មានប្រសាសន៍ក្នុងកិច្ចប្រជុំពិភាក្សាការងារពាក់ព័ន្ធ ដើម្បីត្រៀមចុះរុះរើផ្ទាំងផ្សព្វផ្សាយពាណិជ្ជកម្មដែលពុំមានលិខិតអនុញ្ញាត ឬអស់សុពលភាព ឬខុសគោលការណ៍ច្បាប់ និងលិខិតបទដ្ឋានគតិយុត្តនានានៅក្នុងខេត្តសៀមរាប កាលពីថ្ងៃទី២៩ ខែឧសភា ឆ្នាំ២០១៩នេះ លោក នាក់ ណេរ៉ុន បានជំរុញ ឱ្យ អាជ្ញា ធរក្រុង-ស្រុក និង មន្ទីរ អង្គភាពពាក់ព័ន្ធទាំងអស់ក្នុងខេត្ត ត្រូវត្រួតពិនិត្យឱ្យបានច្បាស់លាស់មុនអនុញ្ញាតច្បាប់ ដល់ប្រជាពលរដ្ឋ ឬក្រុមហ៊ុន លើការដាក់ស្លាកយីហោ ប៉ាណូផ្សព្វផ្សាយពាណិជ្ជកម្ម រួមទាំងបន្តចុះរុះរើផ្ទាំង និងស្លាកយីហោប៉ាណូ ដែលគ្មានច្បាប់ ដើម្បីរៀបចំសោភ័ណភាព សណ្តាប់ធ្នាប់សាធារណៈឱ្យសក្ដិសមជាខេត្តទេសចរណ៍ ។
លោក នាក់ ណេរ៉ុន មានប្រសាសន៍ទៀតថា ជាមួយគ្នានេះ សូម ឱ្យអាជ្ញាធរក្រុងស្រុក បន្តផ្សព្វផ្សាយ និងជំរុញប្រជាពលរដ្ឋ ឬក្រុមហ៊ុន មានស្លាកយីហោ ឬផ្ទាំងផ្សព្វផ្សាយដែលអស់សុពលភាព ឬគ្មានលិខិតអនុញ្ញាត ត្រូវមកបំពេញបែបបទស្នើសុំលិខិតអនុញ្ញាតពីច្រកចេញចូលតែមួយ នៃរដ្ឋបាលក្រុង-ស្រុក ក្រោមទំហំ៤ម៉ែត្រក្រឡា និងទំហំចាប់ពី ៤ម៉ែត្រក្រឡាឡើងទៅ ត្រូវមកបំពេញបែបបទ នៅច្រកចេញចូលតែមួយរដ្ឋបាលខេត្តសៀមរាប ហើយជំហ៊ានដំបូងនេះ អាជ្ញាធរនឹងធ្វើការចុះកាត់ ឬរុះរើស្លាកយីហោ ប៉ាណូ ផ្សព្វផ្សាយពាណិជ្ជកម្មដែលមាននៅជាប់ចិញ្ចឹមផ្លូវហើយគ្មានច្បាប់អនុញ្ញាតត្រឹមត្រូវ ឬមួយចំនួនអស់សុពលភាព ។
បើតាមប្រសាសន៍របស់លោក អ៊ឹង សុភ័ណ នាយកទីចាត់ការអន្តរវិស័យសាលាខេត្តសៀមរាប បានឱ្យដឹងថា ក្រុមការងាររបស់រដ្ឋបាលខេត្ត និងក្រុងស្រុក នឹងចាប់ផ្តើមយុទ្ធនាការនេះ ចាប់ពីថ្ងៃទី០៣ ខែមិថុនា ឆ្នាំ២០១៩ខាងមុខនេះ ដែលចាប់ផ្តើមដំបូងនៅក្នុងក្រុងសៀមរាប និងស្រុកតាមបណ្តោយជាប់ផ្លូវជាតិលេខ៦ ហើយចំពោះការរុះរើផ្ទាំងផ្សព្វផ្សាយពាណិជ្ជកម្មចល័ត និងអចល័ត ស្លាកយីហោ ប៉ាណូ របារកាត់ទទឹងផ្លូវ និង ប្រអប់ភ្លើង LED ដែលមានការខូចខាតទ្រព្យសម្បត្តិផ្សេងៗ រដ្ឋបាលខេត្តសៀមរាប ពុំទទួលខុសត្រូវឡើយ ។
ព័ត៌មានជាតិ ថ្មីៗ
គួររំលឹកថា រដ្ឋបាលខេត្តសៀមរាប បានចេញសេចក្តីជូនដំណឹងចំនួន០៣ដងរួចមកហើយ ដើម្បីឲ្យម្ចាស់សណ្ឋាគារ , ផ្ទះសំណាក់ , ភោជនីដ្ឋាន , ក្រុមហ៊ុន ឬគ្រឹះដ្ឋានស្ថានមីក្រូវត្ថុនានា ព្រមទាំងប្រជាពលរដ្ឋ និងម្ចាស់អាជីវកម្មដ្ឋានទាំងអស់ ចូលរួមសហការ និងសុំច្បាប់ដើម្បីដំឡើងស្លាកយីហោ ប៉ាណូផ្សព្វផ្សាយពាណិជ្ជកម្មឱ្យបានត្រឹមត្រូវ ក្នុងន័យកែប្រែសោភ័ណភាព សណ្តាប់ ធ្នាប់ សាធារណៈ និងបញ្ចៀសបានហានិភ័យគ្រោះថ្នាក់មួយចំនួនកើតឡើងដោយយថាហេតុ ៕
អត្ថបទ ៖ លោក បុង ឆវ័ន
រូបថត៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
