ដើម្បីបំពេញតម្រូវការរបស់សិស្សានុសិស្ស នៃសាលារៀនបឋមសិក្សា ភូមិវិហារចិន ដែលពីមួយឆ្នាំទៅមួយឆ្នាំ កំណើនសិស្សចូលមកសិក្សា មានការកើនឡើង ។ ដោយកត្តាទាំងនេះហើយទើប ឯកឧត្តម ទៀ សីហា អភិបាលនៃគណៈ អភិបាលខេត្ត និង លោកជំទាវ ព្រមទាំងឯកឧត្តម លោកឧកញ៉ា លោកជំទាវ អស់លោក លោកស្រីជាសមាជិកក្រុមប្រឹក្សា ខេត្ត គណៈអភិបាលខេត្ត ថ្នាក់ដឹកនាំមន្ទីរ អាជ្ញាធរក្រុង មន្ត្រីរាជការ លោកគ្រូ អ្នកគ្រូ គណៈគ្រប់គ្រងសាលា សិស្សានុសិស្ស និង មាតាបិតា អាណាព្យាបាលសិស្ស រួមទាំងប្រជាពលរដ្ឋ បានរួមមតិគ្នា ផ្តួចផ្តើមធ្វើបុណ្យអង្គផ្កាប្រាក់ សាមគ្គីមួយ ដើម្បីធ្វើការប្រមូលថវិកា យកមកធ្វើការសាងសង់អគារសិក្សា ដែលមានកម្ពស់៣ជាន់ ធ្វើអំពីថ្ម ចាក់បេតុង ។ បច្ចុប្បន្ននេះ អគារថ្មី ត្រូវបានសាងសង់នៅជាន់ផ្ទាល់ដី មាន៤បន្ទប់ ដោយ៣បន្ទប់សិស្សរៀនសូត្រ និង ១បន្ទប់ជាទីចាត់ការ ។
តាមការបញ្ជាក់របស់លោកស្រី ស៊ន់ សុធីដា នាយិកាសាលារៀនបឋមសិក្សាភូមិវិហារចិន បានឲ្យដឹងថា នាសម័យ ប៉ុល ពត គឺជាកន្លែងផលិតសាប៊ូ ក្រោយថ្ងៃរំដោះ ៧មករា ១៩៧៩ ត្រូវបានរៀបចំធ្វើជាសាលារៀន ។ ក្រោយមកក៏ បានធ្វើការសាងសង់បានអគារឈើ ប្រកក្បឿង មាន២អគារ ស្មើ៦បន្ទប់ ហើយ១បន្ទប់ជាទីចាត់ការ ក្នុងទស្សវត្សឆ្នាំ៨០ ។ លោក នាយិកាបានបន្តទៀតថា មកដល់បច្ចុប្បន្ននេះ អគារសិក្សាទាំងពីរខ្នងមានការទ្រុតទ្រោមខ្លាំង ដោយអគារឈើមួយខ្នង ត្រូវបានបាក់រលំ ដែលធ្វើឲ្យមានការព្រួយបារម្ភចំពោះសិស្សកំពុងសិក្សាទៀតផង ។ ដោយបញ្ហាទាំងនេះហើយ ទើបគណៈ គ្រប់គ្រងសាលា បានឯកភាពគ្នាធ្វើអគារថ្មី អំពីថ្ម មានកម្ពស់៣ជាន់ ដោយពេលនេះធ្វើបានជាន់ជាប់ដី មាន៤បន្ទប់ ដោយ មានបន្ទប់សិស្សសិក្សា ៣បន្ទប់ និង ទីចាត់ការ១បន្ទប់ ។ លោកនាយិកាបានឲ្យដឹងទៀតថា សិស្សដែលបានចូលមកសិក្សា នៅទីនេះ មានចំនួនសរុប ១០៥នាក់ ស្រី៨៤នាក់ មានគ្រូបង្រៀន ៦នាក់ គឺ ចាប់ពីថ្នាក់មត្តេយ្យសិក្សាទៅដល់ថ្នាក់ទី៦ ដោយបង្រៀនពីរពេល ។ លោកនាយិកាបានបន្តទៀតថា ការសាងសង់អគារសិក្សាបានជាន់ជាប់ដីនេះ គឺជាថវិកាទទួលបាន ពីសប្បុរសជន មាតាបិតា អាណាព្យាបាលសិស្ស ហើយក៏នៅមានការជំពាក់គ្រឿងសំណង់ សម្ភារៈ និង ថ្លៃជាងទៀតផង ។ ម្យ៉ាងទៀត ការធ្វើបុណ្យផ្កាប្រាក់នេះឡើង ក្នុងការប្រមូលថវិកា ដើម្បីធ្វើការសាងសង់បន្ត ជាការបំពេញនូវតម្រូវការនៃសេចក្តី ស្រេចឃ្លាន នូវចំណេះវិជ្ជាសម្រាប់កូនខ្មែរ ដែលជាទីកន្លែងមូលដ្ឋានគ្រឹះដ៏រឹងមាំរបស់សង្គមជាតិសម្រាប់ទៅពេលអនាគត ។
ក្នុងការសំណេះសំណាលនោះ ឯកឧត្តម ទៀ សីហា បានលើកឡើងថា នៅក្នុងសង្គមជាតិបច្ចុប្បន្ន ដែលកំពុងស្ថិតនៅក្នុងដំណើរនៃការអភិវឌ្ឍ ក៏ជាការបង្ហាញឲ្យឃើញផងដែរថា សង្គមជាតិកំពុងស្ថិតរក្រោមដំបូលនៃសន្តិភាព ក្រោមការដឹកនាំដ៏ឈ្លាសនេះនៃប្រមុខរាជរដ្ឋាភិបាល ។ ប្រជាពលរដ្ឋបានទទួលឱកាសធ្វើបុណ្យទាន គឺផ្តើមចេញពីសង្គមជាតិមានសុខសុវត្ថិភាព ហើយប្រជាពលរដ្ឋមានលទ្ធភាពធ្វើបុណ្យទានផ្សេងៗ ក៏អាស្រ័យដោយប្រជាពលរដ្ឋមានជីវភាពសមរម្យ ដែលម្លប់សន្តិភាពបានផ្តល់ឲ្យ ។ ឯកឧត្តមបានគូសបញ្ជាក់ថា ភាពរីកចម្រើន និង សមទ្ធផលដែលយើងកំពុងធ្វើពេលនេះ មិនមែនបានមកពីការខិតខំប្រឹងប្រែងរបស់រាជរដ្ឋាភិបាល អាជ្ញាធរមូលដ្ឋានតែប៉ុណ្ណោះទេ វាជាការចូលរួមយ៉ាងចាំបាច់ទាំងសណ្តានចិត្ត កម្លាំងពលំនិងការបរិច្ចាគជាថវិកាពីប្រជាពលរដ្ឋ ដែលជាកម្លាំងមហាសាមគ្គីមួយ ដែលធ្វើឲ្យយើងសម្រេចបានកិច្ចការធំៗសម្រាប់ជាតិមាតុភូមិ ។
ជាមួយគ្នានឹងសមិទ្ធិផលនេះដែរ ឯកឧត្តមក៏សូមអំពាវនាវដល់បងប្អូនប្រជាពលរដ្ឋ ក៏ដូចជា សាធារណៈជនទាំងអស់ដែលបានបញ្ជូនកូនៗរបស់ខ្លួនមកសិក្សា នៅសាលារៀនបឋមសិក្សាភូមិវិហារចិននេះ សូមចូលរួមថែរក្សា ការពារ សមទ្ធិផលនេះឲ្យបានប្រើប្រាស់បានយូរអង្វែង ។ សមទ្ធិផលអគារសិក្សានេះ គឺកើតចេញឡើង ពីកម្លាំង ញើសឈាមរបស់យើងគ្រប់គ្នា ដែលបានបរិចាកនូវទ្រព្យធន ក្នុងការរួបចំណែកអភិវឌ្ឍន៍លើវិស័យអប់រំសិក្សា ពីព្រោះថា ថ្នាក់បឋមនេះហើយ ដែលជាគ្រឹះដ៏រឹងមាំនៃអក្សរសាស្ត្រជាតិ ហើយក៏ជាមូលដ្ឋានគ្រឹះនៃធនធានមនុស្ស សម្រាប់បន្តវេន ទៅថ្ងៃអនាគតផងដែរ ៕
អត្ថបទ និងរូបភាព ៖ ម៉ី សុខារិទ្ធ / គឿន វ៉េត
