បេសកជនជាច្រើនក្នុងចំណោម២ពាន់នាក់ បានធ្វើដំណើរមកដល់អាកាសយានដ្ឋានអន្តរជាតិខេត្តសៀមរាបជាបណ្ដើរៗហើយ កាលពីថ្ងៃទី០៤ ខែមិថុនា ឆ្នាំ២០១៩នេះ ដើម្បីចូលរួមអបអរសាទរ «ឆ្នាំវប្បធម៌ និងទេសចរណ៍កម្ពុជា-ចិន ២០១៩» និងចាប់ផ្ដើមដំណើរទស្សនកិច្ចនៅកម្ពុជា។
ដើម្បីអបអរសាទរ «ឆ្នាំនៃវប្បធម៌ និងទេសចរណ៍កម្ពុជា-ចិន ២០១៩» នេះដែរ រដ្ឋាភិបាលសាធារណរដ្ឋប្រជាមានិតចិន បានបញ្ជូនគណៈប្រតិភូក្រសួងវប្បធម៌ និងទេសចរណ៍របស់ខ្លួន ដឹកនាំដោយលោក ចាង ស៊ុ អនុរដ្ឋមន្ត្រីក្រសួងវប្បធម៌ និងទេសចរណ៍ រួមជាមួយបេសកជនចិនប្រមាណ ២ពាន់នាក់ ឱ្យធ្វើដំណើរមកទស្សនកិច្ចនៅកម្ពុជា ចាប់ពីថ្ងៃទី០២-០៨ ខែមិថុនា ហើយបេសកជនជាច្រើនក្នុងចំណោម២ពាន់នាក់នោះ បានធ្វើដំណើរមកដល់អាកាសយានដ្ឋានអន្តរជាតិខេត្តសៀមរាបហើយ។
ក្នុងដំណើរទស្សនកិច្ចនេះ ភាគីកម្ពុជា-ចិនក៏បាននាំមកនូវវេទិកាផ្គូរផ្គង់ដៃគូធុរកិច្ចទេសចរណ៍រវាងក្រុមហ៊ុនការីទេសចរណ៍ចិន (អ្នកទិញ) ចំនួន៥០ក្រុមហ៊ុន ជាមួយក្រុមហ៊ុនការីទេសចរណ៍កម្ពុជា (អ្នកលក់) ចំនួន៥០ក្រុមហ៊ុន ហើយក្នុងនោះដែរ ក្រសួងវប្បធម៌ និងទេសចរណ៍ចិន និងក្រសួងទេសចរណ៍កម្ពុជា ក៏បានកំណត់យកឆ្នាំ២០១៩ ជាឆ្នាំវប្បធម៌ និងទេសចរណ៍កម្ពុជា-ចិន ដើម្បីជំរុញការផ្លាស់ប្ដូរវប្បធម៌ និងទេសចរណ៍រវាងប្រជាជាតិទាំងពីរកាន់តែខ្លាំងថែមមួយកម្រិតទៀត។ ជាពិសេសគឺដើម្បីស្វែងយល់អំពីឱកាសវិនិយោគក្នុងវិស័យទេសចរណ៍ ជួយផ្សព្វផ្សាយសក្តានុពលទេសចរណ៍កម្ពុជាដល់ប្រជាជនចិន ក៏ដូចជាទាក់ទាញទេសចរចិនមកកម្ពុជាឲ្យកាន់តែច្រើនថែមទៀត។
សូមជម្រាបផងដែរថា «ឆ្នាំនៃវប្បធម៌ និងទេសចរណ៍កម្ពុជា-ចិន»នេះនឹងប្រព្រឹត្តិទៅនាល្ងាចថ្ងៃទី០៥ ខែមិថុនានេះ នៅសាលមហោស្រពកោះពេជ្រ ក្រោមអធិបតីភាពឧបនាយករដ្ឋមន្ត្រី ប៊ិន ឈិន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី តំណាងសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ហើយកម្មវិធីនេះបានរៀបចំឡើងដោយក្រសួងវប្បធម៌ និងទេសចរណ៍ចិន សហការជាមួយក្រសួងទេសចរណ៍កម្ពុជា ក្នុងគោលបំណងដើម្បីពង្រឹង និងពង្រីកកិច្ចកិច្ចសហប្រតិបត្តិការរួមគ្នាលើផ្នែកទេសចរណ៍ និងវប្បធម៌រវាងប្រទេសទាំងពីរបន្ថែមទៀត មានដូចជាការជំរុញការផ្សព្វផ្សាយទេសចរណ៍រួមគ្នា ការផ្លាស់ប្ដូរទស្សនកិច្ចសិក្សា ការបណ្ដុះបណ្ដាលធនធានមនុស្ស ការសម្ដែងសិល្បៈរួមគ្នាជាដើម៕
អត្ថបទ និងរូបភាព៖ យូ វង្ស
