លោក ឡុង ប៊ុនហោ ប្រធានសមាគមចុងភៅកម្ពុជា និងជាប្រធានដឹកនាំសមាជិកប្រតិភូចូលរួមការប្រកួតនេះ បានឲ្យដឹងថា ៖ កម្មវិធីប្រកួតប្រជែង អាហារអាស៊ី ឆ្នាំ២០១៩ ត្រូវបានធ្វើឡើងនៅទីក្រុងបាងកក ប្រទេសថៃ បានចាប់ផ្តើមថ្ងៃទី២៦ ខែឧសភា និងប្រកាសលទ្ធផល នារាត្រីថ្ងៃទី០១ ខែមិថុនា ឆ្នាំ២០១៩ ដោយមានអ្នកចូលរួមប្រកួតមកពីប្រទេសថៃ , កម្ពុជា , ចិន , កូរ៉េខាងត្បូង , ហុងកុង , វៀតណាម , ម៉ាកាវ , ម៉ាឡេស៊ី , កោះតៃវ៉ាន់ , ហ្វីលីពីន , ឥណ្ឌូណេស៊ី , សឹង្ហបូរី និង ប្រទេសប៉ាគីស្ថាន ហើយក៏មានក្រុមចុងភៅល្បីៗ ប្រមាណជិត ៩០០នាក់ មកពីបណ្តាខេត្តចំនួន៣០ក្នុងប្រទេសថៃ ចូលរួមផងដែរ ។
លោក ឡុង ប៊ុនហោ បានឲ្យដឹងទៀតថា ផ្តើមចេញពីរសជាតិម្ហូបខ្មែរចំនួន១០មុខ សមាគមចុងភៅកម្ពុជា បាននាំមកនូវកិត្តិយសជូនជាតិមាតុភូមិ និងប្រជាជនកម្ពុជា ហើយចំពោះទេពកោសល្យនៃការផ្សំគ្រឿងចំអិនម្ហូប វាគ្រាន់តែជាតម្លៃមួយបង្ហាញអំពីបំណិននៅក្នុងវិជ្ជាជីវៈជាចុងភៅតែប៉ុណ្ណោះ ប៉ុន្តែអ្វីដែលជាមោទនភាពសម្រាប់ការលើកពានជ័យលាភី គឺរសជាតិម្ហូបខ្មែរ ។
លោក ឡុង ប៊ុនហោ បានឲ្យដឹងបន្ថែមទៀតថា លទ្ធផលដែលទទួលបាន គឺពានមាសជ័យលាភីប្រចាំតំបន់អាស៊ីចំនួន១ , មេដោយមាស ៣ , មេដាយប្រាក់ ៦ , មេដាយសំរឹទ្ធ ១៧ ហើយបានសម្រាប់បុគ្គលចុងភៅឆ្នើម ព្រមទាំងមេដាយកិត្តិយស ១ បន្ថែមទៀត ។
លោក ង៉ូវ សេងកាក់ ប្រធានមន្ទីរទេចរណ៍ខេត្តសៀមរាប វាយតម្លៃថា ជ័យលាភីទាំងនេះ ពិតជាបានចូលរួមយ៉ាងសំខាន់ក្នុងវិស័យទេសចរណ៍កម្ពុជា ហើយពិតណាស់ថា តាមរយៈនៃការចូលរួមប្រកួតប្រជែងនេះ បណ្តាប្រទេសក្នុងតំបន់ត្រូវបានចាប់អារម្មណ៍ចំពោះរសជាតិម្ហូបខ្មែរ ។
សូមបញ្ជាក់ថា សមាគមចុងភៅកម្ពុជា បានបង្កើតឡើងនៅក្នុងក្រុងសៀមរាបក្នុងឆ្នាំ២០១៣ ហើយឆ្នាំ២០១៩នេះ គឺជាលើកទី៧ ដែលសមាគមចុងភៅកម្ពុជា បានបញ្ជូនក្រុមចុងភៅឆ្នើមៗរបស់ខ្លួន ចេញទៅប្រកួតប្រជែងធ្វើម្ហូប ក្នុងកម្មវិធីធំៗខ្នាតអន្តរជាតិនៅក្រៅប្រទេស ដែលជាការកត់សម្គាល់ទៅលើលទ្ធផលនៃការប្រកួតនោះ គឺរាល់លើកដែលសមាគមចុងភៅកម្ពុជាដណ្តើមបាន ក្រៅពីមេដាយមាស , មេដាយប្រាក់និងមេដាយសំរឹទ្ធជាច្រើននោះ សម្រាប់ជ័យលាភីពានមាស សមាគមចុងភៅកម្ពុជាទទួលបានចំនួន២លើក គឺឆ្នាំ២០១៤ ទទួលបានពានមាសក្នុងកម្មវិធីប្រកួតធ្វើម្ហូប រសជាតិអាហារទន្លេមេគង្គ នៅទីក្រុងបាងកក ប្រទេសថៃ និងលើកទី២ គឺពានជ័យលាភី ប្រកួតធ្វើម្ហូបអាស៊ី ឆ្នាំ២០១៩នេះ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
