នៅព្រឹកថ្ងៃទី៣១ ខែឧសភា ឆ្នាំ២០១៩ នៅវត្តប្រាសាទគោកចក ស្ថិតក្នុងក្រុងសៀមរាប ខេត្តសៀមរាប បានរៀបចំពិធីបុណ្យផ្កាប្រាក់សាមគ្គី និងឆ្លងសសរសាលាឆាន់ ដើម្បីប្រមូលថវិការយកមកកសាងសាលាឆាន់ និងសមទ្ធិផលផ្សេងៗទៀតនៅក្នុងវត្ត ដោយមានការអញ្ជើញចូលរួមពីសំណាក់ ឯកឧត្តម អ្នកឧកញ៉ា សៀង ណាំ សមាជិកសភា និងតំណាងរាស្ត្រមណ្ឌលសៀមរាប ព្រមទាំងសប្បុរសជននានា និងប្រជាពលរដ្ឋជាច្រើនផងដែរ ។
ព្រះគ្រូវិចិត្តវង្សា ហែម គឹមសាន ព្រះចៅអធិការ វត្តប្រាសាទគោកចក មានថេរដិកាឱ្យដឹងថា សាលាឆាន់ដែលកសាងនេះ មានទទឹង៣០ម៉ែត្រនិងបណ្តោយ៤០ម៉ែត្រ កំពស់មួយជាន់ស្មើ ១៨ម៉ែត្រ ចាក់បេតុងប្លងសេមួយសន្លឹក ហើយពេលនេះ កំពុងរៀបចំរន្ទា ដើម្បីចាក់ប្លង់សេ ហើយបានសាងសង់ចាប់ដំណើរការ ពី ខែឧសភា ឆ្នាំ២០១៨មក បានចំណាយសរុបអស់ចំនួន ៦ម៉ឺនដុល្លារ ទៅលើថ្លៃស៊ីម៉ង់ត៍ ដែក និង កម្មករ ដែលថវិកាទាំងនេះ បានមកពីការចូលរួមរបស់ថ្នាក់ដឹកនាំគ្រប់ជាន់ថ្នាក់ អាជ្ញាធរមូលដ្ឋាន ប្រជាពុទ្ឋបរិស័ទជិតឆ្ងាយ និងបានមកពីតាមរយៈពិធីបុណ្យផ្សេងៗក្នុងវត្ត។
ព្រះអង្គមានថិរៈដិកាបន្តថា ការចំណាយខាងលើ ពុំបានរាប់បញ្ចូលនូវសមិទ្ធផលមួយចំនួនដទៃទៀត ដូចជាការចាក់ដីបំពេញ ទីធ្លាវត្ត ធ្វើរបងវត្ត កុដិ, កំពែងព្រះពោធិព្រឹក្ស, ដងទង់ ឧបត្ថម្ភគ្រឿងឧបភោគបរិភោគដល់ជនក្រីក្រនិងបុណ្យសពគ្រួសារក្រីក្រ, សម្លៀកបំពាក់ប្រជាការពារសង្កាត់គោកចក, តម្លើងម៉ាស៊ីនវិទ្យុទាក់ទងមួយគ្រឿងធំ និងកិច្ចការចូលរួមការងារសង្គម ជាច្រើននោះជាដើម ហើយសមិទ្ធផលទាំងនេះ ពិតជាមិនអាចកើតឡើងបានឡើយ បើពុំមានការជួយជ្រោមជ្រែងគាំទ្រពីសំណាក់ ថ្នាក់ដឹកនាំគ្រប់លំដាប់ថ្នាក់ និង លោកយាយ លោកតា ពុទ្ធបរិស័ទ និងសប្បុរសជន គឺជាអ្នកជួយគាំទ្រទាំងធនធានថវិកា និងកម្លាំងកាយចិត្ត។
ឯកឧត្តម អ្នកឧកញ៉ា សៀង ណាំ មានប្រសាសន៍ថា ក្រោយថ្ងៃ៧ មករា ១៩៧៩ ប្រជាជនកម្ពុជាបានរំដោះរួចផុតពីគ្រោះប្រល័យពូជសាសន៏ និងផ្តើមចេញពីការ អនុវត្តគោលនយោបាយឈ្នះឈ្នះ និងក្រោមការដឹកនាំដ៏ត្រឹមត្រូវ របស់រាជរដ្ឋាភិ-បាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំប្រកបដោយគតិ-បណ្ឌិត បាននាំមកនូវសន្តិភាព ស្ថិរភាព និងការអភិវឌ្ឍលើគ្រប់វិស័យទូទាំងប្រទេស ទាំងពុទ្ធចក្រ និងអាណាចក្រ។ ពិតណាស់ក្រោយពីសម័យកម្ពុជាប្រជាធិបតេយ្យបានផុតរលត់ទៅ ព្រះពុទ្ធវិស័យសាសនា ត្រូវបានរស់រានមានជីវិត និងត្រូវបានរដ្ឋយកចិត្តទុកដាក់ធ្វើឲ្យមានការរីកចម្រើនឡើងវិញ ទាំងវិស័យធនធានមនុស្ស ធនធានសម្ភាររូបវន្តក្នុងក្របខ័ណ្ឌទូទាំងប្រទេស ដូចវិស័យនានាផងដែរ។
ឯកឧត្តម មានប្រសាសន៍បន្តថា សមិទ្ធិផលជិតនឹងសម្រេចបានថ្មីនេះ ជាផ្នែកមួយដ៏សំខាន់ រួមចំណែកក្នុងការអភិវឌ្ឍន៍នៃ វិស័យពុទ្ធចក្រដែលត្រូវបានកំណត់ដោយរដ្ឋធម្មនុញ្ញនៃព្រះរាជាណាចក្រកម្ពុជាយើងព្រះពុទ្ឋសាសនាជាសាសនារបស់រដ្ឋ ទន្ទឹមនឹងនេះ វិស័យពុទ្ឋចក្រនិងវិស័យអាណាចក្របានដើរទន្ទឹមគ្នាពុំអាចខ្វះមួយណាបានឡើយ ក្នុងការជួយចូលរួមជួយស្តារនិងអភិវឌ្ឍន័សង្គមជាតិឱ្យបានរីកចំរើន។ ឯកឧត្តម អ្នកឧកញ៉ា សៀង ណាំ ក៏បានថ្លែងនូវការកោតសរសើរចំពោះព្រះចៅអធិការ ព្រះសង្ឃ គណៈកម្មការ អាចារ្យវត្តប្រាសាទគោកចក និង អាជ្ញាធរដែនដី បងប្អូនប្រជាពលរដ្ឋ ព្រមទាំប្រជាពុទ្ធបរិស័ទគ្រប់មជ្ឈដ្ឋានដែលបានសាមគ្គី ចូលរួមចំណែកជាកម្លាំងកាយ កម្លាំងចិត្ត និងទ្រព្យធន ផ្តួចផ្តើមការកសាងសាលាឆាន់នេះទុកជាសម្បត្តិសាធារណៈទាំងអស់គ្នា ។
សូមបញ្ជាក់ផងដែរថា ថវិកាដែលវត្តទទួលបានពីអង្គផ្កាប្រាក់សម្រាប់កសាងសាលាឆាន់ ប្រាក់សរុបចំនួន ២៩លាន៨សែន៨ម៉ឺនរៀល និង២៨៩៩ដុល្លារអាមេរិក ហើយក្នុងនោះដែរ ឯកឧត្តម អ្នកឧកញ៉ា សៀង ណាំ បានឧបត្ថម្ភប្រគេនថវិកា ដល់ព្រះចៅអធិការវត្តប្រាសាទគោកចក ចំនួន៥០០ដុល្លារ និងប្រគេនរថយន្តមួយគ្រឿងទុកសម្រាប់ប្រើប្រាស់ក្នុងវត្ត ដើម្បីជួយសម្រួលដល់មធ្យោបាយធ្វើដំណើររបស់ព្រះសង្ឃ និងគណៈកម្មការអាចារ្យក្នុងវត្ត ព្រមទាំងជួយរ៉ាប់រងចេញនូវថវិកាថ្លៃបេតុងប្លង់សេសម្រាប់សាលាឆាន់វត្តនេះទៀតផង៕
អត្ថបទ និងរូបភាព៖ ងិន កឺមឡេង និងយូ វង្ស
