ្ឋាភិបាលស្តីពីការប្រែប្រួសអាកាសធាតុ (IPCC) កំណើនសីតុណ្ហភាពបន្ថែម០.៥អង្សាសេ នៅក្នុងសកលលោក អាចនាំមកនូវផលវិបាកធ្ងន់ធ្ងរ។ ដូច្នេះ យើងត្រូវកម្រិតកំណើនសីតុណ្ហភាព មិនឲ្យកើនឡើងលើសពី១,៥អង្សាសេឡើយ។ ប៉ុន្តែដើម្បីកម្រិតកំណើនសីតុណ្ហភាពនេះ យើងត្រូវការផ្លាស់ប្តូរ ដែលមិនធ្លាប់មានពីមុនមក ដូចជាការកាត់បន្ថយនូវការបញ្ចេញឧស្ម័នពីគ្រប់វិស័យឲ្យស៊ីជម្រៅ ការប្រើប្រាស់បច្ចេកវិទ្យាជំនួសផ្សេងៗ ដូចជា ថាមពលកកើតឡើងវិញ ការផ្លាស់ប្តូរឥរិយាបថ និងការបង្កើនវិនិយោគទៅលើជម្រើសបញ្ចេញកាបូនទាប។
សូមជម្រាបថា កម្មវិធីផ្សព្វផ្សាយសកម្មភាព និងរបកគំហើញ នៃក្រុមការងារអន្តររដ្ឋាភិបាល ស្តីពីការប្រែប្រួលអាកាសធាតុ បានប្រព្រឹត្តទៅ រយៈពេល២ថ្ងៃ ចាប់ពីថ្ងៃទី២៧-២៨ ខែឧសភា ឆ្នាំ២០១៩ នៅខេត្តសៀមរាប ក្រោមអធិបតីភាព លោកជំទាវ ម៉ុម ថានី រដ្ឋលេខាធិការក្រសួងបរិស្ថាន និងមានការចូលរួមពីគណៈប្រតិភូ មកពីប្រទេសឡាវ តំណាងក្រសួង ស្ថាប័នពាក់ព័ន្ធ អង្គការសង្គមស៊ីវិល ប្រព័ន្ធផ្សព្វផ្សាយព័ត៌មានជាតិ និងអន្តរជាតិ គ្រឹះស្ថានសិក្សា ព្រមទាំងយុវជន ជាច្រើននាក់ផងដែរ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
