អាគារសិក្សាមួយខ្នង ស្មើនឹង ៣បន្ទប់ ត្រូវបានសម្ពោធដាក់ឲ្យប្រើប្រាស់ជាផ្លូវការ ស្ថិតនៅសាលាបឋមសិក្សា ព្រៃធំ សង្កាត់ស្រង៉ែ ក្រុងសៀមរាប នាព្រឹកថ្ងៃទី២៩ ខែឧសភា ឆ្នាំ២០១៩ ក្រោមអធិបតីភាព ឯកឧត្តមបណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប រួមនឹងលោកប្រធានអង្គការ មូលនិធិកសាងអនាគតល្អប្រសើរ (BBFF)។
ឯកឧត្តមបណ្ឌិត សៀង ណាំ មានប្រសាសន៍ក្នុងឱកាសនោះថា សមិទ្ធផលអាគារមួយខ្នងនេះ គឺជាអំណោយរបស់សប្បុរសជនអូស្ត្រាលី តាមរយៈអង្គការមូលនិធិកសាងអនាគតល្អប្រសើរ (BBFF)។
ឯកឧត្តមបណ្ឌិត បានគូសបញ្ជាក់ថា នាយករដ្ឋមន្ត្រីនៃកម្ពុជា គឺសម្តេចតេជោ ហ៊ុន សែន បានចាត់ទុកវិស័យអប់រំ ជាវិស័យអាទិភាពមួយ ក្នុងចំណោមវិស័យអាទិភាពផ្សេងៗទៀត ដែលជាឆ្អឹងខ្នង នៃការអភិវឌ្ឍសង្គម និងប្រទេសជាតិ ។ ក្នុងន៍យនេះដែរ ការអប់រំកសាងសមត្ថភាពកុមារតូចនៅថ្នាក់មត្តេយ្យសាលា និង ថ្នាក់បឋមសិក្សា គឺជាមូលដ្ឋាននៃការចាប់ផ្តើមមួយដ៏សំខាន់ក្នុងប្រព័ន្ធអប់រំសិក្សា ដើម្បីបង្កើតគ្រឹះរឹងមាំនិងសមត្ថភាពពេញលេញ របស់សិស្សកុមាតូច ឆ្ពោះទៅរកឱកាស នៃការបន្តការសិក្សាទទួលបានជោគជ័យនៅគ្រប់កម្រិតសិក្សា ប្រកបដោយគុណភាពខ្ពស់ ដើម្បីក្លាយខ្លួនជាយុវជន-យុវនារីល្អ ជាអ្នកបន្តវេនដ៏ក្លៀវក្លាក្នុងការដឹកនាំអភិវឌ្ឍប្រទេសជាតិទៅថ្ងៃអនាគត ដែលភាសាសាមញ្ញក្នុងសង្គមខ្មែរនិយាយថា ទំពាំងស្នងឬស្សី នោះ ។
ឯកឧត្តមបណ្ឌិតបានបន្ថែមថា សន្តិភាព គឺជាកត្តាដ៏សំខាន់ ដែលជាមូលដ្ឋានក្នុងបង្កើតឲ្យមានបរិស្ថាននៃបរិយាកាសសង្គមមួយ បើកច្រកយ៉ាងទូលំទូលាយ ទទួលយកនូវការចូលរួមពីគ្រប់មជ្ឍដ្ឋាន លើវិថីនៃការអភិវឌ្ឍជាតិ ។ លើជ្រុងមួយនៅក្នុងកត្តាសន្តិភាពនេះ បណ្តាអង្គការអន្តរជាតិក្រៅរដ្ឋាភិបាលនានាមួយផ្នែក ក្នុងសកម្មភាពមនុស្សធម៌ ក៏មានឱកាសយ៉ាងពេញលេញ ដើម្បីបំពេញបេសកកម្មជាអន្តរជាតិរបស់ខ្លួន លើទឹកដីនៃមាតុភូមិកម្ពុជា ដែលធ្លាប់ទទួលរងវិនាសកម្មដោយរបបប្រល័យពូជសាសន៍ ។
លោក Glen Winkler ប្រធានអង្គការមូលនិធិកសាងអនាគតល្អប្រសើរ ( BBFF ) ឲ្យដឹងថា បេសកកម្មរបស់ អង្គការលោក គឺត្រូវធ្វើការជាមួយសហគមន៍ដោយផ្ទាល់ ជួយដល់កុមារ ដែលកំពុងរស់នៅក្នុងគ្រួសារក្រីក្រ សម្រួលលទ្ធភាពឲ្យពួកគេទទួលបាននូវការអប់រំ បង្កើតចំណេះដឹងនិងជំនាញ ដែលទាំងនោះ វាជាការបង្កើតឱកាសឲ្យពួកគេ បានកសាងអនាគតល្អប្រសើរ ។ នៅក្នុងមូលដ្ឋានសហគមន៍ព្រៃធំនេះ កម្មវិធីរបស់ អង្គការមូលនិធិកសាងអនាគតល្អប្រសើរ បានផ្តល់អាហារូបករណ៍សម្រាប់សិស្ស ដែលស្ថិតក្នុងគ្រួសារក្រីក្រចំនួន ១៥០នាក់ជារៀងរាល់ឆ្នាំ ដែលមិនត្រឹមតែជាឯកសណ្ឋានសិស្ស និងសម្ភារៈសិក្សាប៉ុណ្ណោះទេ តែត្រូវបានគិតគូរដល់បញ្ហាម្ហូបអាហារសម្រាប់សិស្សទាំងនោះផងដែរ ហើយលើសពីនេះ អង្គការនេះ ត្រូវបានអនុវត្តកម្មវិធីរបស់ខ្លួន ដោយជួយដល់សហគមន៍លើផ្នែកសុខុមាភាព តាមរយៈនៃការកសាងលទ្ធភាពប្រើប្រាស់ទឹកស្អាត រួមចំណែកជាមួយអាជ្ញាធរដែនដី កាត់បន្ថយភាពក្រីក្រ ជូនប្រជាពលរដ្ឋក្នុងសហគមន៍គោលដៅ ស្របតាមកម្មវិធីនយោបាយរបស់រាជរដ្ឋាភិបាល ផងដែរ។
សូមជម្រាបថា អង្គការមូលនិធិកសាងអនាគតល្អប្រសើរ (BBFF) ត្រូវបានបង្កើតឡើងនៅក្នុងឆ្នាំ ២០១៣ បន្ទាប់ពីមានដំណើរទស្សនកិច្ចមួយមកកាន់ខេត្តសៀមរាប ដោយនាយកក្រុមហ៊ុន Kris Matzick និង នាយក Junior Cassandra ។ អង្គការមូលនិធិកសាងអនាគតល្អប្រសើរ គឺជាអង្គការសប្បុរសធម៌ បំពេញការងារដោយស្ម័គ្រចិត្ត មានចក្ខុវិស័យដោយផ្តោតទៅការលើកកម្ពស់សុខុមាលភាព និង គាំទ្រលើវិស័យអប់រំសម្រាប់សហគមន៍ នៃ ប្រទេសកំពុងអភិវឌ្ឍន៍។
អត្ថបទ និង រូបថត៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
