មានប្រសាសន៍ក្នុងសិក្ខាសាលាផ្សព្វផ្សាយសកម្មភាព និង របកគំហើញរបស់ក្រុមអន្តររដ្ឋាភិបាល ស្តីពីការប្រែប្រួលអាកាសធាតុ នៅក្នុងក្រុងសៀមរាប នាព្រឹកថ្ងៃទី២៧ ខែឧសភា ឆ្នាំ២០១៩ម្សិលមិញនេះ លោក ង៉ាន់ ភិរុណ អភិបាលរងខេត្តសៀមរាប បានឲ្យដឹងថា ក្នុងនាមឯកឧត្តម ទៀ សីហាអភិបាលខេត្តសៀមរាប ខ្ញុំយល់ថា សិក្ខាសាលានេះមានសារៈប្រយោជន៍ និងមានភាពចាំបាច់ណាស់ សម្រាប់ពាំនាំមកជាមួយនូវព័ត៌មានថ្មីៗស្ដីពីសកម្មភាព បញ្ហាការប្រែប្រួលអាកាសធាតុ ចំណេះដឹងវិទ្យាសាស្ត្រ រួមទាំងការណែនាំនូវវិធានការមួយចំនួនក្នុងការចូលរួមដោះស្រាយបញ្ហាការប្រែប្រួលអាកាសធាតុ នៅថ្នាក់ជាតិ និងថ្នាក់មូលដ្ឋាន ដែលបានរកឃើញ និងអនុវត្តដោយក្រុមការងារអន្តររដ្ឋាភិបាលស្តីពីការប្រែប្រួលអាកាសធាតុ ដែលនេះវាជាវិភាគទានដ៏សំខាន់ សម្រាប់ដោះស្រាយបញ្ហានៅថ្នាក់ជាតិ នឹងអាចឈានដល់ថ្នាក់ពិភពលោក ហើយបន្ទាប់មក ផ្ដើមចេញពីចំណេះដឹងទាំងនេះ យើងក៏អាចធ្វើការបញ្ជ្រាបការងារឆ្លើយតបនឹងការប្រែប្រួលអាកាសធាតុទៅក្នុងផែនការអភិវឌ្ឍតាមវិស័យ នឹងសកម្មភាពប្រចាំថ្ងៃរបស់យើងទៀតផង។
លោក ង៉ាន់ ភិរុណ មានប្រសាសន៍ទៀតថា ខេត្តសៀមរាប មានទីតាំងស្ថិតក្នុងតំបន់ទំនាបកណ្ដាលនៃប្រទេសកម្ពុជា ដែលតែងតែទទួលរងនូវគ្រោះមហន្តរាយដោយសារទឹកជំនន់ ជន់គំហុក និងខ្យល់ព្យុះជាញឹកញាប់ ហើយនាប៉ុន្មានឆ្នាំថ្មីៗនេះ ខេត្តសៀមរាបបានទទួលរងនូវគ្រោះរាំងស្ងួតកាន់តែញឹកញាប់ និងធ្ងន់ធ្ងរជាងមុនផងដែរ ដែលបណ្ដាលឱ្យមានផលប៉ះពាល់យ៉ាងខ្លាំងដល់ជីវភាពរស់នៅរបស់ប្រជាជន ការផ្គត់ផ្គង់ទឹក ការធ្វើចរាចរណ៍ ហេដ្ឋារចនាសម្ព័ន្ធ និងការគ្រប់គ្រងកាកសំណល់ជាដើម ដូច្នេះភារកិច្ចសំខាន់របស់គណៈអភិបាលខេត្តសៀមរាប គឺផ្ដោតជាសំខាន់ទៅលើការកសាងហេដ្ឋារចនាសម្ព័ន្ធរូបវ័ន្តគ្រប់ប្រភេទ ការកសាងប្រព័ន្ធផ្គត់ផ្គង់ទឹកស្អាត និងប្រព័ន្ធបន្សុទ្ធសំណល់រាវ ការពង្រឹង គុណភាពសេវាសាធារណៈ ប្រព័ន្ធសិក្សាអប់រំគ្រប់កម្រិត ចាប់ពីបឋមសិក្សារហូតដល់ឧត្តមសិក្សា ការធានាបាននូវគុណភាពបរិស្ថាន សន្តិសុខ សណ្ដាប់ធ្នាប់ ជាពិសេសផ្ដោតលើវិធានការបន្សាំនឹងការប្រែប្រួលអាកាសធាតុ ដែលសំដៅរួមចំណែកលើកស្ទួយជីវភាពរស់នៅរបស់ប្រជាពលរដ្ឋពីមួយថ្ងៃទៅមួយថ្ងៃ ឲ្យកាន់តែប្រសើរឡើង។
លោក ង៉ាន់ ភិរុណ បានមានប្រសាសន៍បន្ថែមថា បើទោះបីជា ប្រជាជននៅខេត្តសៀមរាបមានជីវភាពសមល្មម ហេដ្ឋារចនា សម្ព័ន្ធរូបវន្តមានលក្ខណៈរឹងមាំ សមត្ថភាពស្ថាប័នខ្ពស់ អាចទប់ទល់នឹងហានិភ័យប្រែប្រួលអាកាសធាតុបានមួយចំនួនក៏ដោយ ប៉ុន្តែយើងក៏ពុំដែលធ្វេសប្រហែស ចំពោះការប្រែ ប្រួលអាកាសធាតុដែលបាននឹងកំពុងកើតឡើងដោយសារទឹកជំនន់ ខ្យល់ព្យុះ និងគ្រោះរាំងស្ងួត ហេតុនេះ អាជ្ញាធរខេត្ត បាននឹងកំពុងរៀបចំយុទ្ធសាស្ត្របង្ការមួយចំនួន ដូចជា រៀបចំកម្មវិធី និងផែនការសកម្មភាពទប់ទល់ហានិភ័យ គ្រោះមហន្ត រាយ ដោយបានសហការជាមួយគណៈកម្មការជាតិគ្រប់គ្រងគ្រោះមហន្តរាយ និងអាជ្ញាធរភូមិ ឃុំ ស្រុក ព្រមទាំងបានបញ្ជ្រាបការប្រែប្រួលអាកាសធាតុទៅក្នុងផែនការអភិវឌ្ឍន៍របស់មន្ទីរ វិស័យពាក់ព័ន្ធ ហើយយើងក៏មានការយកចិត្តទុកដាក់ខ្ពស់ទៅលើការអប់រំបង្កើនចំណេះដឹងរបស់មន្ត្រីរាជការក្រោមឱវាទ និងយុវជននៅក្នុងខេត្ត និង បានចាត់ វិធានការសមស្របមួយចំនួន ក្នុងការគ្រប់គ្រងសំរាម ការផ្សព្វផ្សាយព័ត៌មានអាកាសធាតុ ការដាំកូនឈើឡើងវិញ និងរៀបចំហេដ្ឋារចនា សម្ព័ន្ធដែលធន់នឹងអាកាសធាតុ ។
លោកជំទាវ ម៉ុម ថានី រដ្ឋលេខាធិការក្រសួងបរិស្ថាន បានមានប្រសាសន៍ថា ប្រសិនបើពុំមានដំណោះស្រាយអំពីបញ្ហាប្រែប្រួលអាកាសធាតុ ចាប់ពីពេលឥឡូវនេះតទៅទេនោះ តាមការប៉ាន់ស្មាននៅក្នុងរបាយការណ៍វិភាគម៉ូដែល របស់ក្រុមប្រឹក្សាជាតិអភិវឌ្ឍដោយចិរភាព ជាមួយនឹងក្រសួង សេដ្ឋកិច្ចនិងហិរញ្ញវត្ថុ បានឲ្យដឹងថា នៅក្នុងឆ្នាំ២០៥០ ខាងមុខ ផលិតផលសរុបរបស់កម្ពុជា នឹងអាចមានការថយចុះជិត១០ភាគរយ ហើយដោយសារតែបញ្ហាប្រឈម នៃការប្រែប្រួលអាកាសធាតុទាំងនេះ គឺជាមូលហេតុដែលប្រទេសកម្ពុជា ក្លាយជាប្រទេស ដែលគាំទ្រដ៏ខ្លាំងក្លា ចំពោះកិច្ចខិតខំប្រឹងប្រែងអន្តរជាតិ ក្នុងការប្រយុទ្ធប្រឆាំងការប្រែប្រួលអាកាសធាតុពិភពលោក បើទោះបី កម្ពុជា មិនជាប់បន្ទុកជាអ្នកទទួលខុសត្រូវ លើការបញ្ចេញឧស្ម័ន្មផ្ទះកញ្ចក់ ជាប្រវត្តិសាស្ត្រក៏ដោយ តែកម្ពុជាបានប្តេជ្ញាយ៉ាងម៉ឹងម៉ាត់បំផុត ក្នុងការជំរុញគំរូអភិវឌ្ឍ ដែលធន់នឹងការប្រែប្រួលអាកាសធាតុ និង ការបញ្ចេញកាបូនទាប ។
សូមបញ្ជាក់ថា សិក្ខាសាលាផ្សព្វផ្សាយសកម្មភាព និង របកគំហើញរបស់ក្រុមអន្តររដ្ឋាភិបាល ស្តីពីការប្រែប្រួលអាកាសធាតុនេះ មានរយៈពេល២ថ្ងៃ ក្រោមអធិបតីភាពរបស់លោកជំទាវ ម៉ុម ថានី រដ្ឋលេខាធិការក្រសួងបរិស្ថាន ដោយមានការចូលរួមពីសំណាក់តំណាងមកពីក្រុមការងារអន្តររដ្ឋាភិបាល ស្តីពីការប្រែប្រួលអាកាសធាតុ (IPCC) ដើម្បីចែករំលែក ស្តីពីលទ្ធផលនៃការសិក្សាវិទ្យាសាស្ត្រ លើការប្រែប្រួលអាកាសធាតុ ដល់សិក្ខាកាមជាមន្ត្រីបរិស្ថាន មន្ត្រីរាជរដ្ឋាភិបាលដែលពាក់ព័ន្ធ សិស្ស-និស្សិត លោកគ្រូ អ្នកគ្រូ សាស្ត្រាចារ្យ ដ៊ជាពិសេសនោះគឺមានវត្តមានរបស់ លោកបណ្ឌិត Priyadarshi R.Shukla សហប្រធានក្រុមការងារផ្នែកទី៣ នៃក្រុមការងារអន្តររដ្ឋាភិបាលស្តីពីការរប្រែប្រួលអាកាសធាតុ បង្ហាញចំណាប់អារម្មណ៍លើចំណុចសំខាន់ៗ ស្តីពីកិច្ចសហប្រតិបត្តិការអន្តរជាតិ ក្នុងការជួយពង្រឹងសមត្ថ ភាព ក្នុងការបង្កើតភស្តុតាងវិទ្យាស្ត្រ អំពីផលប៉ះពាល់នៃការប្រែប្រួលអាកាសធាតុ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
