កាលពីរសៀលថ្ងៃទី០១ ខែមិថុនា ឆ្នាំ២០១៩នេះ សហភាពសហព័ន្ធ យុវជនកម្ពុជាខេត្តសៀមរាប សហការជាមួយសមាគមបាល់ទាត់ប្រចាំខេត្តសៀមរាប បានរៀបចំបិទការប្រកួតពានរង្វាន់ នៃយុទ្ធនាការសៀមរាបផ្ទះខ្ញុំ ក្រោមប្រធានបទ (កីឡាដើម្បីសុខភាព) សម្រាប់ការប្រកួតបាល់ទាត់ពានរង្វាន់សប្បុរសធម៌ វ័យចំណាស់ អាយុលើស៣៥ឆ្នាំ លើកទី២ ឆ្នាំ២០១៩ ក្រោមអធិបតីភាពលោក ពិន ប្រាកដ អភិបាលរងខេត្តសៀមរាប ដោយមានការអញ្ជើញចូលរួមពីសំណាក់លោក សំកុល សុចិត្រា អនុប្រធានសហភាពសហព័ន្ធយុវជនកម្ពុជាខេត្តសៀមរាប , លោក ប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាប និងជាប្រធានសមាគមកីឡាបាល់ទាត់ខេត្តសៀមរាប និងលោក លោកស្រី ជាសហការី កីឡាករ មន្ត្រីរាជការ នៃមន្ទីរ ស្ថាប័ន អង្គភាពពាក់ព័ន្ធ និងសាធារណៈជន ដែលស្រឡាញ់វិស័យកីឡាមួយចំនួនទៀត ផងដែរ ។
លោក ពិន ប្រាកដ បានមានប្រសាសន៍ថា យុទ្ធនាការនៃការប្រកួតនេះ ធ្វើឡើងក្នុងគោលបំណងគៀងគររកថវិកា ដើម្បីជាជំនួយក្នុងការធ្វើការងារមនុស្សធម៌ និងប្រកួតជាលក្ខណៈមិត្តភាព ដើម្បីបង្កើតភាពស្និតស្នាល និងដើម្បីសុខភាព ជាពិសេស គឺជាការចូលរួមចំណែកមួយក្នុងការធ្វើឲ្យវិស័យកីឡារបស់កម្ពុជា ក៏ដូចជាវិស័យអប់រំនៅខេត្តសៀមរាប មានការរីកចម្រើន និងឈានឆ្ពោះទៅមុខជាលំដាប់ ស្របតាមគោលនយោបាយរាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជានាយករដ្ឋមន្ត្រី បានធ្វើកំណែទម្រង់យ៉ាងស៊ីជម្រៅ ចំនួន ៨ចំណុច ក្នុងនោះចំណុចរបស់ក្រសួងអប់រំ យុវជន និងកីឡា គឺមានកំណែទម្រង់ការងារអប់រំកាយ និងកីឡា ដើម្បីលើកកម្ពស់សុខភាព សមត្ថភាពជំនាញ បច្ចេកទេស អប់រំកាយ កីឡារបស់សិស្ស និស្សិត យុវជន និងមហាជនប្រកបដោយគុណភាព និងប្រសិទ្ធភាពខ្ពស់ និងឈានឆ្ពោះទៅកាន់ការប្រកួតជាលក្ខណៈជាតិ និងអន្តរជាតិផងដែរ ។
សូមបញ្ផាក់ថា ការប្រកួតពានរង្វាន់បាល់ទាត់សប្បុរសធម៌វ័យចំណាស់ ក្នុងឆ្នាំ២០១៩នេះ មានសរុបចំនួន ៧០ ប្រកួត , មាន១២ ក្រុមចូលរួម ដោយចែកចេញជាលទ្ធផលដូចជា ៖
– កីឡាករដែលស្វែងរកគ្រាប់បាល់បានច្រើនជាងគេក្នុងរដូចកាលទី២ នេះ បានទៅលើកីឡាករឈ្មោះ យឹម ដុល្លា មកពីក្រុមបាល់ទាត់ប៉ារ៉ាល័យ ដែលទទួលបានពាន ១ , លិខិតសរសើរ ១ និងថវិកាអម ចំនួន១៥ម៉ឺនរៀល ដែលរកបានគ្រាប់បាល់សរុបចំនួន៣៨ គ្រាប់ ។
– ក្រុមកីឡាករដែលរៀបចំក្រុមបានល្អ គឺបានទៅលើក្រុមរតនៈអភិវឌ្ឍន៍ ដោយទទួលបានពាន១ , លិខិតសរសើរ ១ និង ថវិកាអមចំនួ ៣០ម៉ឺនរៀល ។
– ក្រុមដែលជាលក្ខណៈ Fair Play បានទៅលើក្រុមបាល់ទាត់បក្សីអង្គរ ដោយទទួលបានពាន ១ , លិខិតសរសើរ ១ និង ថវិកាអមចំនួន៣០ម៉ឺនរៀល ។
– ចំណាត់ថ្នាក់លេខ ១ បានទៅលើក្រុមបាគង យូណាយធីត ទទួលបានមេដាយមាស , ពាន ១ , លិខិតសរសើរ ១ និង ថវិកាអមចំនួន១លាន៦សែនរៀល ។
– ចំណាត់ថ្នាក់លេខ ២ បានទៅលើក្រុមគ្រុឌមាស ដោយទទួលបានមេដាយប្រាក់ , លិខិតសរសើរ និងថវិកាអមចំនួន ១លាន២សែនរៀល ។
– ចំណាត់ថ្នាក់លេខ ៣ បានទៅលើក្រុមមុំ អេហ្វស៊ី ដោយទទួលបានមេដាយសំរឹទ្ធ , លិខិតសរសើរ និងថវិកាអមចំនួន ១លានរៀល ។
សម្រាប់ថវិកាជ័យលាភីទាំងអស់ ក្រុមកីឡាករទាំងអស់សម្រេចថា បង្វិលថវិកាទាំងអស់មកធ្វើសកម្មភាពមនុស្សធម៌ តាមរយៈគណៈកម្មការរៀបចំការប្រកួត ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
