នៅរសៀលថ្ងៃទី២៧ ខែឧសភា ឆ្នាំ២០១៩ម្សិលមិញនេះ លោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលខេត្តសៀមរាប និងសហការី បានជួបពិភាក្សាការងារមួយចំនួនជាមួយគណៈប្រតិភូខេត្តជុងចុងណាំដូ នៃសាធារណរដ្ឋកូរ៉េ ដឹកនាំដោយលោក Na Sa-yeol អភិបាលរងខេត្តជុងចុងណាំដូ និង សហការី ។
មានប្រសាសន៍ក្នុងឱកាសនោះ លោក ពិន ប្រាកដ បានបញ្ជាក់ថា ក្នុងនាមឯកឧត្តម ទៀ សីហា អភិបាលខេត្តសៀមរាប និង ក្នុងនាមលោកផ្ទាល់ សូមសម្ដែងនូវការស្វាគមន៍ចំពោះវត្តមានរបស់គណៈប្រតិភូខេត្តជុងចុងណាំដូ នៅលើទឹកដីនៃខេត្តសៀមរាបនាពេលនេះ ខណៈខេត្តសៀមរាប បានចងសម្ព័ន្ធមេត្រីភាពជាមួយក្រុងស៊ូវ៉ុន ក្នុងឆ្នាំ២០០៤ និង ខេត្តជុងចុងណាំដូ នៃសាធារណរដ្ឋកូរ៉េ ក្នុងឆ្នាំ២០០៨ ព្រមទាំងបានធ្វើកិច្ចទំនាក់ទំនង សហប្រតិបត្តិការល្អនឹងគ្នា ដែលលទ្ធផលទទួលបានកន្លងមក លើវិស័យកសិកម្ម វិស័យអប់រំ ក្នុងការផ្តល់អាហារូបករណ៍ និង វិស័យសុខាភិបាល ដោយបានបញ្ជូនគ្រូពេទ្យស្ម័ត្រចិត្តមកព្យាបាលជំងឺ ជូនប្រជាជនដោយឥតគិតថ្លៃ ព្រមទាំងបានផ្លាស់ប្តូរនូវដំណើរទស្សនកិច្ចសិក្សាពីគ្នាទៅវិញទៅមកផងដែរ ។
លោក ពិន ប្រាកដ មានប្រសាសន៍ទៀតថា បើទោះបីជាខេត្តមានសម្ព័ន្ធមេត្រីភាពជាមួយគ្នាក៏ពិតមែន ប៉ុន្តែតម្រូវការចាំបាច់របស់ខេត្ត នូវតែស្វែងរកដៃគូចូលមកវិនិយោគក្នុងខេត្តជាបន្តលើវិស័យកសិកម្ម និង ទេសចរណ៍ ដើម្បីបំពេញនូវតម្រូវការរបស់ភ្ញៀវ ខណៈនៅក្នុងខេត្តសៀមរាប មានក្រុមហ៊ុន និងសហគ្រាសឯកបុគ្គលជនជាតិកូរ៉េ ដែលកំពុងធ្វើអាជីវកម្មនៅខេត្ត មានចំនួន៥០៦ ក្នុងនោះក្រុមហ៊ុនមាន ១៥១ , ក្រុមហ៊ុនវិនិយោគ ចំនួន ៣ , សាខាក្រុមហ៊ុន ១៦ , សាខាក្រុមហ៊ុនបរទេស ១ និង សហគ្រាសឯកបុគ្គល ចំនួន ៣៣៥ ។
ជាមួយនឹងការថ្លែងអំណរគុណដល់រដ្ឋបាលខេត្តសៀមរាប ដែលបានទទួលស្វាគមន៍យ៉ាងរាក់ទាក់ចំពោះគណៈប្រតិភូខេត្តជុងចុងណាំដូ ក្នុងដំណើរទស្សនកិច្ចនៅលើទឹកដីខេត្តសៀមរាបនោះ លោក Na Sa-yeol មានប្រសាសន៍ថា ក្នុងដំណើរទស្សនកិច្ចនាពេលនេះ គឺដើម្បីធ្វើកិច្ចពិភាក្សាការងារមួយចំនួន ជាមួយរដ្ឋបាលខេត្តសៀមរាប ដោយផ្តោតសំខាន់ទៅលើវិស័យកសិកម្ម និង ទេសចរណ៍ រួមទាំងការងារផ្សេងៗទៀត រួមទាំងធ្វើការដកពិសោធន៍ពីគ្នាទៅវិញទៅមក សម្រាប់ជាមូលដ្ឋានគ្រឹះ ក្នុងកិច្ចអភិវឌ្ឍន៍ខេត្តយើងទាំងពីរ សៀមរាប និង ជុងចុងណាំដូ ក្នុងការពង្រឹងនៃចំណងសម្ព័ន្ធមេត្រីភាពនឹងគ្នា ហើយខាងភាគីកូរ៉េ នឹងបន្តធ្វើកិច្ចសហការរវាងគ្នាក្នុងកិច្ចសហប្រតិបត្តិការឲ្យកាន់ខ្លាំងក្លា និង ស៊ីជម្រៅ ទៅលើគ្រប់វិស័យ ទាំងនយោបាយ និង សេដ្ឋកិច្ច ដើម្បីធ្វើការលើកស្ទួយដល់សេដ្ឋកិច្ចរបស់ប្រជាជននៃខេត្តទាំងពីរផងដែរ ៕
អត្ថបទ និង រូបថត : លោក ម៉ី សុខារិទ្ធ និងលោក អ៊ិន សីហរិទ្ធ
កែសម្រួលអត្ថបទ : លោក លីវ សាន្ត
