ក្រុមការងារអាជ្ញាធរក្រុងសៀមរាប សហការដោយមន្ទីរបរិស្ថានខេត្ត រួមនឹងអាជ្ញាធរមូលដ្ឋាន និងអ្នកតំណាងផ្សារសាមគ្គី នឹងចាត់វិធានការផាកពិន័យ និងបញ្ឈប់ការលក់ដូរភ្លាម ចំពោះប្រជាពលរដ្ឋ ក៏ដូចជាអាជីវករណានៅតែបន្តបោះសំរាមគ្មានសណ្ដាប់ធ្នាប់ បន្ទាប់ពីធ្វើការសំអាតទីតាំងគំនរសំរាមមួយកន្លែង នៅព្រឹកថ្ងៃទី០៤ ខែមិថុនា ឆ្នាំ២០១៩ នេះ នៅក្នុងបរិវេណដី ឯកជនមួយកន្លែង ដែលវាបានបង្កឲ្យប៉ះពាល់បរិស្ថាន សោភណ្ឌភាពក្រុង ក៏ដូចជាសុខភាពប្រជាពលរដ្ឋនៅក្បែរនោះផងដែរ។
ទីតាំងគំណរសំរាម ស្ថិតនៅភូមិបន្ទាយចាស់ ឃុំស្លក្រាម ក្រុងសៀមរាប បើតាមការឲ្យដឹងពីលោក សុភា តំណាងអ្នកគ្រប់គ្រងផ្សារ សាមគ្គីខេត្តសៀមរាបបាននិយាយថា ខាងផ្សារមានទីតាំងចាក់សំរាមត្រឹមត្រូវ និងអនុញ្ញាតឲ្យអាជីវករធ្វើការចោលសំរាមក្រៅពីកន្លែងដែលអនុញ្ញាតឡើយ។
លោក ហា យង់ ប្រធានការិយាល័យអភិវឌ្ឍន៍ក្រុង នៃសាលាក្រុងសៀមរាប បានលើកឡើងថា ករណីគំនរសំរាមនៅក្បែរផ្សារសាមគ្គីក្រុងសៀមរាបនេះ អាជ្ញាធរមូលដ្ឋានទើបតែបានដឹងពីសារព័ត៌មាន រីឯសន្តិសុខនៅប្រចាំការនៅក្នុងបរិវេណដីឯកជននេះ ក៏មិនមានការរាយការណ៍មកកាន់អាជ្ញាធរឡើយ គឹបានត្រឹមតែរាយការណ៍ទៅខាងភាគីផ្សារប៉ុណ្ណោះ។
ដោយឡែក បន្ទាប់ពីការសំអាតគំនរសម្រាប់នេះហើយ ប្រសិនបើនៅតែមានការចោលសំរាមបែបនេះទៀត អាជ្ញាធរក្រុង នឹងអនុវត្តធ្វើការចាប់ផាកពិន័យទៅប្រជាពលរដ្ឋទាំងនោះ។
លោក ស៊ុន ធេន មេភូមិបន្ទាយចាស់ បានបញ្ជាក់ថា អាជ្ញាធរមូលដ្ឋានតែងតែលើកទឹកចិត្តដល់ប្រជាពលរដ្ឋ ឲ្យទំនាក់ទំនងមកអាជ្ញាធរគ្រប់ករណីនៅក្នុងមូលដ្ឋាន ចំពោះករណីការចោលសំរាមពាសវាលពាសកាល គ្មានសណ្ដាប់ធ្នាប់ ប្រជាពលរដ្ឋ ក៏គួរចូលរួមរាយការណ៍មកអាជ្ញាធរមូលដ្ឋានផងដែរ។
ក្នុងការចូលរួមទប់ស្កាត់ការចោលសំរាមគ្មាសណ្ដាប់ធ្នាប់ ជាមួយអាជ្ញាធរនេះដែរ តំណាងអ្នកគ្រប់គ្រងផ្សារសាមគ្គីខេត្តសៀមរាប បានគួសបញ្ជាក់ថា ភាគីផ្សារនឹងធ្វើការព័ទ្ធសំណាញ់បន្ថែមពីលើរបង។
បើតាមការបញ្ជាក់ពី លោក មករា មន្ត្រី ការិយាល័យនៃមន្ទីរបរិស្ថានខេត្ត សំរាមដែលបានដឹកចេញពីគំនរសំរាមនោះមានចំនួន១៣រថយន្ត ស្មើនឹង៥០តោន ដែលសំរាមនេះ អាជីវករ រួមនិងប្រជាពលរដ្ឋបានធ្វើការបោះចោលជាច្រើនឆ្នាំមកហើយ។ ជាការចាត់វិធានការក្ដៅ ដើម្បីទប់ស្កាត់បញ្ហាដដែលៗនេះ អាជ្ញាធរនឹងធ្វើការផាកពិន័យជាទឹកប្រាក់តាមច្បាប់ ដែលបានកំណត់ ចំពោះជនណា ដែលនៅតែមិនគោរពការណែនាំរបស់អាជ្ញាធរ ករណីមិនរាងចាលអ្នកគ្រប់គ្រងផ្សារត្រូវបញ្ឈប់ការជួលតូបដល់អ្នកប្រព្រឹត្តលើ្មសនោះតែម្ដង។
សូមជម្រាបថា ការប្រមូលគំនរសំរាមនៅក្នុងបរិវែណដីសំណង់ឯកជននេះ ក៏មានការចូលរួមដឹកសំរាមដោយមិនគិតថ្លៃពីក្រុមហ៊ុនហ្គាយ៉ាក្រុងសៀមរាបផងដែរ។
អត្ថបទ និងរូបភាព៖ លោក សេង ផល្លី និងលោក ថៃ មករា
