ក្រោមការឧបត្ថម្ភគាំទ្របច្ចេកទេសសិក្សា ពីវិទ្យាស្ថានទេសចរណ៍ និងវិជ្ជាជីវៈទេសចរណ៍ខេត្តយូណាន នៃសាធារណរដ្ឋប្រជាមានិត ចិន កាលពីព្រឹកថ្ងៃទី២៨ ខែឧសភា ឆ្នាំ២០១៩នេះ មានរៀប ចំបើកវគ្គបណ្តុះបណ្តាលភាសាចិនសម្រាប់គ្រូបង្រៀនមគ្គុទ្ទេសក៍ទេសចរណ៍ភាសាចិន ដែលបានប្រព្រឹត្តនៅសណ្ឋាគារអង្គរខេត្តសៀមរាប ក្រោមអធិបតីភាព ឯកឧត្តម ប៉ាក់ សុខុម រដ្ឋលេខា ធិការក្រសួងទេសចរណ៍ និងជាតំណាងដ៏ខ្ពង់ខ្ពស់ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ , លោក ពៅ ពិសិដ្ឋ អភិបាលរងខេត្ត និងជាតំណាងឯកឧត្តម ទៀ សីហា អភិបាលខេត្តសៀមរាប , ឯកឧត្តម CHEN Dehai អគ្គលេខាធិការមជ្ឈមណ្ឌលអាស៊ាន-ចិន , ឯកឧត្តម LUI Zhiji ប្រធានការិយា ល័យកុងសុលចិនប្រចាំខេត្តសៀមរាប , ឯកឧត្តម ថោង រដ្ឋស័ក អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិនៃក្រសួងទេសចរណ៍ ព្រមទាំងមានការចូលរួមពីមគ្គុទ្ទេសក៍ទេសចរណ៍ភាសាចិនប្រចាំតំបន់សៀមរាប-អង្គរ សរុបប្រមាណ ១០០ នាក់ ។
វគ្គបណ្តុះបណ្តាលនេះ បានផ្តោតសំខាន់ទៅលើ ៖
១- ការពង្រឹងសមត្ថភាពគ្រូបង្រៀនមគ្គុទ្ទេសក៍ទេសចរណ៍ភាសាចិន ដោយផ្អែកទៅលើវិធីសាស្ត្រថ្មី ក្នុងការបណ្តុះបណ្តាលភាសាចិន និងការបណ្តុះបណ្តាលគ្រូបង្គោល ,
២- ការអភិវឌ្ឍកម្មវិធីបណ្តុះបណ្តាលភាសាចិនលក្ខណៈជាប្រព័ន្ធ សម្រាប់មគ្គុទ្ទេសក៍ទេសចរណ៍ភាសាចិន ,
៣- ការពង្រឹងកិច្ចសហប្រតិបត្តិការល្អប្រសើររវាងសាកលវិទ្យាល័យទេសចរណ៍ក្នុងបណ្តារដ្ឋជាសមាជិកអាស៊ាន ,
៤- ការពង្រឹងកម្រិតសមត្ថភាពជំនាញភាសាចិន ដល់គ្រូបង្រៀនមគ្គុទ្ទេសក៍ទេសចរណ៍ភាសាចិន ក្នុងបណ្តារដ្ឋជាសមាជិកអាស៊ាន និង
៥- ការពង្រឹងសមត្ថភាពជំនាញភាសាចិន ដល់ប្រជាពលរដ្ឋមូលដ្ឋាន ក៏ដូចជាយល់ដឹងស៊ីជម្រៅពីវប្បធម៌ចិន ៕
អត្ថបទ និង រូបថត : លោក អ៊ិន សីហរិទ្ធ
កែសម្រួលអត្ថបទ : លោក លីវ សាន្ត
