នៅថ្ងៃទី២៨ និងថ្ងៃទី២៩ ខែឧសភា ឆ្នាំ២០១៩នេះ ក្រុមការងារចម្រុះរដ្ឋបាលខេត្តសៀមរាប ក្រោមការដឹកនាំដោយ ហែន ពុទ្ធី នាយករងរដ្ឋបាលសាលាខេត្ត ដែលមានសមាសភាពចូលរួមពីទីចាត់ការអន្តរវិស័យសាលាខេត្ត , មន្ទីររ៉ែ និងថាមពលខេត្ត , មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត , មន្ទីរសាធារណការ និងដឹកជញ្ជូនខេត្ត , មន្ទីរបរិស្ថានខេត្ត , រដ្ឋបាលស្រុកប្រាសាទបាគង និងរដ្ឋបាលស្រុកបន្ទាយស្រី បានចុះពិនិត្យការសាងសង់ស្ថានីយប្រេងឥន្ធនៈ គ្រប់ប្រភេទ ដែលគ្មានលិខិតអនុញ្ញាតត្រឹមត្រូវ ពីក្រសួងជំនាញសមត្ថកិច្ច ស្ថិតនៅតាមបណ្តោយផ្លូវលេខ ៦៧ ក្នុងភូមិសាស្ត្រស្រុកប្រាសាទបាគង និងស្រុកបន្ទាយស្រី បានចំនួន០៨ទីតាំង ។
ជាមួយគ្នានេះ ក្រុមការងារចម្រុះ បានធ្វើកំណត់ហេតុបញ្ឈប់ការសាងសង់សំណង់ ដោយតម្រូវឲ្យម្ចាស់ទៅបំពេញបែបបទដាក់ពាក្យស្នើសុំការអនុញ្ញាតតាមរយៈច្រកចេញចូលតែមួយរបស់រដ្ឋបាលខេត្ត និងក្រសួងស្ថាប័នជំនាញជាមុន និងមុនដំណើរការសាងសង់ស្ថានីយ៍ ហើយក្រុមការងារ ក៏បានណែនាំឱ្យរដ្ឋបាលស្រុកពាក់ព័ន្ធ និងមន្ទីរជំនាញ បន្តតាមដានលើទីតាំងទាំងអស់ដែលបានបញ្ឈប់ផងដែរ ។
សូមបញ្ជាក់ដែរថា ក្រុមការងារចម្រុះ នឹងបន្តចុះពិនិត្យរាល់ទីតាំងទាំងអស់ក្នុងខេត្តសៀមរាបផងដែរ ៕
អត្ថបទ និង រូបថត៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
