ស្ត្រីជាភ្ញៀវទេសចរជនជាតិអ៊ីរ៉ង់ម្នាក់ ក្នុងចំណោមពីរនាក់ ទទួលរងគ្រោះថ្នាក់ធ្លាក់ពីលើរ៉ឺម៉ក់ម៉ូតូកង់បី បណ្ដាលឲ្យ របួសជាំភ្នែកខាងស្តាំ និង រលាត់ដៃជើង ក្នុងករណីចោរឆក់កាបូប កាលពីថ្ងៃទី ២៦ ខែឧសភា ឆ្នាំ២០១៩ មានបណ្តាគេហ៍ទំព័រមួយចំនួន ដែលបានធ្វើការសម្ភាសន៍រូបគាត់ និងផ្សព្វផ្សាយជាសាធារណៈ ដោយពុំមានការអនុញ្ញាតពីស្ត្រីរងគ្រោះរូបនោះ។
ស្ត្រីបរទេសរងគ្រោះរូបនោះ បានសម្តែងនូវការសោកស្តាយយ៉ាងខ្លាំង ដែលអ្នកសារព័ត៌មានខ្វះវិជ្ជាជីវៈមួយចំនួនបានធ្វើការផ្សព្វផ្សាយព័ត៌មានគ្រោះថ្នាក់របស់គាត់ជាសាធារណ ដោយពុំបានសុំរអនុញ្ញាតពីរូបគាត់។
ស្ត្រីបរទេសរងគ្រោះរូបនោះ បានបញ្ជាក់ថា អ្នកស្រីមានការព្រួយបារម្ភជាខ្លាំង ដោយសារការមកទស្សនាក្នុងខេត្តសៀមរាប ជាពិសេសប្រាសាទអង្គរវត្ត អ្នកស្រីបានលាក់បាំងដំណើរកំសាន្តនេះ ពីក្រុមគ្រួសាររបស់អ្នកស្រី។ មួយវិញទៀត អ្នកស្រីក៏មានការបង្ហាញពីស្នាកស្នាមរបួសនៅនឹងមុខអ្នកស្រី ដែលអាចនឹងបង្កជាភាពអវិជ្ជមានមួយយ៉ាងខ្លាំង ចំពោះកូនស្រី អាយុ១៤ឆ្នាំ ដែលបានកំពុងធ្វើការប្រឡង ដែលនាំឲ្យបាត់បង់ស្មារតី នៅពេល ដែលឃើញម្តាយរបស់ខ្លួនមានគ្រោះថ្នាក់ តាមរយៈគេហ៍ទំព័រទាំងនេះ ។
គួររម្លឹកថា បន្ទាប់ពីឃាត់ខ្លួនបានជនសង្ស័យ២រូប នៅថ្ងៃទី ២៩ ខែឧសភា ឆ្នាំ២០១៩ ឯកឧត្តម ទៀ សីហា អភិបាលខេត្តសៀមរាប បានសម្ដែងការសោកស្ដាយអំពីករណីចោរឆក់ការបូប ភ្ញៀវទេសចរជនជាតិអ៊ីរ៉ង់២រូបនេះ និងធានារ៉ាប់រងលើការចំណាយការព្យាបាលរបួស ស្នាក់នៅ ហូបចុក ព្រមទាំងសំបុត្រយន្តហោះធ្វើទៅក្រុងបាងកក ប្រទេសថៃ។
អត្ថបទ និង រូបថត៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
