នៅពីព្រឹកថ្ងៃទី៣១ ខែឧសភា ឆ្នាំ២០១៩នេះ រថយន្តគិលានសង្គ្រោះចំនួន៤គ្រឿង និងរថយន្តសម្រាប់បម្រើដល់ការងារពន្លត់អគ្គីភ័យចំនួន២គ្រឿង ត្រូវបានរដ្ឋបាលខេត្តឃ្យុងជី (Gyeonggi) នៃសាធារណៈរដ្ឋកូរ៉េ តាមរយៈលោក គីម វ៉ុនគី អនុប្រធានក្រុមប្រឹក្សាខេត្ត ឃ្យុងជី ប្រគល់ជូនរដ្ឋបាលខេត្តសៀមរាប ។
លោកគីម វ៉ុនគី បានឲ្យដឹងថា ការប្រគល់ជូននូវរថយន្តទាំង៦គ្រឿង ដល់រដ្ឋបាលខេត្តសៀមរាបនាពេលនេះ គឺជាការរឹតនូវចំណងមិត្តភាពនៃប្រទេសទាំងពីរកម្ពុជា កូរ៉េឲ្យកាន់តែជិតស្និត និងល្អប្រសើរជាងមុន ជាពិសេសរវាងខេត្តសៀមរាប និងខេត្តឃ្យុងជី។
នៅក្នុងពិធីទទួលរថយន្តនេះដែល ឯកឧត្តមទៀ សីហា អភិបាលខេត្តសៀមរាប ក៏បានថ្លែងនូវអំណរគុណចំពោះគណៈប្រតិភូខេត្តឃ្យុងជី ក៏ដូចជារដ្ឋាភិបាលកូរ៉េ ដែលតែងតែជួយឧបត្ថម្ភគាំទ្រដល់ប្រជាជនកម្ពុជា ហើយមិត្តកូរ៉េមិនមែនជួយកម្ពុជាយើងតែពេលនេះទេ គឺមិត្តកូរ៉េ តែងតែជួយដល់កម្ពុជាជាយូរមកហើយ។
ឯកឧត្តមបន្តថា ហើយសម្រាប់រថយន្តទាំង៦គ្រឿងដែលមិត្តកូរ៉េផ្តល់ជូននៅពេលនេះ នឹងជួយដល់រដ្ឋបាលខេត្តសៀមរាប នៅក្នុងការបម្រើសេវាសង្គ្រោះបន្ទាន់ រាល់ពេលមានបញ្ហាផ្សេងៗ ដល់ប្រជាពលរដ្ឋនៅក្នុងខេត្តសៀមរាប ក៏ដូចជាខេត្តផ្សេងៗទៀតជាប់នឹងខេត្តសៀមរាប កាន់តែមានប្រសិទ្ធភាព និងមានភាពប្រសើរឡើង៕
អត្តបទ៖ជា ស្រស់, ខេង ឧត្តម
