ថ្លែងក្នុងសិក្ខាសាលាវាយតម្លៃចុងក្រោយរបស់ខ្លួនសម្រាប់ដំណាក់ កាលទី២ក្នុងតំបន់ឥណ្ឌូ-ភូមា នៅខេត្តសៀមរាប កាលពីពេលថ្មីៗនេះ លោក អ៊ុក វិបុល ប្រធាននាយកដ្ឋានអភិរក្សជល ផល នៃរដ្ឋបាលជលផល ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ការផ្តល់ជំនួយរបស់មូលនិធិភាពជាដៃគូសម្រាប់ប្រព័ន្ធអេកូឡូស៊ីដែលរងការគម្រាមកំហែង សម្រាប់ទៅលើការងារអភិរក្សជីវៈចម្រុះ គឺពិតជាមានសារៈសំខាន់ ដោយបានរួមចំណែកដល់គោលនយោបាយអភិរក្សជីវចម្រុះ និងជលផលរបស់រាជរដ្ឋាភិបាលកម្ពុជា ជាពិសេសការកំណត់អត្តសញ្ញាណកាលានុវត្តភាពថ្មីៗ និងអាទិភាពសម្រាប់ការអភិរក្សជីវចម្រុះនៅក្នុងតំបន់ ខណៈដែលសម្រាប់វិស័យជលផលអង្គការសហភាពអន្តរជាតិដើម្បីការអភិរក្សធម្មជាតិ បានសហការជាមួយរដ្ឋបាលជលផល បានកំណត់តំបន់ដែលមានជីវៈចម្រុះច្រើន ហើយកំពុងទទួលការគំរាមគំហែង និងបានកំពុងគិតគូរខ្ពស់ទៅលើការអភិរក្សប្រភេទសត្វដែលប្រឈមការគ្រោះថ្នាក់ខ្លាំង ដូចជាអណ្តើក , ត្រីរាជ , ត្រីគោលរាំង , ផ្សោត និង កន្ទាយក្បាលអង្កែបជាដើម ។
លោក គង់ គឹមស្រេង ប្រធាននាយកដ្ឋានអភិរក្សដីគោកខាងត្បូងបឹងទន្លេរសាប នៃក្រសួងបរិស្ថាន បានមានប្រសាសន៍ថា បច្ចុប្បន្ននេះក្រសួងបរិស្ថានគ្រប់គ្រងតំបន់ការពារធម្មជាតិជាង៥០តំបន់នៅលើផ្ទៃដីជាង៧លានហិកតា ដោយមន្ត្រីអភិរក្សជាច្រើន បានធ្វើការងារការពារតំបន់អភិរក្សទាំងនេះ ប៉ុន្តែសម្រាប់ថវិកាអនុវត្តការងារនេះនៅមានកម្រិត ដូច្នេះការផ្តល់ជំនួយរបស់មូលនិធិភាពជាដៃគូសម្រាប់ប្រព័ន្ធអេកូឡូស៊ីដែល រងការគម្រាមកំហែង ទៅដល់អង្គការដៃគូសម្រាប់យកមកចូលរួមធ្វើការងារអភិរក្សនៅតំបន់ការពារធម្មជាតិនេះ ជាកត្តាមួយដ៏ល្អប្រសើរ ។
លោក សោម ស៊ីថា ទីប្រឹក្សាបច្ចេកទេស នៃអង្គការសមាគមអភិរក្សសត្វព្រៃកម្ពុជា បានថ្លែងថា អង្គការរបស់លោកទទួលបានគម្រោងជំនួយជាច្រើនពីមូលនិធិភាពជាដៃគូសម្រាប់ប្រព័ន្ធអេកូឡូស៊ីដែលរងការគម្រាមកំហែង ហើយសម្រាប់លោកផ្ទាល់គឺបានកាន់គម្រោងចំនួនពីរ គឺមានគម្រោងអភិរក្សអណ្តើកលួងនៅខេត្តកោះកុង និងកន្ធាយក្បាលកង្កែបនៅតាមដងទន្លេមេគង្ ដូច្នេះប្រសិនបើគ្មានថវិកាទាំងនេះទេ យើងមិនអាចធ្វើការសិក្សាស្រាវជ្រាវ និងធ្វើការអភិរក្សសត្វទាំងនេះបានដែរ ។
លោក Scott Perkin ប្រធានក្រុមធនធានធម្មជាតិរបស់អង្គការសហភាពអន្តរជាតិដើម្បីការអភិរក្សធម្មជាតិ ប្រចាំតំបន់អាស៊ី បានមានស្រាសន៍ថា នៅក្នុងរយៈពេល៦ឆ្នាំ ចាប់ពីឆ្នាំ២០១៣ មកដល់បច្ចុប្បន្ននេះ មូលនិធិភាពជាដៃគូសម្រាប់ប្រព័ន្ធអេកូឡូស៊ីដែលរងការគម្រាមកំហែង បានផ្តល់ជំនួយជាង ១៨០ គម្រោង ដែលមានថវិកាជាង១៥លានដុល្លារអាមេរិក ទៅដល់ប្រទេសចំនួន៦ រួមមានប្រទេសកម្ពុជា , ឡាវ , មីយ៉ាន់ម៉ា , ថៃ , វៀតណាម , បូកផ្នែកខ្លះនៃប្រទេសបង់ក្លាដេស និងភាគខាងត្បូងប្រទេសចិន ហើយសម្រាប់ប្រទេសកម្ពុជាទទួលបានច្រើនជាងគេដោយសារតែ នៅកម្ពុជាមានតំបន់ការពារធនធានធម្មជាតិ និងជីវៈចម្រុះច្រើនសម្បូបែប ៕
អត្ថបទ និង រូបថត៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
