នៅរសៀលថ្ងៃទី២៨ ខែឧសភា ឆ្នាំ២០១៩នេះ មន្ត្រីសាខាកាំកុងត្រូលខេត្តសៀមរាប សហការជាមួយមន្ទីរពាណិជ្ជកម្មខេត្ត អាជ្ញាធរដែនដី និងគណៈគ្រប់គ្រងផ្សារ បានចុះប្រតិបត្តិការត្រួតពិនិត្យទៅលើភាពមិនប្រក្រតី នៃទំនិញម្ហូបអាហារ នៅផ្សារទំនើបចំនួន២ ស្ថិតនៅភូមិតាភុល សង្កាត់ស្វាយដង្គំ ក្រុងសៀមរាប ។
លោក ព្រៅ ខេមរិន្ទ ប្រធានសាខាកាំកុងត្រូលខេត្តសៀមរាប មានប្រសាសន៍ថា ចំពោះការដកហូតម្ហូបចំណីអាហារ និងគ្រឿងកំប៉ុងផ្សេងៗ ដែលបានដាក់តាំងលក់នៅក្នុងផ្សារទំនើប ក្នុងក្រុងសៀមរាបទាំងពីនេះ បន្ទាប់ពីបានត្រួតពិនិត្យ និងធ្វើតេស្តរួចមក គឺនៅផ្សារទំនើបត្រីកោណ កម្លាំងជំនាញបានដកហូតទំនិញហួសកាលបរិច្ឆេទ សរុបទាំងអស់ ៤គីឡូក្រាម គិតទាំងសំបក ដូចជា៖ (Hot Dog) សាច់ក្រក សាច់មាន់មានចំណុះ ៥០០ក្រាម គុណនឹង ៥កញ្ចប់ និង ការ៉ែម (Melon) របស់ថៃ មានចំណុះ៦០ក្រាម គុណនឹង ២៣កញ្ចប់ ។
ដោយឡែកនៅម៉ាត ចៅ សាំង ហុក វិញមន្ត្រីជំនាញបានដកហូតនូវទំនិញផុតកាលបរិច្ឆេទ សរុបបរិមាណទាំងអស់ ៩.២គីឡូក្រាម ដូចជា ៖ នំប៉ាវចំណុះ៣៦០ក្រាម គុណនឹង ១៧កញ្ចប់ , Hot Dog សាច់ក្រក សាច់ជ្រូកមានចំណុះ ១គីឡូក្រាម គុណនឹង ២ កញ្ចប់ , យ៉ាអួរមានចំណុះ ១៣៥ក្រាម គុណនឹង ២កំប៉ុង ហើយទំនិញទាំងអស់នេះ ត្រូវបានមន្ត្រីជំនាញដកហូតយកទៅរក្សាទុកនៅមន្ទីររបស់ខ្លួន ដើម្បីធ្វើការកំទេចចោលនៅពេលក្រោយ ៕
អត្ថបទ និង រូបថត : លោក ស៊ាន សុផាត
កែសម្រួលអត្ថបទ : លោក លីវ សាន្ត
