សមាគមចុងភៅកម្ពុជា បានដណ្ដើមយកពានមាសជ័យលាភីប្រចាំតំបន់អាស៊ីចំនួន១ មេដាយមាសចំនួន៣ រួមនឹងមេដាយគ្រប់កម្រិតថ្នាក់ជាច្រើនទៀត ក្នុងការប្រឡងប្រកួតប្រជែងរសជាតិម្ហូបអាស៊ី ( Best Asian Gourmet Challenge ) នៅទីក្រុងបាងកក ប្រទេសថៃ ដែលមានប្រទេស និងតំបន់ចំនួន១៣ចូលរួម កាលពីពេលកន្លងមកថ្មីៗនេះ ដែលជ័យលាភីនេះ គឺជាកិត្តិយសរបស់ខេត្តសៀមរាប និងប្រជាជាតិកម្ពុជាទាំងមូល។
ការបង្ហាញនូវមោកទភាពនេះ នៅព្រឹក ថ្ងៃទី០៤ ខែមិថុនា ឆ្នាំ២០១៩ ឯកឧត្តម ទៀ សីហា អភិបាលខេត្តសៀមរាប បានឧបត្ថម្ភទឹកប្រាក់ចំនួន ៤លានរៀល ជូនដល់សមាគមចុងភៅកម្ពុជា ជាមួយគ្នានោះ ឯកឧត្តមមានប្រសាសន៍ថា ៖ ការឧបត្ថម្ភគាំទ្រ វាមិនអាស្រ័យទៅលើទំហំនៃទឹកប្រាក់ទាំងនេះទេ តែអ្វីជាសំខាន់គឺទឹកចិត្តនៃការចូលរួម ដែលក្រុមអ្នកធ្វើម្ហូបរបស់សមាគមចុងភៅកម្ពុជា បានលះបង់កាតព្វកិច្ចគ្រួសារ បំពេញភារកិច្ចតំណាងឲ្យជាតិទាំងមូល ឆ្លងកាត់បញ្ហាប្រឈមនានា ដើម្បីជ័យលាភីដ៏មានតម្លៃនេះ ។
ឯកឧត្តមអភិបាលខេត្ត បានថ្លែងនូវការកោតសរសើរ ចំពោះសមាគមចុងភៅកម្ពុជា ដែលបានជ្រើសរើសយកម្ហូបខ្មែរពិសេសៗចំនួន១០មុខ ទៅចូលរួមក្នុងការប្រកួតនោះ ។ ឯកឧត្តមបញ្ជាក់ថា អ្វីដែលត្រូវបានទទួលជ័យលាភីនេះ វាមិនត្រឹមតែកើតចេញពីទេពកោសល្យជំនាញវិជ្ជាជីវៈជាអ្នកធ្វើម្ហូបប៉ុណ្ណោះទេ តែការជ្រើសរើសមុខម្ហូប វាក៏ជាចំណែកមួយ នៃការទទួលបានពិន្ទុល្អផងដែរ ក៏ប៉ុន្តែយ៉ាងណាក៏ដោយ ជ័យលាភីនេះគឺសំដៅទៅលើរសជាតិនៃម្ហូបខ្មែរ ក្រោមការចម្អិនផ្សំរសជាតិ ដោយអ្នកជំនាញធ្វើម្ហូបរបស់សមាគមចុងភៅកម្ពុជា ។
ឯកឧត្តមក៏បានរំលឹកដែរថា ព្រឹត្តិការណ៍អង្គរសង្ក្រាន្តឆ្នាំ ២០១៤ ដែលជាឆ្នាំទី២នៃការបង្កើតព្រឹត្តិការអង្គរសង្ក្រាន្ត ក្រោមស្នាដៃផលិតដោយសមាគមចុងភៅកម្ពុជា នំអន្សមយក្ស ត្រូវបានចុះក្នុងបញ្ជីកំណត់ត្រាឯកទគ្គកម្មពិភពលោក ។
បើយោងតាមសេចក្តីរាយការណ៍របស់ លោក ឡុង ប៊ុនហោ ប្រធានសមាគមចុងភៅកម្ពុជា និងជាអ្នកដឹកនាំចូលរួមការប្រកួតនេះ បានឲ្យដឹងថា មុខម្ហូបខ្មែរចំនួន១០មុខ ត្រូវបានដាក់ចូលក្នុងការប្រកួតនេះ មុខម្ហូបទាំងនោះរួមមាន ញាំក្រូចថ្លុងជាមួយបង្គាទន្លេ សម្លប្រហើរត្រីឆ្អើរ អាម៉ុកត្រី ឆាកង្កែបម្រេចកំពត គ្រំបំពងជ្រក់ស្វាយ សាច់គោអាំងទឹកប្រហុក ការីសាច់មាន់ ខ-ប៉េងប៉ោះ បាយសំរូបសណ្តែកខ្មៅ និង បង្អែមសង់ខ្យាល្ពៅ ។
លោក ច័ន្ទ សុភា ស្ថានិកសមាគមចុងភៅកម្ពុជា ក៏បានបង្ហាញឲ្យដឹងដែថា ចាប់តាំងពីបានបង្កើតឡើង សមាគមចុងភៅកម្ពុជា នាឆ្នាំ២០១៣ សមាគមចុងភៅកម្ពុជា បានចេញទៅប្រកួតធ្វើម្ហូបក្នុងកម្មវិធីខ្នាតអន្តរជាតិនៅក្រៅប្រទេសចំនួន ៧លើក ក្រៅពីទទួលបានមេដាយមាស មេដាយ ប្រាក់ និងសំរិទ្ធជាច្រើនគ្រឿង សមាគមចុងភៅកម្ពុជាទទួលបានពានមាសជ័យលាភីចំនួន២ ។ លោកបន្តឲ្យដឹងទៀតថា កន្លងមកនេះ ក្រៅពីការបង្កើតឡើងនូវព្រឹត្តិការណ៍ និងសកម្មភាពនានាជាច្រើននៅក្នុងខេត្ត ដែលទាក់ទងទៅនឹងការផ្សព្វផ្សាយម្ហូបខ្មែរ ។
លោកបន្តឲ្យដឹងថា ខាងមុខនេះសមាគមចុងភៅកម្ពុជា មានគម្រោងរៀបចំព្រឹត្តិការណ៍ធំៗចំនួន២ទៀត គឺនៅក្នុងខែតុលាឆ្នាំ២០១៩ និង នៅចុងខែមេសា ឆ្នាំ២០២០ ដែលព្រឹត្តិការណ៍ដ៏ធំនោះនឹងត្រូវធ្វើឡើងនៅមុខប្រាសាទអង្គរវត្ត មានវត្តមានចុងភៅជាច្រើនប្រទេស ត្រូវបានចូលរួម ហើយមានភ្ញៀវអ្នកចូលរួមផ្សេងទៀត មិនតិចជាង ១ម៉ឺននាក់នោះឡើយ ៕
សូមរំលឹកថា ក្រុមអ្នកធ្វើម្ហូបរបស់សមាគមចុងភៅកម្ពុជាចំនួន៣២រូប បានទៅចូលរួម ក្នុងកម្មវិធីប្រកួតប្រជែងចុងភៅឆ្នើម អាហារអាស៊ី ( Best Asian Gourmet Challenge ) ឆ្នាំ២០១៩ អស់រយៈពេល១សប្តាហ៍ ដោយបាននាំមកជាមួយ ពានមាសជ័យលាភីប្រចាំតំបន់អាស៊ីចំនួន១ និង មេដោយ មាស ៣ មេដាយប្រាក់ ៦ មេដាយសំរឹទ្ធ ១៧ សម្រាប់បុគ្គល ចុងភៅឆ្នើម ព្រមទាំងមេដាយកិត្តិយស ១ បន្ថែមទៀត ។ បណ្តាអ្នកចូលរួមក្នុងកម្មវិធីនេះ រួមមានមកពីប្រទេសថៃ កម្ពុជា ចិន កូរ៉េខាងត្បូង ហុងកុង វៀតណាម ម៉ាកាវ ម៉ាឡេស៊ី កោះតៃវ៉ាន់ ហ្វីលីពីន ឥណ្ឌូណេស៊ី សឹង្ហបូរី និងប៉ាគីស្ថាន ។ នៅក្នុងកម្មវិធីប្រកួតប្រជែងនោះដែរ ក្រុមចុងភៅល្បីៗមកពីបណ្តាខេត្តចំនួន៣០ក្នុងប្រទេសថៃ ក៏បានចូលរួមផងដែរ ។ សរុបចុងភៅចូលរួមទាំងអស់ មានប្រមាណជិត ៩០០នាក់ ។
រូបភាព និងអត្ថបទ៖ លោក ងិន គឹមឡេង និង លោកខេង ឧត្តម
កែសម្រួលអត្ថបទ ៖ លោក សេង ផល្លី
