កាលពីរសៀលថ្ងៃទី២៨ ខែឧសភា ឆ្នាំ២០១៩ម្សិលមិញនេះ លោក ពិន ប្រាកដ អភិបាលរងខេត្ត និងជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាលខេត្តសៀមរាប បានជួបពិភាក្សាការងារជាមួយលោក Na Sa-yeol អភិបាលរងខេត្តជុងចុងណាំដូ នៃសាធារណរដ្ឋកូរ៉េខាងត្បូង ក្នុងគោលបំណង ដើម្បីផ្លាស់ប្តូរបទពិសោធន៍ទៅវិញទៅមក សម្រាប់ជាមូលដ្ឋានគ្រឹះ ក្នុងកិច្ចអភិវឌ្ឍន៍លើវិស័យទេសចរណ៍ ឲ្យកាន់តែមានការរីកចម្រើន ព្រមទាំងពង្រឹងចំណងសម្ព័ន្ធមេត្រីភាពឲ្យកាន់រឹងមាំរវាងខេត្តទាំងពីរ ដោយមានការចូលរួមពីសំណាក់លោក លោកស្រី ជានាយករងរដ្ឋបាលខេត្ត , នាយកទីចាត់ការចំណុះសាលាខេត្ត , ថ្នាក់ដឹកនាំ មន្ទីរ អង្គភាពពាក់ព័ន្ធជុំវិញខេត្ត និងសហការី អមដំណើគណៈប្រតិភូខេត្តជុងចុងណាំដូ នៃសាធារណរដ្ឋកូរ៉េខាងត្បូង សរុបចំនួន៤០នាក់។
ក្នុងឱកាសនោះ លោក Na Sa-yeol បានធ្វើការកោតសរសើរលើការអភិវឌ្ឍ និង ការរីកចម្រើនយ៉ាងឆាប់រហ័សរបស់ខេត្តសៀមរាប ហើយលោកសន្យានឹងបន្តធ្វើកិច្ចសហការល្អរវាងគ្នា ក្នុងកិច្ចសហប្រតិបត្តិការឲ្យកាន់តែខ្លាំងក្លា និងស៊ីជម្រៅលើគ្រប់វិស័យ ទាំងនយោបាយ សេដ្ឋកិច្ច សុខាភិបាល អប់រំ និងកីឡា ដើម្បីធ្វើការអភិវឌ្ឍន៍លើកស្ទួយដល់សេដ្ឋកិច្ចប្រទេស ជាតិ និងសេដ្ឋកិច្ច ប្រជាជននៃខេត្តទាំងពីរ ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
