សមត្ថកិច្ចនគរបាលខេត្តសៀមរាប បានឲ្យដឹងថា កាលពីវេលាម៉ោង១៦ ថ្ងៃទី២៨ ខែឧសភា ឆ្នាំ២០១៩ម្សិលមិញនេះ មានជនជាតិអាមេរិកម្នាក់បានស្លាប់ នៅបន្ទប់លេខ២១ នៃផ្ទះសំណាក់កាហ្វូកប៊ូទិច ស្ថិតក្នុងភូមិស្លក្រាម សង្កាត់ស្លក្រាម ក្រុងសៀមរាប ឈ្មោះ FERGUSON THOMAS JOHN ភេទប្រុស ជនជាតិ អាមេរិក ឆ្នាំកំណើត១៩៤៥ មុខរបរជាភ្ញៀវទេសចរណ៍ កាន់លិខិតឆ្លងដែន លេខ 505859158 បានចូលតាមច្រកទ្វារព្រលានយន្ថហោះអន្តរជាតិសៀមរាប កាលពីថ្ងៃទី០៤ ខែមីនា ឆ្នាំ២០១៩ ហើយបានស្នាក់នៅបន្ទប់លេខ២១ នៃផ្ទះសំណាក់កាហ្វូកប៊ូតិចនេះ ហើយបើតាមការបំភ្លឺរបស់បុគ្គលិក ដែលប្រចាំការ និងរៀបចំបន្ទប់ បានបញ្ជាក់ថា នៅវេលាម៉ោង១៦ ថ្ងៃទី២៨ ខែឧសភានេះ ខ្ញុំឆ្ងល់មិនឃើញភ្ញៀវចេញពីបន្ទប់ រួមក៏អើតមើលតាមបង្អួច បានឃើញភ្ញៀវដេកដួលនៅលើការ៉ូជិតតុ និង ហៅមិនឆ្លើយ រួចបានរាយការណ៍ជូនប៉ូលីស ។
សមត្ថកិច្ច បានឲ្យដឹងទៀតថា ការពិនិត្យនៅលើខ្លួនសព ពុំមានស្លាកស្នាមអ្វីដែលគួរឲ្យកត់សំគាល់ឡើយ ហើយបើតាមការសន្និដ្ឋានរបស់លោកវេជ្ជបណ្ឌិត អ៊ិត ឆបឆរ័ត្ន គ្រូពេទ្យអមសាលាដំបូងខេត្ត បានឲ្យដឹងថា សពជនរងគ្រោះស្លាប់ដោយសារដាច់សសៃឈាមខួរក្បាល ហើយសពជនរងគ្រោះ បានយកទៅរក្សាទុកនៅមន្ទីរពេទ្យមិត្តភាពខ្មែរ-សូវៀត នៅរាជធានីភ្នំពេញ ដើម្បីរងចាំក្រុមគ្រួសារមកទទួលយក ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
