ប្រជាពលរដ្ឋរស់នៅក្នុងក្រុងសៀមរាប បានសម្តែងនូវការសាទរចំពោះវិធានការ របស់អាជ្ញាធរ ក្នុងការរៀបចំសណ្តាប់ធ្នាប់សាធារណៈ ដើម្បីលើកកម្ពស់សោភ័ណ្ឌភាពទីក្រុងទេសចរណ៍មួយនេះ ហើយជាមួយនឹងការសាទរនេះដែរ ពួកគាត់សង្ឃឹមថា វិធានការនេះ នឹងមានប្រសិទ្ធភាព លែងដើរវែកចកដូចមុន។
ប្រជាពលរដ្ឋបានក៏បានលើកឡើងដែរថា កាលពីពេលកន្លងទៅ អាជ្ញាធរតែងតែចុះអនុវត្តនូវការងាររៀបចំសណ្តាប់សាធារណៈជាហូរហែ ប៉ុន្តែមិនបានប៉ុន្មានថ្ងៃផង ភាពរញ៉េរញ៉ៃបានកើតឡើងវិញដដែល ហាក់បីដូចជាអាជ្ញាធរដើរវែកចកក្នុងបឹងប៉ុន្តែចំពោះពេលនេះគាត់សង្ឃឹមថា សោភ័ណ្ឌភាពទីក្រុងទេសចរណ៍មួយនេះ នឹងមានភាពល្អប្រសើរជាមុនបន្ទាប់ពីមានការចុះរុះរើ និងរៀបចំសណ្ដាប់ធ្នាបពីសំណាក់អាជ្ញាធរនៅពេលនេះ។
លោកម៉ៅ ដាវី ប្រធានការិយាល័យវប្បធម៌ក្រុង និងជាតំណាងរដ្ឋបាលក្រុងសៀមរាប បានឲ្យដឹង កាលពីថ្ងៃទី០៥ ខែមិថុនា ឆ្នាំ២០១៩ថា ចំពោះវិធានការរៀបចំសណ្តាប់ធ្នាប់នេះ ខាងអាជ្ញាធរមិនបានកំណត់ពេលវេលានោះទេ គឺធ្វើទាល់តែអស់ ដែលជំហានដំបូង រដ្ឋបាលខេត្តកំណត់យកការរៀបចំតាមបណ្តោយផ្លូវជាតិលេខ៦ ចាប់ពីស្ពានថ្ម ព្រះរាជដំណាក់រហូតដល់ព្រំប្រទល់ស្រុកប្រាសាទបាគង ។
ព័ត៌មានជាតិ ថ្មីៗ
លោកបន្តថា លោកទទួលស្គាល់ថា រាល់កការអនុវត្តរបស់អាជ្ញាធរ តែងតែមានចន្លោះប្រហោងខ្លះ មិនល្អឥតខ្ចោះនោះទេ គឺទាល់តែមានការចូលរួមពីសំណាក់បងប្អូនប្រជាពលរដ្ឋយើងទាំងអស់គ្នា ទើបធ្វើឲ្យការងារនេះមានភាពល្អប្រសើរ និងល្អជាងមុន ។
សូមបញ្ជាក់ថា ចាប់តាំងពីថ្ងៃទី០៣ ខែមិថុនា ឆ្នាំ២០១៩ អាជ្ញាធរខេត្តសៀមរាប បានចុះអនុវត្តនូវវិធានការចុះរុះរើផ្ទាំងប៉ាណូ ផ្សេងៗ ក្នុងបំណងរៀបចំសោភណ្ឌ័ភាពទីក្រុងសៀមរាប ឲ្យសាកសមជាទីក្រុងទេសចរណ៍ប្រវត្តិសាស្ត្ររបស់កម្ពុជា ហើយរហូតមកដល់ថ្ងៃទី០៥ ខែមិថុនា ឆ្នាំ២០១៩ម្សិលមិញនេះ អាជ្ញាធរបានកាត់ស្លាកផ្ទាំងប៉ាណូដែលពុំមានច្បាប់អនុញ្ញាតចំនួន៤៨ផ្ទាំងហើយ៕
អត្ថបទ និងរូបភាព ៖ ជា ស្រស់, ខេង ឧត្តម
កែសម្រួល ៖ អ៊ុន ណារាជ្យ
