ក្រោមកិច្ចសហការរវាងមន្ទីអប់រំ យុវជន និងកីឡាខេត្តសៀមរាប ស្ថាប័នធានាគុណភាពជប៉ុន (JQA) សាកលវិទ្យាល័យសូហ្វីយ៉ានៃប្រទេសជប៉ុន និង អាជ្ញាធរជាតិអប្សរាបានអនុវត្តកម្មវិធីអប់រំបរិស្ថានកុមារដើម្បីបញ្ជ្រៀបចំណេះដឹងអំពីបរិស្ថាន នៅសាលាបឋមសិក្សាដូនឪ សាលាបឋមសិក្សាត្រពាំងស្វាយ និងសាលាបឋមសិក្សាគោកគ្រើល។ កម្មវិធីបញ្ជ្រៀបចំណេះដឹងបរិស្ថាននេះមានរយៈពេល៧ខែ ពោលគឺចាប់ផ្តើមពីខែវិច្ឆិកា ឆ្នាំ២០១៨ និងបានបិទបញ្ចប់នៅថ្ងៃទី៣០ ខែឧសភា ឆ្នាំ២០១៩។
ថ្លែងក្នុងពិធីបិទវគ្គ លោក Saturu KISHINO តំណាងស្ថាប័នធានាគុណភាពជប៉ុនបញ្ជាក់ថា ការ បណ្តុះគំនិតឱ្យកុមារមានទម្លាប់ចេះគិតនិងស្រឡាញ់បរិស្ថានពីក្មេង នឹងបណ្តុះគំនិតស្រឡាញ់បរិស្ថានរបស់ពួកគេកាន់តែ ច្រើននាពេលអនាគត។ កម្មវិធីនេះបានជំរុញការផ្លាស់ប្តូរឥរិយា បថរបស់សិស្សដើម្បីលុបបំបាត់ឬកាត់បន្ថយសំរាមក្នុងសាលារៀនឱ្យមានទេសភាពស្អាត។
លោក Saturu KISHINO បន្តថា លោកសង្ឃឹមជឿរជាក់ថា សិស្សានុសិស្សនិងសាលាទាំងអស់នឹងមានភាពម្ចាស់ការ ឯករាជ្យក្នុង ការថែរក្សាបរិស្ថានដោយខ្លួនឯង ព្រមទាំងអាចបង្រៀនសាលាផ្សេងៗឱ្យយល់ដឹងពីបរិស្ថានកាន់តែទូលំទូលាយ។
អ្នកគ្រូ អឿម វណ្ណៈ បង្រៀនថ្នាក់ទី៦ «ក» នៃសាលាបឋមសិក្សាដូនឪ បានឲ្យដឹងថា ក្រោយពីទទួលបានការអប់រំបរិស្ថាន សិស្សចេះសម្អាតបរិស្ថានជុំវិញខ្លួន ចេះញែកសំរាម និងបន្ថយការប្រើសំរាម ហើយយកចំណេះដឹងទៅអនុវត្តនៅ តាមសហគមន៍បានទៀតផង។ អ្នកគ្រូនឹងបន្តជំរុញនិងបណ្តុះស្មារតីសិស្សក្នុងការស្រឡាញ់បរិស្ថានដល់ពួកគេគ្រប់ជំនាន់ ព្រោះបរិស្ថានស្អាត នាំឱ្យមានសុខភាពល្អ និងអារម្មណ៍ស្រស់ថ្លា។
ឯកឧត្តម សុខ លក្ខិណា ប្រធានគ្រប់គ្រងប្រព័ន្ធបរិស្ថាននៃអាជ្ញាធរជាតិអប្សរា ក៏បានថ្លែង អំណរគុណដល់ស្ថាប័នធានាគុណភាពជប៉ុន ដែលបានចូលរួមជាមួយអាជ្ញាធរជាតិ អប្សរាក្នុងការជំរុញនិងលើកកម្ពស់បរិស្ថានដ៏មានប្រសិទ្ធិភាពក្នុងរមណីយដ្ឋានអង្គរ ព្រោះការងារបរិស្ថានចាំបាច់មានការចូលរួមទាំងអស់គ្នា និងប្រើរយៈពេលយូរ ទើបសម្រេចបានផល៕
អត្ថបទ និងរូបភាព ៖ ម៉ាត់ អារ៉ាហ្វីន និង អ៊ិន សីហរិទ្ធ
