នាព្រឹកថ្ងៃទី០៥ ខែមិថុនា ឆ្នាំ២០១៩នេះ សាលា International School of Siem Reap ( ISSR ) បានរៀបចំសកម្មភាពសម្អាតបរិស្ថាន ដើម្បីប្រមូលសិស្សានុសិស្សនាំគ្នារើសសំរាម ឲ្យស្របជាមួយនឹងការប្រារព្ធទិវាបរិស្ថានពិភពលោក លើកទី៤៧ឆ្នាំ ( ១៩៧២-២០១៩ ) ។
លោកស្រី Giulia Balducci គ្រូបង្រៀនមុខវិជ្ជាវិទ្យាសាស្ត្រ និងជាអ្នករៀបចំកម្មវិធីនេះ លើកឡើងថា បរិស្ថានគឺជាប្រធានបទមួយយ៉ាងសំខាន់ ដែលពិភពលោកកំពុងយកចិត្តទកដាក់ ជាមួយនឹងការលើកទឹកចិត្ត ដើម្បីការរស់នៅប្រកបដោយផាសុកភាព ។ កម្មវិធីបរិស្ថានពិភពលោក កំពុងតែបន្តផ្សព្វផ្សាយចំណេះដឹងអំពីបរិស្ថាន ដល់មនុស្សម្នាជាច្រើននៅក្នុងសហគមន៍ ។
លោកស្រីបន្តថា កម្មវិធីនេះ គឺមានការណែនាំដល់សិស្សអ្នកចូលរួម ឲ្យបានយល់ដឹងផងដែរ ថាតើសម្រាមដែលជាកាកសំណល់នោះ បែបណាដែលអាចយកមកកែឆ្នៃប្រើឡើងវិញបាន ហើយសម្រាមប្រភេទបែបណា ដែលមិនអាចប្រើប្រាស់ឡើងវិញបាន ពិសេសនោះគឺការបែងចែកប្រភេទសម្រាម ។
លោក ខេង ឬទ្ធី សមាជិកក្រុមប្រឹក្សាសង្កាត់សាលាកំរើក បានលើកឡើងថា ទីក្រុងស្អាតគឺផ្តើមចេញពីយើងទាំងអស់គ្នា សិស្សានុសិស្សទាំងអស់ដែលបានចូលរួមសកម្មភាពរើសសម្រាម អបអរសាទរទិវាបរិស្ថានពិភពលោក ដែលរៀបចំឡើងដោយសាលា International School of Siem Reap ( ISSR ) គឺមានន័យថា ជាសកម្មភាពបង្ហាញដល់សហគមន៍ ដើម្បីចូលរួមទាំងអស់គ្នា សម្អាតបរិស្ថាន ដែលជាដំណើរឆ្ពោះទៅរក ការធ្វើឲ្យទីក្រុងរបស់យើងស្អាត ដែលជាចលនាមួយ រួមចំណែកអនុវត្តគោលនយោបាយរក្សានិរន្តរភាពនៃកំណើនភ្ញៀវទសចរ ចូលមកទស្សនាអង្គរសៀមរាប ។
សូមបញ្ជាក់ថា តាមរយៈនៃសកម្មភាពមួយពេលនេះ វាអាចនិរន្តរភាពបរិស្ថានគ្មានសម្រាមនៅក្នុងសង្កាត់សាលាកំរើកទាំងមូលបាននោះទេ តែវាជាសារសកម្មភាពមួយ ដើម្បីការចូលរួមពីសំណាក់ប្រជាសហគមន៍ ក្នុងគោលដៅរួម សម្រេចបំណងដែលចង់បាន គឺការលើកស្ទួយសោភ័ណភាព អនាម័យ និងសុខភាពរបស់ប្រជាពលរដ្ឋ ហើយកម្មវិធីនេះ ត្រូវបានធ្វើឡើងនៅតាមបណ្តាដងផ្លូវចំនួន៤ខ្សែ ចម្ងាយសារុបប្រហែលជា៤គីឡូម៉ែត្រ នៅក្នុងសង្កាត់សាលាកំរើក ក្រោមការចូលរួមរបស់សិស្សានុសិស្សប្រមាណជាង១០០នាក់ ៕
អត្ថបទ និងរូបភាព ៖ ងិន គីមឡេង
